E premte, 29.03.2024, 07:09 AM (GMT)

Kulturë

Sami Sherifi: Ëndërr e madhe mërgimtare

E shtune, 26.04.2014, 04:35 PM


Sami Sherifi

 

ËNDËR E MADHE MËRGIMTARE

 

Nga Ballkani jemi nisur kësaj pranvere

Me një ëndërr të madhe gurbetqare

Dhe me strajcën e vobegtë të punëtorit

Që këtu në zemër të Europës të përvetësojmë

Alfbetin e kibernetikës

Dhe ligjin më perfid të eksploatimit

Nga Ballkani jemi nisur me trenin direkt

Që te shkojmë nga njëri metropolë në tjetrën

Me strajcën tonë të ëndrrave

Të bartim nga njëri krah në tjetrin.

Nga njëra gjeneratë në tjetrën

Më thuani ju lutem në cilin stacion të zbresim

Dhe në cilën metropolë ta varrim strajcën tonë

Plot mallëngjim dhe të kërkojë një vend të përkohshëm pune

Me cilin tren të bartim dhembjen tonë ballkanike

Nga ky kontinent në atë tejoqeanik

Nga Ballkani jemi nisur kësaj pranvere

Miku im i dashur gurbetqarë.

Bashkë me dallëndyshet ne u poqëm

Kujt t`ia rrëfejmë këto halle dhe këto vuajtje

Kush do ta kuptojë fjalorin tonë

Në ketë uzinë kompjuterësh

Ku komunikimi bëhet në gjuhën e eksploatimit.

 

(Fribourg, 1982)

 

 

RRËFIMI AD HOK

 

Më vjen që ta them një fjalë

Një rënkim shpirtëror

Që më shtrëngon frymëmarjen

Sa e sa vite

Ta them apo mos ta them

Nga thellësia po më mundon

Dhe më thotë

Shkruaje sonte dhe nxirre në dritë

Si varg apo si rrëfim

Nuk po sheh se mëmëdheu mbeti

Hartë e coptuar

Shqipëri apo Iliri

Kosovë apo Dardani e Maqedoni

Si t’i themi

Me fjalorin e politikës

Cili term i përgjigjet

Ëndrrës më të re

Për të hyrë

Në bashkimin e popujve

Të shteteve

Në Europë...

 

 

SA LARG MËMËDHEUT !

 

Sa e rëndë frymëmarja, ëndrrat, mallëngjimi

Sa e madhe dashuria përjetimi etja

Për pakë ujë burimi të fshatit, mëmëdheut

Sa i thellë shikimi në hapsirë

Kurë do të nisem për atdhe

Do ta hedh këtë varg sa më larg

Bashkë me vuajtjet e gjyshit babait

Dashurinë e djepit do ta rruaj të mbështjellur me flamur

Eh moj Nënë sa e paskemi dashur ketë tokë

Diell, Hënë dhe nënqiell mallëngjimi ilirik

 

 

VARGU ILEGAL

 

Shekujt kishin rënduar vargun e strukur

Skruar largë vendlindjes në ilegalitet

Nga ajo ditë që zbulova rrugën e panjohur

Nga pak u hutova duke zbuluar thellësinë e oqeanit

Frymëmarja mu ndërpre duke kaluar kufirin ilegalisht

Në rrugën për Montpelier që të takoj një mik

Që vinte të demonstrojë në përvjetorin e vrasjes së poetit

Po na e vranë poetin

Kitaren e kanjiushen e verdhë na e lënduan

Diellit deshën t'ia vjedhin magmën

Planetit Tokë forcën e gravitimit

Dhe të shkatërojnë yjet nga ëndrat tona

Por ne te gjithë u ngritëm

Dhe u bëmë poet mërgimtarë dhe atdhetarë.

 

 

DASHURIA DHE MALLËNGJIMI

 

Mik i dashur poet, më dëgjo

Ka ardhur koha Dashurinë ta ndajmë

Me yjet ëndrrat t’i shndërojmë në ujëvarre

Dhe vajin ta rrikthejmë në buzeqeshje vashe

Mjaft më na lënduan vargun, zemrën

Na e vranë Diellin e mëmëdheut

Si ta zbresim Hënën në lëndinë

Agun dhe ylberin ta shtrojmë në tryezën e mikpritjes

Dhe të flasim për ditët e festave të mëdha që pret mëmëdheu

Ah ëndërr e madhe, varg dhe mallëngjim shekujsh

Dashuri që vlonë e përvëlon si zjarri

Dhe më futesh thellë në palcë dhe pëlcet mu si vullkan

Si magmë dhe ujëvarre që kullon gjak Bjeshkëve të Nemura

Karadakut e Malit të Thatë

Dhe zbret në vargun tim në shpirtin e lënduar

Të fisit që akoma po pret duke ëndërruar

Lirinë e plotë të rrëfimit...

 

 

POEZIA LIND SI FËMIJA

 

Ndjenja lind

Nga brendësia e ëndrrës

Si magma që rilind

Lumenj zjarresh

Dhe shndërrohet në ujvarë

Dashurie dhe mer frymë

Po si foshnja e posalindur

Frymonë...

Qanë dhe qesh

Jeta kthehet në poezi

Të thërret si jehona në dialog

Vjen aty afër

Të përkëdhel dhe të kujtonë

Se ky është lajmi më i gëzuar

Është fjalë dhe varg

Që lind si foshnja

Dhe vetë do të flasë me yjet.

 

 

FLUTURA MA SOLLI VARGUN

 

Sonte një flutur fluturoi dhe më puthi në faqe

Më solli inspirimin

Nga një meteor zbriti më dha betimin

Pak nektar më morì

Në vargun tim më la aromë Dielli

Ma ruaj në këtë dimër më tha

Në pranverë ta kthej si buzëqeshje

Tek vargu i ri

Plotë miqësi

Plotë dashuri

 

Unë mikja ime e dashur

Për një flutur një poezi dhe një dashuri

Do të nisem të shkojë të takohem me Diellin

Fluturën do ta bej dëshmitare

Që të sjellë pak dritë vargut

Ta bëjë një lutje si falënderim

Botën ta mbështjellë me urtësi

 

 

GJALLLË POR I PRANGOSUR

 

Ishin ato kohëra

Kurë Dielli nuk prekej me dorë

Vargun bashkë me Kitaren

E Jusuf Gërvallës që e copëtuan

Shtrydhën ëndrat e rilindur

Vargun lënduan me pranga

Në Mont Blant vënduan litarin

Mes akullit dhe gjelbërimit

Sërish u rilind në mesin tonë

 

 

LYPSIT I FALA NJË VARG

 

E takova një lypës në metro të Parisit

Një tjetër më doli tek Ura e Gurit ne Shkup

Dhe i treti para bustit të Skenderbeut në Tiranë

Më folën me te njëjtën gjuhë

Me të njëjtën dorë më kërkuan lëmoshë.

 

Në Paris më kerkoi një euro

Ia fala edhe një buzëqeshje

Në Shkup më kërkoi dhjetë denar

I dhash një uratë dhe dhjetë karajfila shprese

Në Tiranë më kërcënoi dhe më tha

Mi jep dhjetë lekë se kam uri

Ia fala dhjetë lekë dhe një poezi

Që t`ia zbus zemrën dhe dhimbjen.

 

Nuk e dijë në cilën gjuhë

Më falënderuan apo më shanë

E dijë vetëm atë që asaj dite

Një dhimbje e zbuta si lutje në uratë

Dhe për një çast u riktheva në fëmijë

M’u kujtua shtëpia ime në fshat

Kur nëna ndante pogacen me lypsarë

Edhe përse tryeza jonë ngelte e zbrazur për një javë

Lypsin nuk e kthente duarthatë.

 

BOX

Sami Sherifi u lind më 15 shkurt 1950 në fshatin Sillare e Poshtme, Shkup. Pas mbarimit të Shkollës Normale "Zef Lush Marku", ushtroi detyrën si mësimdhënës nga viti 1969 deri më 1981, kur detyrohet të largohet në egzil. Diplomoi në Universitetin e Prishtinës (Dega Pedagogji, Grupi klasor). Nga viti 1969 merret me krijimtari letrare. Njihet edhe si kultivues i traditës dhe kulturës shqiptare në mërgatë. "Mallëngjim Dheu" (Commozione della Terra) është një dritë e re poetike në kalanë e kombit. Libri i tij më i ri “Shpirti”, del në Bukureshtin e rilindësve tanë.



(Vota: 14 . Mesatare: 4.5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora