Vahit Nasufi: Sulltana e Qafës

Vahit Nasufi

 

SULLTANA  E  QAFËS

 

Në Kërçovë, atje n`malësi,

Në një fshat plotë bujari,

N'fshatin Qafë, n`rrëzë t`Ujmirit -

Luajti bija, rolin e t`birit!

 

Në gjak e kanë trimërinë -

Në shpirt e kanë besnikrinë!

Në kokë e kanë idealin -

E ruajnë nderin dhe moralin!...

 

Rriti nana një shqiponjë mali -

Vajzë trimëreshë, Zoti e fali,

Sokoleshë e bukur si hanë,

Emri i saj ishte Sulltanë.

 

Kjo sorkadhe si zana e malit -

Ishte bija e Mazllamit,

Dy gërsheta mbante mbi shpinë,

Në zemër mbante trimërinë!

 

Ngjarja e vitit 1913 -të,

S`do t`harrohet kurrë për jetë!

Keq armiku ishte tërbuar -

Fshatin Qafë kishte rrethuar!

 

Burrat e Qafës kishte tubuar -

N`oborr Mazllamit i kishte çuar!

Shumë  i rrahin i torturojnë -

Pa asnjë faj i masakrojnë!...

 

Del Sulltana në dritare -

Sheh me sy torturat barbare!

U ra duarve, rrahu shuplakë -

Sot këtu do t`derdhet gjak!...

 

Thotë - moj nanë, kuku për ne,

Duan babën me na e pre!

Babës vet i thotë - prej n`shkallë -

"Gajret babë, se unë jam gjallë"!

 

Armë Sulltanës nuk i qëlloi -

Por, ndërmend shpejt i shkoi!

Gërshanët e dhenve i merr n`dorë -

Fluturim ka dalë n`oborr!

 

Kapedan, more zemërzi,

Copa - copa do të gri!

Thellë ja nguli ato gërshanë -

Të shtrirë për toke e ka lanë!

 

Kapedani pa dhënë shpirt,

Me gojë t`përgjakur përshpërit!

*Turp i madh për mua shumë,

Nuk vriten trimat kështu si unë"!

 

Fjalët e fundit që tha  - komita -

"Prej një çike vdekjen, s`e prita"!

Të ikin shokët i urdhëroi -

Një çikë e re na turpëroi!...

 

Moj Sulltanë, bija e Mazllamit -

Mirë ja bëre kapidanit!

Kështu vepron cuca e malësisë -

Kur ia shkelin pragun e shtëpisë!

 

Moj Sulltanë legjendare -

Heroina kërçovare,

Në histori e n`përkujtimore -

Në zemrat tona e gjallë prore!

 

Ti moj cuca e malësisë -

Jeton në telat e çiftelisë!

Për ty kënga sot jehon -

Populli kurrë s`të harron!...