Elida Buçpapaj: Rinia nuk është turmë

RINIA NUK ËSHTË TURMË

 

Poemë nga ELIDA BUÇPAPAJ

 

Rinia nuk është turmë

është alfa dhe beta

është nisja dhe fillimi

pa fund

pa cak

pa kufi

pa limit

turma jemi ne

brezi i asgjësë të re

nga fronti i tranzicionit

brezi i kotësisë

i uniformitetit

i mendimeve njëngjyrëshe

njëshkollonë gatitu

që pranojmë shëmtimin

në emër të idealeve

si pritmëtarët

e përhershëm

të barbarëve

 

turma jemi ne

rinia është e kundërta jonë

rinia është lëvizja

tronditja

rebelimi

për hir të së bukurës

rinia është vetë Big-Bangu

është grimca e Zotit

është ekzistenca

materia

është kozmosi

universi

është e hëna

deri tek e diela

teoria e relativitetit

është antimonotonia

ikja nga e bardha

nga klisheja

nga banaliteti

i shëmtimit

ikja nga metoda

e realizmit socialist

nga heroi zemërçelik

që ia fali jetën kuçedrës parti

nga heroina zemërakull

që fundin e lumturisë

e gjeti në gjirin proletariatit

 

rinia nuk është turma

turma jemi ne

që vazhdojmë të brohorasim

e të ngrihemi

në standing ovation

për hiçin e hiçit

dhe hiçit i japin fytyrën

e ëndërrave tona

turma jemi ne

që vazhdojmë e flasim

me eufemizma

që tjetër flasim

e tjetër mendojmë

që flasim

krejt të kundërtën

e asaj që mendojmë

që i ngremë

përmendore

cinizmit dhe hipokrizisë

që ia shesim shpirtin

djallit

ne banorët e cirklandit

shqiptar

me një shpirt cinik

të vogël sa një gogël

dhe pastaj

krenohemi

se jemi vazhduesit

biologjikë

të Nënës Terezë!

mjerë Nëna Terezë

për bijat e bijtë e saj

 

rinia nuk është turmë

turma jemi ne

rinia është e gjitha

dhe gjithçkaja

është

barka e Noes

që Zoti

e shpëtoi

nga Sodoma e Gomorra

e fajit

për të rilindur jetën

është frymëzimi

dhe gllënjka

e frymës të fundit

për t’ia filluar nga e para

nga hiçi

është thelbi

që i ka rezistuar

të gjithë tërmeteve të kohës

inkuicizionit

diktaturave

dhe tranzicioneve

 

rinia është jepi

paqes një shans

dhe jeto sa një jetë të tërë

çdo të mijtë të sekondës

rinia është harmonia

është rezonanca

është mentori ynë

Skënderbeu

flamuri

emëruesi i përbashkët

që na bashkon të gjithëve

rinia është bota që shohim

sa hapim sytë

në zanafillë

është drita për të parë

gjithçka sa dalim nga tuneli

i territ kur njeriu beson

verbërisht

 

rinia është e bukura

e mira

e drejta

e vërteta

e dlira

e pastra

shpresa

e pacënueshmja

e paprekëshmja

është kushtetuta

e një vendi demokratik

ku qytetarët

jetojnë të lumtur

me djersën e ballit

është shteti i së drejtës

i barabartë

për çdo qytetar të tij

 

rinia nuk është turmë

turma jemi ne

rinia është e kundërta jonë

antiteza jonë

që e lamë fatin në duar eunukësh

dhe të shpirtqenëve

si thotë populli

për ata që kanë zift

në vend të shpirtit

 

rinia vuan për ata që vuajnë

rinia nuk pran së vuajturi

për t’i dhënë fund

vuajtjes

në emër të botës

më të mirë

 

rinia nuk është turmë

rinia është pranverë

përherë që i shkrin ngricat

e indiferencës njerëzore

rinia të ngre zemrën peshë

rinia të bën të besosh prapë

të ngrihesh prapë

në këmbë

që t’ia rinisësh nga e para

rinia të merr me vete

kudo që ajo shkon

sepse e ka me vete lirinë

shikoni se me çfarë asonance

magjike tigëllon rini-liri

sepse liria është vetë ajo

rinia

rinia është fati i një kombi

është fatthënësi dhe fatbërësi

i tij!