Zemra Shqiptare

  https://www.zemrashqiptare.net/


Hazir Mehmeti: Shqiptarët në Vjenë pjesë e Javës së Kulturës

| E diele, 07.05.2017, 10:27 AM |


Aktivitet kulturor i Lidhjes së Shkrimtarëve e Krijuesve “Aleksandër Moisiu” në Austri

Shqiptarët në Vjenë pjesë e Javës së Kulturës  Integrimit

Tani e tri vite krijuesit shqiptarë pjesë e Javës Kulturore se Integrimit në Vjenë.  Lidhja e Shkrimtarëve dhe Krijuesve Shqiptarë “Aleksandër Moisiu” në Vjenë, shembull i afirmimit të vlerave krijuese letrare e artistike mes kombeve tjera.

Nga Hazir MEHMETI

Vjenë, prill 3 maj 2017: Qyteti i Klasikes dhe kulturës, Vjena, çdo vit organizon Javën e Kulturës Integrimit ku qytetarët e bashkive marrin pjesë në aktivitete kulturore përmes shoqatave, klubeve dhe krijuesve nga kombe të ndryshme. Në Vjenë tani viti i katërt që merr pjesë Lidhja e Shkrimtarëve dhe Krijuesve “Aleksandër Moisiu” në Austri.

Lidhja bashkërendon kontaktet me krijues gjuhësh të ndryshme që jetojnë në Austri.  Ora letrare e kësaj Jave Kulturore të Integrimit u mbajt në Muzeun e Bashkinë e nëntë ku lexuan: Besim Xhelili (Maqedoni), Seher Çakir (Austri), Philo Ikonya (Keni), Marzanna Danek-Hnelozub (Poloni) dhe Ishraga Mustafa-Hamid (Sudan). Drejtuese e programit ishte Kaltërina Durmishi.

Orën letrare e hapi Anton Marku, kryetar i Lidhjes i cili përshëndeti  krijuesit e të pranishmit duke dhënë njoftim mbi rrugëtimin gjashtëvjeçar të Lidhjes.  “Është viti i katërt që jemi pjesë e Javës së Kulturës Integrimit në Vjenë dhe kemi krijuar raporte bashkëpunimi me shumë krijues nga vende të ndryshme nga e gjithë bota që jetojnë në Austri. Kësaj radhe mungon miku i Lidhjes, shkrimtari i mirënjohur Peter Paul Wiplinger, për shkaqe shëndetësore, shpresojmë se shpejtë do jetë në mesin tonë. Brenda kësaj kohe kemi botuar dy antologji në gjermanisht dhe shqip si dhe kemi mbajtur mbi shumë orë letrare, ku kemi promovuar dhjetëra vepra nga krijuesit tanë këtu në Austri dhe nga vende tjera”. Shkrimtarja nga Kenia Philo Ikonya lexoi pjesë nga krijimtaria e saj e re. Ka të botuara krijime letrare dhe publicistike në disa gjuhë. Seher Çakir, u lind në Stamboll e cila tani jeton në Vjenë. Ka mbaruar Akademinë Pedagogjike në Turqi.  Është fituese e bursës shtetërore të Austrisë. Deri tani ka të botuara krijime në gjermanisht dhe turqisht.

Shkrimtarja nga Polonia Marzanna Danek, lexoi poezi nga përmbledhja e fundit „Das Paradis“ (Parajsa). Deri tani ka të botuar vepra në shumë shtete të botës, është fituese e disa çmimeve ndërkombëtare për poezi, ese, tregime. Krijuesja nga Sudani.

Ishraga Mustafa-Hamid, e cila jeton në Vjenë, lexoi poezi nga përmbledhja e saj  “Trotzdem singe ich“ (“Megjithatë unë këndoj“). Është fituese e disa çmimeve dhe mbështetjeve për studime nga Ministria Federale e Mësimit, Artit e Kulturës në Austri. Krijimet e saj janë pjesë e disa antologjive në Austri dhe më gjerë. Besim Xhelili u lind në Tetovë, i cili tani jeton në Vjenë. Kryesisht merret me poezi e tani së fundi edhe me prozë. Është anëtar i P.E.N Clubit në Austri. Ka të botuara disa përmbledhje me poezi. Ai lexoi fragmente nga romani i tij i fundit “1803”.

“Letërsia dhe muzika e frymëzojnë njëra-tjetrën, këtë e plotësuan dy instrumente me harqe: violonçeli dhe violina, luajtur nga Anna Isabel Chan Flores dhe Rachel Olney. Ato në ndërkohë janë bërë përcjellëse besnike të mbrëmjeve tona letrare”.

Lidhja e Shkrimtarëve dhe Krijuesve Shqiptarë “Aleksandër Moisiu” është shembulli i shkëlqyer i prezantimit të krijimtarisë letrare në gjuhën shqipe, krahas atyre të kombeve tjera. Leximet letrare në shumë qytete të Austrisë, Hungarisë, Gjermanisë janë në shërbim të shkëmbimit ndërkulturor.