E premte, 29.03.2024, 12:03 PM (GMT)

Kulturë

Kalosh Çeliku: Babain e ''vranë'' në pusi

E hene, 23.06.2014, 06:55 PM


KALOSH ÇELIKU

BABAIN E “VRANË” NË PUSI

 

(Shkupi)

 

Imzot, Shkupi historik i shqiptarëve

Jo, nuk ka faj. Faj kanë dudumët,

“Shehitë”, që pinë gji Njerke si qengja

Matanë, t’i bien not Vardarit për Nesër

Edhe, mbyten në hurdha shiu. Këneta.

Megjithatë, i pavdekshëm kotet brigjeve

Rrëzë Kalasë Dardane. Pasmesnate

Zëra: O burra shqiptar, thërret Atdheu!

 

Ballë u bëri nëpër shekuj pushtuesve.

Mëkate, që ulem te këmbët e Olimbisë

Nuse pa koçi me fëmijë në gji e prehër.

Dexhalli mbi Urë,  e kërkon për Nuse!

Luftë u kam shpallur shtambave me verë

Përinat të Rrufjanit,  e Njerkës azgane.

 

Buçat, pjellin kopila, na i lënë pas porte

Bythekrye xhindet dehen në Bit –Pazar.

Valle  heqin me Dexhallin, bien “shehitë”.

 

Matanë Urës Gurit, Aleksandri i Maqedonisë

I ka hipur kalit. E ka ngritur shpatën për luftë.

Filipi Maqedonisë, grushtin si xhaxhi Enver

Ndalë: këtu është kufiri shqiptaro-shqiptar!

Para Kishës Shën Dhimitrit bëhet luftë fetare:

Mitropolitë Beogradi, kryqin e Biblën në dorë

Shejtanarapët, nateditë e shurdhojnë qiellin

Besimtarët, e  harruan Zotin, lartë mes reve.

 

Skënderbeu në Shkup, moti i ka hipur Kalit

Shpatën në brez për paqe: Ndaluni, o burra!

Car Dushani, sot nuk rrëzohet me çekiç druri.

Po, me tokmak vathe. Bythekrye, në Vardar.

 

“Komandantët” pa ushtarë  i kemi në xhami

Dehen me çaj rusi në çajtore, deri në “sabah”

Me tespihe kuqezi e ilahi e  “vrasin Shejtanin”...

 

 

(Dexhalli me trumbeta

Xhadinë merr nuse)

 

Skëndrebeu im, herët po më del gjumi

Dexhalli merr nuse me koçi, në Shkup!

Valle heq nën Rrap, ma tremb poezinë

Miken me dy shtamba verë nën hije

Nuse, ma përcjellë pas shtatë maleve.

 

Përmidis Shkupit i bie me trumbeta e valle

Tri ditë para Përmbytjes Madhe (Kiametit).

“Sehirxhive” ua vë nga një vulë në ballë…

 

 

(Lugati)

 

Ditën, gërhet keq në gjumë. Ëndërr

Sëpatën e Nuses fsheh nën setre

Shelgje sharron, cungje në Livadh.

Lisat e Babait. Çerdhet e lejlekëve

Datja, që i mbolli për Dimrin e Madh

Zjarrin ta ndezim flakë, në oxhak.

 

Natën zgjohet lugati, ecën nëpër Shtëpi

Kusi rrokullisë nëpër dhomë. Tepsi

Derën me reze, përplas para agimit.

 

Dielli, zbret pa frikë nga Baba Tomori

Poezia ime zgjohet jerm në Libër.

Vargu im, tymeflakë shkrep “nagantin”…

 

(Xhadia)

 

Xhadi, oj Kurvë! Bijë Kurve, në Shkup

Lëmën na e mbushe plot me kopila!

Gjumi, si nuk të mori për “pushtet” argati

Gji pi me kusi, te pragu i Derës madhe.

Ditënatë duke u përkundur në djep druri

Vëllai - vëllanë ta vrasë natën në gjumë.

 

Xhadi, oj Kurvë! Bijë Kurve, në Shkup

Burrë, si nuk u gjetë për ty deri më sot?!

“Nagantin” nxjerrë nga brezi, në shtrat.

 

Nusen e Dexhallit ta zbresë nga koçia…

 

 

(Ventilatori)

 

Nuk më ngroh, as nuk më ftoh

Verë e Dimër. Fryjë, nateditë!

Kotnasikoti i përplas fletët nën Rrap

Unë me vite kam vapë në Shkup.

 

Lumi nuk ka ujë. Deti pa kripë

Oqeani nuk ma shuan zjarrin.

Mikes te kroni ia thyen shtambat

Gji dua të pi! Fuqi për luftë heroike!

 

Dexhallin, e vras në mes të Bit-Pazarit...

 

 

(Rrakashtrake)

 

Mikja ime Di, vjen me dy shtamba verë

Nateditë. Ehu, më mbyti nën hije Rrapi!

Thotë: pi, o burrë! Vardari nuk ka ujë

Vargun shkrepe ditën! Natën në Shkup!

Dexhalli, ende delë sokakut me trumbeta

Valle heq halldupi, bën dasëm t’madhe

Xhadinë në Shkup me koçi merr nuse.

 

Rrapin e kam Tyrbe. Miken Di, poezi azgane

Gji më jep me dy shtamba, ngritem nga varri.

Nesër, ti nën Rrap vetëm një rrakashtrake

Kotnasikoti përpiqesh të më vësh në gjumë.

 

Rrakashtrake Bit - Pazari, lodër dum-dumi…

 

 

(Babain e “vranë” në pusi)

 

Prill, bre vëlla: sot, m’i jep tri ditë hua

Dexhallin ta shuaj me gjithë kopila!

Pranverën me lule zbres në Katund.

 

Babai zgjohet nga varri. Tymon oxhaku

Xixat i sulen qiellit mbi çati. Dielli zjarr

Nëna me sfurk, turret të dalë te porta.

Thërret, teposhtë livadhit si e marrë

Çohuni djema, Babain e “vranë” në pusi!

 

Nesër, kush do ta shalojë për Liri Atin

Sonte, në Shkup e kemi Konakun?!...



(Vota: 43 . Mesatare: 5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora