Nebi Dragoti: Bisha burokracie

NEBI DRAGOTI

HAIK SATIRIK: BISHA BUROKRACIE

***

Pritja e gjatë e tmerrshme

sa ke frikë se vdes në pritje

pa takuar titullarin…

***

Ka radhë…Kudo radhë,

ti zihesh:të mbahet radhë

dhe… mbarofsh punë!

***

Pushteti,kur s’di të punojë,

sajon punë…të gjëndet në punë…

Kësisoj mënyre mbulon fiktivitetin…

***

Ministria e Arsimit pa arsim,

vjen vërdallë e s’di ç’bën.

Më mirë të jesh kalë në lëmë…

***

Etika ka vlerë filozofike,

filozofikisht ka vlerë e unifikuar

në harmonin sublime njerëzore…

***

Morali ynë është dhe morali im,

morali ynë është dhe morali yt.

Ndryshe njëri-tjetrit i nxjerrim sytë…

***

Mbledhje,mbledhje,mbledhje:

mbledhje shumë,pak punë

nga…mbledhjemëdhenjtë.

***

Mbledhjemëdhenjtë,mbledhjemëdhenjtë,

mbledhje e debate pa kriter…

Rrogën e marrin goxha qerratenjtë.

***

Zhurma e mbledhjeqejflinjëve

si zabeli djerr,

si mushka shterp…

***

Qytetari pret qeverisje,

qeverisje të mirë për vendin…

Qeveria rregullon qeveritarët…

***

Nëpër zyra ,vajmedet,

ka bisha (pa bisht)…

Bisha burokracie!

***

Shirat që mos të përmbytin,

gjatë verës duhet djersirë

ku t’i drejtosh të derdhen…

***

Mbi haik satirik

si mbi prush rrufesh

u djegt njeriu i lig!