E premte, 29.03.2024, 10:23 AM (GMT)

Kulturë

Ibrahim Gani: Balada e korrierit

E enjte, 14.07.2016, 05:33 PM


Balada e korrierit

 

Poemë nga Ibrahim Gani

 

1.

Pranvera po vjen,

Gjaku lumë shkon.

Partisan Hysen

Për ku fluturon!?

 

Pushka tri pëllëmbë

Ngritur përmbi ballë,

Pyet toka Mëmë:

-Pse nxiton o djalë!?

 

Shtigjeve po çaj,

Më pret komisari…

Kënga skaj më skaj:

“Po afron behari…”

 

2.

Natë, udha e gjatë,

Plot yje këputen,

Befas rend shtrëngata,

Hëna pas resh struket.

 

Po ecën korrieri,

S’është e para herë

Që çan si shqiponjë,

Dimrin e bën verë.

 

3.

Natë e vetëtimë,

Le të derdhë hekur,

Në mëngjes në Sinjë,

O gjallë, o të vdekur.

 

Fjala e komandantit,

Urdhër, ligj i shenjtë…

Derdhet shiu i marsit,

Turravrap përrenjtë.

 

4.

Sinja e rrethuar,

Prita, tradhti…

Ulurin tërbuar

Një zagar i zi:

 

-Për ty s’ka më shteg

Tani flake armën,

Në çdo gur e shteg

Ne tok me gjermanët…

 

-Eja, merre vetë,

Zuskë tradhti…

Flakërojnë retë,

Ballas lukuni.

 

5.

Sinja flakë mori,

Vendi shungullon…

Larg Baba Tomori

Sodit, ligjëron:

 

Ç’trima që na jep

Nënë Shqipëri,

Lum për tëndin djep,

Lum djepi për ty.

 

Thyhet sulm i pare,

Shkoqet vala e tretë,

Një grusht partizanë,

Sinjën ndez kometë.

 

Pushka e korrierit,

Një pishtar mbi gur,

Fricin nis drejt ferrit,

Flaka e saj flamur.

 

Gjëmojnë bateritë,

Predhat vale-valë,

Ra trimi i dytë

Fill pas trimit parë.

 

Laku i pabesisë

Zvarritet, afrohet…

Det i trimërisë,

Dhjetë ballë tërbohet.

 

Hallka e rrethimit

Mbas shpine goditet,

Ortek i çlirimit

Sulmon kur nuk pritet.

 

6.

Shokët gjejnë korrierin

Shtrirë përmbi gurë

Është lodhur shumë,

Po merr një sy gjumë.

 

Rrëkeja e gjakut

Lulëkuqe ndez ballin…

Bash te gur i pragut,

Nëna po prêt djalin.

 

7.

Në prag të Nezirit

Befas godit gjëma…

Bashkë me mandate

Erdhi edhe kënga.

 

Ia nis Nezir Dosti,

Dridhen tokë e yje,

Mahnitet vetë Zoti…

Kënga himn lavdie.

 

-Në Sinjë zjarr e flake

Biro si trim re,

Sot një mal i lartë,

Ngrihesh në Atdhe

 

Hasmi do vithiset…

Rend çurkajë e lotit…

U zgjua korrieri,

Rend drejt Kastriotit.

 

Pritja madhështore

Nën kurorë ylberi…

Yjet ndez mbi male

Baladë e korrierit.



(Vota: 0)

Komentoni
Komenti:

Video

Qazim Menxhiqi: Niset trimi për kurbet


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora