Zemra Shqiptare

  https://www.zemrashqiptare.net/


Thani Naqo: Do presim mbrëmjen gjersa të bjerë

| E diele, 24.11.2013, 10:10 AM |


Thani Naqo

 

DO PRESIM MBRËMJEN GJERSA TË BJERË

 

Mbetëm dashnorë që puthen n'errësirë,

Dritës i druhemi kur puthja s'është turp.

Njëlloj, e dikur, me fshehtësirë,

Puthjet tona s'i pa kërkush.

 

Kërkush s'na e pa as puthjen e parë,

Paçka se unë kam qenë erë e stuhi.

Oqeanin trazoj e ai shfryn sot dallgë,

Oqean kam qenë edhe unë në rini.

 

Mbetëm, edhe sot, dashnorë me droje,

Dashuria, moj grua, s'është topsekret...

Ahaaa, shiko, e të tjerë, shëtisin për dore,

Ndërsa oqeani shuan dallgët në breg.

 

Hajt, çuçurisim edhe ne për dashurinë,

Ato që i kemi thënë, t'i themi e njëherë...

Si dashnorët e tjerë që puthen në errësirë,

Do presim mbrëmjen gjersa të bjerë.

 

Nëndor 2013