Thani Naqo: Jam kosar

Thani Naqo

JAM KOSAR

Livadhin kosit nën të fundmen hënë,

Bari psherëtin fshap-fshup, fshap-fshup.

Majëdirekut të mullarit vari limën e ngrënë

Dhe gjysma e hënës m'u ul mbi sup.

Livadhin e fundit sonte kosit,

Hapësira e zhveshur më fut në trishtim.

Përçartazi flas... Nuk di ç'i mërmëris,

Gjoksbardhës nuselalë që u fsheh për dimërim.

Tehu i kosës fap-fap, fap-fup,

Fryma mpikset me klorofilin e tretur.

Gjarpëron mes yjeve një meteor, e u zhduk,

Prej syri më del një yll' i vockël, i mekur.

Hijet e dyshimeve mpreh tehu i kosës.

Ndërsa gjysma e hënës mbi sup më rëndon,

Sikur, e i verrbër, në anën tjetër të botës,

Dielli të më shohë, kur lind e perëndon...

Brymohet streha e kapelës së vjetër,

Zemra e mullarit më fal shtratin me bar.

E në ardhtë dëbora, fshehur, si dhelpër,

S’ka ç’ të më bëjë; unë jam kosar!