E enjte, 19.05.2022, 08:59 AM (GMT+1)

Kulturë

Qazim Shehu: Vijë horizonti

E merkure, 03.12.2014, 07:42 PM


VIJË HORIZONTI

 

QAZIM D. SHEHU

 

Vijë e horizontit mbërdhin,

Në klithjen e një zogu;

Fshikull mbi kurriz malesh hijen shtrin,

Vetëtimë e pambrojtur.

Kush e vuri kaq të kujdesshme,

Me dritë të largët të na gënjejë,

A pamundësia e hareshme,

Malet të kapërcejë.

Shkop kërcënues në duar fati,

Dikush atë vuri,

Edhe pse bataliona fjalësh

I kthen në zogj të hutuar.?

Ndoshta për këtë është krijuar…

 

 

KAFAZ

 

Për Ezra Paund a ishte e drejtë,

Për një vajzë përse duhet,

Pse për bilbilin e të madhit Mjedë,

Kafazi thuret?

Shfryej zemërimin si në shi, përrenjtë,

Dhe s`e gjej që s`e gjej

Pse

Në kafaz të mbyllen

Të dobtit dhe të mëdhenjtë,

Liri  marrin maskarenjtë…

 

 

BREGU

 

Shpatull gjigandi që iu pre koka,

Bregu.

Ia pret valët lumit me hopa,

Nën diell teshtin.

Lumi i vërtitet, nuk e arrin,

Shpatullën e tij mitike,

Shekuj i rrëfen dashurinë,

Ai kërkon kokën që dikur kishte……

 

 

EMBLEMË

 

Emblemën që duhej të mbanim,

Na e vodhën mbretërit,

Na mbeti  vetëm emri  jonë,

Vënë nga etërit.

 

Tani s`dimë ç`të bëjmë me emrin tonë,

E ngremë me një vështrim të qorruar,

Po edhe mbretërit që  hipën në fron,

U harruan...

 

 

PORTRET

 

Ditët rrotullohen,

Vihen në radhë,

Potreti yt trishtohet,

Pulbardhë.

Në rrotullim e kam të vështirë,

Pikën të gjej ku të ndaloj,

Mund t`i radhis ditët sërë sërë,

Rrëshqjet portreti yt

Si drita që pa e parë agoi…

 

 

I LIGU

 

Brenda fjalës së mirë punon i ligu,

E ëmbëlson atë si karamele.

Në sytë e tij gjysmë të fikur,

Merr stuhi një dredhëz ere…

 

 

GJURMA

 

Mbi gjurmë të vjetra gjurmë të reja,

Rruga, libri ,mban.

Mbi një re të tretur shtrohet reja,

Për të parën duket sikur qan.

Mbi një shtresë vihet një shtresë,

Fryn era, të vjetrën zbulon.

Mendtë prej kokës të ikin për besë,

Kur për të vjetrën gjurmë e re firon…



(Vota: 2 . Mesatare: 1.5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora