Nebi Dragoti: Satira politike

NEBI DRAGOTI

SATIRA POLITIKE

Satira,  kompletuar me arsenalin e vet modern, në mënyrë spontane, bëhet leksion determinant morali…Pra, shkurt, është melhem për shëndoshje të politikës dhe forcë shtytëse për progresin shoqëror.Autori.

 

PËRRALLË E RE…

 

Mbreti lakuriq, de,

bëhet përrallë e re

me personazhe të tjerë

kryeministra si gjel,

krekosur e dehur dalin

dordoleca në diell…

 

Edhe pse i godet

vendimi popullor,

prapë sillen fodull,

nuk vetëkorigjohen

si mbretër

lakuriqët kapriçiozë.

 

 

HIPZBRITJET

 

-Hip ti,

pasurohu

dhe ik!...

 

Ndërrim pozicioni:

-Hipi unë,

pasurohem

dhe zbres…

 

Rroftë populli!

Hipzbritjet

bëhen me vota

dhe…

(sëmundje ngjitëse)

qeverisin qeveri hajdutësh.

Pastaj,  me ne

çuditet Bota.

 

 

MASHTRIMI

 

Mashtrimi bëhet njeri,

njeri ters, i lig.

Mashtrojnë dhe politikanët

ditën me diell,

ashiqare fare

me politikën lesh

thurin çorape…

 

Mashtrimi njeri

me qyrk zbukuruar

të mos duket egërsirë

si ujk

që ha kopenë,

ha shoqërinë…

 

 

DHELPRAT

 

Dhelprat si të zbutura

zbritur nga mali

rrufjane

me dredhi

ulur janë(…)

si fisnike

në karrike

me çelësa në dorë

nëpër zyra

me organika

të pshurrura,

të fryra…

 

Dredhin zinxhirë…

Politika pa sy e pa veshë

mban sehir:

u ka bërë

“shtëpizë”…

 

 

KRITIKË

 

Artilerisë së artit i jap komandë:

Art poetik jo tangential!…

 

Tematikat migjeniane nëpërkëmbë

thërrasin,

shtrijnë duart

për t’u shtjelluar prapë e prapë…

 

Problematika

çibane sociale ka:

kërkojnë guxim,

lëvrim

diagonal…

 

 

DHËNDRRI

 

“Bandilli”i lagjes tonë

me feisbuk u njoh,

u martua:

me të parën u nda,

u nda dhe me të dytën

dhe lidhja e tretë i njëjti fat.

 

E para qe bionde,

nuk e deshi;

e dyta brune,

nuk e honepsi;

mulate e treta qe…

Po ta dinte, nuk e merrte.

Eh, ç’punë, eh, eh…

Loja vazhdon

në feisbuk…

Ky viç baluke lëpirë

s’ka turp…

 

 

LEGALIZIMI VETËVRASJE

 

U degraduan

mendërisht

“filozofët”, u droguan,

dhe mbjellin proçkullat…

 

“Kanabis,

“ilaç”…

Ushqim…

Bukë helm

për njerinë…”

 

Kafshët mishngrënës

qeshën e thanë:

“Pse t’i mbjellim fushat

me grurë,

me oriz,

me pambuk;

nuk duam bagëti,

djathë,

qumësht,

se biem e ra shëllirë.

 

Duam kanabis

që të rrojmë…

dhe lakuriq.

Biizz, biizz!...

 

Konkluzion dallkaukësh

pa vizion social…

 

Prapaktheu në shoqëri…

Për kanabis

legalizim,

Dialektika për njerinë

S’është më dialektikë…

 

Njeriu ha kanabis

dhe vetëvritet

duke ngrënë njerinë…

 

 

APARENCË

 

Aparencë e gënjeshtërt,

dhe nuk është realitet…

 

Është zuskë, putanë,

nga mbrenda ta shemb kalanë…

 

Në aparencë

qetësi,

siguri

siç duket

për jetën është damkë,

fallsitet!

 

Çmenduria

e imja ,

e jotja

(patollogji e kohës)

verdikt i saktë

vikërka

nga politika korruptive,

kur popullin e vet

xhvat.

 

 

MIZA E KALIT

 

Miza e kalit gudulis

neveritshëm,

s’e ka qejf

prosperitetin…

Komoditetin

e ka tek rezidenca

e vet…me erë

nën bisht…

 

 

PARA,  PAS ZGJEDHJEVE

 

Para zgjedhjeve,

politika djathtas, majtas

gjunjëzuar elektoratit

si dele:

-Popull,

lepe,

peqe!

 

-Lepe,

peqe,

Popull!

Me finokëri

duhet hedhur lumi!

Pastaj…

Pas lodhjes nga fushata

të rraskapitur

i prêt…

Rehati,

gjumi.

 

 

RILINDJA

 

Shteti me ngrehina

aspak demokratik;

Rilindje

nga themelet të ngrihet

domosdoshmërisht.

 

Rilindja, Rilindja

duhet çuar deri në fund:

mjaftë shtet rrumpallë,

mjaftë shtet harbut!

 

Arritja e konsoliduar

është tejet sukses,

sepse…bëhemi shtet.

 

 

POPULL, RUHU…

 

Politianë zevzekë

armatosur me koncepte

si lugetër,

mendojnë,

shëndoshin

prapanicën e vet…

 

Palo politikë!

Popull, ruhu

nga djajë të tillë,

të tillë vrasës

me brirë!

 

 

RADHA

 

Hallexhinjëve

u kalon koha në radhë.

Radhë, radhë që në mëngjes,

në radhë edhe unë plas

sa nuk vdes,

se edhe poeti ka hall…

Ne,

mos të presim në radhë:

ejani ju

kryetarë,

ministra,

parlamentarë,

rreshtohuni këtu,

duke pritur

t’u zenë të dridhurat

nën bark…

 

 

LAKRAT

 

Lakrat s’i ha ministri,

parlamentari nuk i ha…

Hanë ushqime cilësore

ata!

 

Lakrat i ha

Ai, (populli)

fukara.

 

 

SENTENCË

 

Padrejtësitë

rënduar

mbi fukaranë,

vjen dita,

u hanë kokën

politikanëve rrufjanë…

 

 

MEDITIM

 

Shprehje e stërlashtë:

“Dielli jorgan i fukarasë”.

 

Hëë, ka një shprehje më të re:

“Ajër e diell nuk duan lekë…”

 

Ama , edhe këtë politika

mos të na e vjelë,  se ,   pastaj,

ne vetëm të ngrohemi në…diell.

 

 

PROFECIA

 

Me Naimin

nuk desha të bëj debat:

“Ditët e mira

për Shqipërinë

paskëtaj vinë”…

 

Debat bëj me politikën,

që,   profecinë naimiane

pse kaq shumë

e zvarritën?!