Sejdi Berisha: Amaneti i Mësuesit

Sejdi BERISHA:

 

AMANETI I MËSUESIT

(Me rastin e 7 Marsit-Ditës së Mësuesit)

 

Në një mëngjes

Herët

Ama shumë herët

Ishte zgjuar mësuesi

Dhe ngadalë kishte hapur

Derën e shtëpisë-shkollë

E kishte çelur ditarin

Dhe pa ardhur nxënësit

Shënuar e kishte orën e mësimit

Kishte shkruar:

Nxënësit e mi

Mësoni dhe dojeni atdheun

Se, një ditë

Do të lindë dielli

Që do t’u ngrohë

Me dashurinë e lirisë

 

Kur kishin ardhur nxënësit

Ora e mësimit ndryshe kishte filluar

Mësuesi mbi tavolinën e punës

Kishte mbështetur kokën

Dora dhe lapsi i kishin ngelur

Pa e shënuar amanetin deri në fund

Do pika gjaku qëndisur ia kishin

Edhe ballin edhe ditarin

Armiku këtë e kishte bërë

 

Tash

Ata nxënës

Që dikur mësuesi  i kishte mësuar

Janë krenaria e kombit

Janë madhështia e atdheut:

Janë mjekë

Shkencëtarë

Janë artistë e shkrimtarë

Por përgjithmonë

Në kujtesën e tyre

Shtëpia-shkollë

Qëndron si lapidar historie

Edhe mësuesi

Me shikim kah nxënësit e vetë...

 

(Pejë, e martë 07 mars 2017)