Demir Krasniqi: Babi kur po blenë një biçikletë

Demir KRASNIQI

BABI KUR PO MA BLENË NJË BIÇIKLETË

Ai e kishte lanë një djalë të vogël në djep

Dhe kishte marrë botën në sy , për në “kurbet “.

Para se të nisej për në “kurbet të zi” –

E puthi në të dy faqet djalin e tij

Dhe aty i pikën dy lot nën sy ,

Mu në vatër të vetmuar pa direkun e shtëpisë .

Duke shikuar me mall kah qilari i shkatërruar ,

Kah vatra e mjeruar ,

Me sy të mjegulluar ,

Iu afrua nënëlokes së vet –

Diçka i foli në vesh ,

Për djalin që e la në djep

Ia la një amanet :

“Ruama  nënë – djalin ,

Se unë po shkoj në “kurbet”!

Rrugë e gjatë ishte ky “kurbet i zi” !...

Djali u rritë dhe mësoi të flasë .

Fjalën e parë mësoi të thërras “Nënë”,

Të dytën mësoi të thërras “Gjyshe” ,

Por një ditë , duke lozur me fëmijët tjerë në livadhe –

E pa se në fjalorin e tij , mungonte një fjalë e madhe ,

Që s’ e kishte mësuar ta shqiptojë hala :

Ai, kurrë s’ e  kishte dëgjuar fjalën “Baba!”

Kur u kthye në mbrëmje –

Gjyshja , sa deshi t’ ia tregojë një përrallë !

Nipi e pyeti :”Kujt i thonë “Baba”?!

Gjyshja , u pre si në shpatë ,

Nga kjo pyetje , që si pikë i ra !

Por , nipi nuk e linte rehat :

“Më trego Gjyshe , të lutëm –

A kam unë baba?!”

-Po, more bir, ti nuk je djalë i shkretë !

Ti, e ke babanë , por ai është në “kurbet “!

Kur të kthejë babai nga kjo rrugë e shkretë –

Do të blejë rroba të bukura dhe një biçikletë !

Djali, prej merakut shumë netë mbeti pa gjumë –

Ëndërronte babanë , që do ta dojë shumë !

Ëndërronte babanë , që do t’i  kthehet shpejtë –

Me rroba të bukura , me  atë biçikletë !...

Një ditë , si në ëndërr e pa babanë e vet ,

Por, ai nuk mund t’ kthehej nga “i ziu kurbet”!...

Dhe kur erdhi koha prej tij për t’u ndarë –

Djali nuk iu ndante – gjithnjë duke qarë !

Nuk iu ndante dot , babait të vet :

“Babi , tregomë të lutëm , kur po vjen ,

Ato rroba t’ bukura , ti kur po m’ i blenë ,

Dhe kur po ma blenë atë biçikletë ,

Se unë prej merakut s’ po mundëm me fjetë ?!”

-Kthehu , biro, kthehu

Dhe shko në shtëpi ,

Se kur të vijë babai –

Rrobat do t’i  bi’ !

Do ta blenë babai dhe një biçikletë ,

Do të jesh i lumtur edhe ti n’ këtë jetë –

Po sa të kthejë babi nga “i ziu kurbet “!