E marte, 28.09.2021, 11:00 PM (GMT+1)

Kulturë

Qazim Shehu: Idil i grisur

E premte, 17.04.2015, 07:11 PM


IDIL I GRISUR

 

QAZIM SHEHU

 

ËSHTË NJË KËNGË

 

Kënga e përbiruar,

Nga plumbat që vërshëllyen në hapësirën e saj,

Ngrihet në mit të trishtuar

Dhe na shkreh në vaj.

Me heronj, luftëtarë.

Na shpluhuros ndjesitë e fjetura

Dhe na i mohon lulet në maj

Ndjesitë e djegura.

Jeta na mësoi ta duam trimërinë

Ta duam plumbin në lule të ballit,

Dhe patëm turp të këndonim dashurinë

Midis dy luftrave ia dhamë të qarit.

Sa heroizma dhe sa këngë,

Sa luftëtarë dhe burrnesha,

Si kapaku i një qielli të rëndë

Na rrinte lart pendesa.

Se ishte një këngë që s`na ik nga kujtesa…

 

 

PINGËRIMË

 

Pingërin zogu në ngricë,

s`do të shuhet,

Dhe gjithë ky zjarr që mban mbi sisë,

Një therje zëri  aty vuhet.

Fjolla bore  derdhen mbi akull,

Fryma ime ngrin pranë zjarrit,

Pingërima e zogut dridhet në ajër,

Për zërin e ndrydhur të   mëkatarit…

 

 

MËSYMJE

 

Më mësyn një fije bari,

Një degë lofate më mësyn,

Në marrinë time prej fshatari,

S`mësohem dot betonit të tymtë.

Dua të jem në një korie,

Në një lëndinë dua të jem

Ti rri larg këtij qyteti lubie

Që më mban në jerm.

E pamundur.E shoh mundësinë

Kaq të paktë për t`u larguar,

Lulet nga larg më mësyjnë

Dhe unë ndjem i papushtuar..

 

 

KUPA

 

Shpirti jot rri në një dru,

Në një trup tjetër frymon,

I mbaj peng sytë e tu,

Herë si engjëll, a demon.

Si shkau ai vështrim

Pjerrtzi, gjithë pezm,

Dashuria mbeti në fillim,

Një kupë me helm.

Të pirë pak nga pak,

Pa na  trallisur krejt,

Të bredhë shpirti e ka hak,

Dhe ta demonizojë këtë shenjt…

 

 

ORGAZMË LULESH

 

Orgazmë lulesh vërshuan në trupin tonë,

Para se lulet të shkonin në farmaci,

I kapërthyer jam  në trumzën që firon

Në zemrën time ,në brendësi.

Dhe nuk e di si do shpëtoj

Nga ky duf i kaltër e tymues,

Në farmakore do të shkoj,

Ta ta marr një ilaç dhe  do rri sus.

 

 

SFERË

 

Po të isha një sferë

Do rrokullisesha më shpejt

Sesa një fjalë ta rrokullis e ta çoj

Aty ku duhet.

Fjala ka qindra gremça

Qindra hone dhe kënde,

Ngrihet me hijet e egra

Zbutet si kone.

Ditën që do e rrokullis

Në këndin e vet të shkojë,

Në petk të sferës do ngjis,

Rrokullisjen si lojë…

 

 

AI VRAÇ I ZI

 

Ai vraç i zi

Ai kalë i baladës,

Shket si rreze

Në majë të shpatës.

 

Dhe rend e rend.

Natën ,vetëm natën,

Ditën ku zë vend

E sjell mandatën.

 

 

FRYMË

 

Në një pllajë gurët marrin frymë

Heshton heshtja  në frymë të tyre,

Herë shiu derdhet, herë brymë

Herë bora shtrohet si qefin lirie.

Sa njerëz i panë dhe s`i shohin më

Këta gurë dëshmitarë pa gojë,

Po fryma e tyre i dridh heshturazi,

Në trill vetmie .

 

 

KY DIELL

 

Dielli me syrin e qorruar,

Na vështron nga lart,

Kaq ligësi kemi sajuar,

Kaq inat .

Vrullon jeta në mësimin e saj,

Një grimëkohë na sjell në vete,

T`i shtrojmë dëshirat,

T`i çrendisim pasionet,

Ligësinë të hedhim.

Këtë diell në orgazëm ta shkrehim…

 

 

THURET

 

Thuret ankimeve të jetës

Gjithnjë një shpresë.

Një triko që fati e hedh supeve,

Nga përcëllimet.

Ç`udhë biblike duhet bërë,

Për të shkuar atje ku duam,

Ndërsa asgjë

Për trikon nuk thuhet…

 

 

IDIL I GRISUR

 

Idili jot është kjo mbrëmje

Kjo fushë dhe hapësira që hesht.

Shfrimi që mbeti diku brenda teje

Si një reumatizëm pleqsh.

Rri e mendoj ,po mendja kërcet

Si një portë që hapet rrallë.

Të afrohem ,idilin tremb,

Po të lë në këtë hapësirë

Vetem me veten të përballesh…

 

 

MË GRISHE

 

Më grishe e më thirre

Të thirra nuk erdhe,

Ç`dashuri brenda teje kishe

Ç`ëndërr .

Koha shkon ,shpesh harroj

Të sillem rreth grishjes e afrimit,

Dhe mbete larg ..po mendoj

Si mund të jetë grishje e fillimit…



(Vota: 0)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora