Kulturë
Poezi nga Mercedes Gega
E enjte, 29.06.2017, 08:12 PM
Mercedes Gega
Momente fluturake lumturie
Përshkuan qiejt e syve të tu,
Kur dera e pritjes u hap
Dhe buzëqeshur, haplehtë hyri
Nje rreze e praruar flu.
Larg teje… s’mundem!
Larg teje dot s’gjalloj
Siç dot s’mundesh as ti
Sublimja gjer në dhembje
Fisnikja “dashuri”.
Unë kam jetuar
Në ballin tënd pasqyrë
Një rrudhë lehtë buzëqeshte
Sa herë balukja gri
Dy sytë t'i përkëdheldhte.
Dhe shndriste gjithë fytyra
Nga një dritë e praruar
Tek flokët ngrinte lart
E thoshte...
Unë kam jetuar.
13 shkurt 2017
Më prit...më ndje
Ja prit një çast
Për ku nxiton
Jam unë që flas
Vërtet s'dëgjon?!
Përse përvidhesh
Ndër fjalë të kota
E nisesh shtigjesh
Që dikton bota.
Jam unë që flas
Që isha dje
Për ty dhe ajër
dhe qiell pa re.
Jam unë sërish
Ngrij sytë, më ndje
I yti ajër
E qiell si dje.
30 maj 2017
Qetësi
E vërteta le të thuhet
Nuk të zgjodha
e me vetëdije plotësisht ta them :
" Unë jam e dashuruar me fjalën
Që në krye të herës kështu ka qenë!"
Mahnitem e sërish dot s'kuptoj
Me mua kjo është dashuri?!
Në momente kur dhe vetja më harron
Ti rizgjedh të jesh...
Aty!!!
30 maj 2017
Më mungon
Ka ditë që s’mudem
Të të jem pranë
Ashtu si s’mundesh
Dhe të kuptoj
Dallgët e ditës shpesh na përfshijn
Herë na përplasin...
Herë përqafojnë.
Kanë rrjedhur ditë...
Ca kohë në fakt
Që s’të jam pranë
Siç meriton
Ndaj munda sot
dhe dallgë dhe ditë
Drejt zemrës tënde
Të fluturoj.
Në sytë e tu
Të shplodh frymëmarrjen
Të them të dua dhe...
Më mungon!
2 qershor 2017