Hetimet e vrasjes së Azem Hajdarit i ka bllokuar dhe po i bllokon Sali Berisha

Heroi i Demokracise Azem Hajdari

Ish-prokurori nga Gramshi, që ka hetuar dosjen e vrasësve të deputetit demokrat Azem Hadari, zoti Violent Çoniku, rrëfen për gazetën gjithë odisenë e trajtimit të saj dosjeje krimi e cila deri tani, nuk duket se i ka hapur të gjithë "fletët e zeza", por vjen koha që gjërat nuk fundosen dhe rikthehen në vëmendjen e opinionit, për rrjedhojë edhe të drejtësisë e cila duhet të nis veprimet e reja hetimore, për të zbardhur të vërtetën ashtu siç është e jo ashtu siç është servirur në proceset gjyqësore të zhvilluara.

Kur keni patur kontaktin e parë me dosjen "Hajdari"?

Në tetor të vitit 2002, jam ngarkuar me urdhër të prokurorit të Përgjithshëm Theodhori Sollaku, për t'u paraqitur dhe për të dëshmuar në Komisionin Parlamentar Hetimor të cilësuar "Klosi", i cili kishte në trajtim dosjen e vrasjes së Azem Hajdarit. U paraqita në këtë komision parlamentar dhe jam përgjigjur për çdo pyetje, të drejtuar prej ish-anëtarëve të këtij komisioni, si Bashkim Fino, Mustafa Muçi, Gazmir Bizhga, Spartak Ngjela, Fatos Beja, Edi Paloka etj, të cilët kanë kërkuar informacion nga ana ime, të cilat kishin lidhje me një çështje, që unë kisha hetuar si prokuror në Gramsh, në lidhje me dy të arrestuarit Isamedin Haxhia dhe Halil Haklaj, të cilët ishin arrestuar në 17 korrik 1998, "për trafik armësh". Këto emra, më pas rezultoi se kishin lidhje me vrasjen e Azem Hajdarit. Për këtë edhe u thirra në komisionin parlamentar. U jam përgjigjur gjithë pyetjeve, në përputhje me dosjen hetimore që kisha përgatitur për ta, në lidhje me arrestimin e tyre, për trafikun e armëve.

Cili ishte qëndrimi dhe konkluzioni i anëtarëve të komisionit Parlamentar pas përgjigjeve tuaja?

Përgjigjet e mia, konstatova se ndoshta nuk i pëlqyen askujt, mbasi ishin dëshmi që kishin lidhje me një problem madhor, që të çonin në vrasjen e Azem Hajdarit, për të cilin, me sa kuptova, ata ndaj dhe nuk dhanë asnjë konkluzion, madje nuk kam asnjë raport të tyre në lidhje me vlerësimin e dëshmive të mia, që në fakt e njeh ligji për të më pajisur, për më tepër, që unë nuk jam dëshmitar i ngjarjeve, por një prokuror, që kam përgatitur dosjen në fjalë.

Në ç'drejtim orientoheshin pyetjet që ju bënë deputetët e komisionit hetimor?

Pyetjet nisën për dy të arrestuarit Isamedin Haxhiaj dhe Halil Haklaj, rreth dosjes hetimore me nr.106, korrik 1998, persona të cilët akuzoheshin "për trafik armësh" dhe më pas, sipas ngjarjeve dhe akuzave, akuzoheshin për vrasjen e Azem Hajdarit. Konktretisht, deputeti Spartak Ngjela, më ka paraqitur në komision një dokument, të cilin e kishte tërhequr nga prokuroria e Përgjithëshme, me autorizim të ish-prokurorit të Përgjithshëm Thoedhori Sollaku, dokument që përmbante një informacion të dërguar nga SHISH, firmosur nga ish drejtuesi i Fatos Klosi, në të cilin përcaktohej, se (unë) prokurori i Gramshit Violent Çaniku, kisha arrestuar dy shtetas dhe konkretisht zotërinjtë Isamedin Haxhia dhe Halil Haklaj, pasi sipas atij dokumenti, "më kishte telefonuar i ndjeri Azem Hajdari për t'i arrestuar".
Ky dokument besoj se gjendet në prokurorinë e Përgjithëshme, në SHISH dhe në Komisionin Parlamentar, dokument të cilin ma kishte zënë në gojë shoqërisht edhe ish-prokurori i cështjes Hajdari, zoti Haxhi Giu, por që na atë kohë, nuk i kushtova rëndësi. Kur u ballafaqova në komisionin Parlamentar, këtë dokument ma paraqiti deputeti Spartak Ngjela, ish-kryetar i komisionit hetimor Parlamentar, të pagëzuar "Komisioni Klosi".
Zoti Ngjela, më pyeti me këmbëngulje: A është e vërtetë kjo që thotë SHISH në këtë informacion? A qëndron fakti, që Azemi të ka dhënë porosi për të arrestuar Haxhinë dhe Haklajn. Përgjigja ime ishte kjo: Ai informacion është një trillim i SHISH dhe Azem Hajdari, nuk më ka zënë në gojë emrat e tyre asnjëherë. Më pyetën dhe anëtarët e tjerë, të cilët interesoheshin për arrestimin e tyre dhe nëse kishte ndonjë ndërhyrje, për t'i liruar nga burgu, madje Bashkim Fino më tha, se "kishte përgatitur 100 pyetje, por që nuk m'i bëri, mbasi më tha se i kuptova gjërat". Por zoti Fino, më bëri një pyetje për Fatos Klosin, duke u interesuar "nëse gjendej, apo jo në Gramsh dhe a ka ndërhyrë tek ju, për t'i liruar". Unë ju përgjigja: Fatosi ka qënë në Gramsh në datën 24 gusht 1998, kur dy personat ishin në burg, por nuk më ka kërkuar lirimin e tyre. Po në atë datë dhe në atë orë, ka qënë në Gramsh edhe ish-ministri i Drejtësisë, Thimjo Kondi.

A keni patur kontakt me zotin Thimjo Kondi atë ditë?

Nuk kam patur asnjë kontakt, madje as përshëndetje me të. Ai shkoi në gjykatën e rrethit Gramsh, që ishte një kat më poshtë prokurorisë. Unë nuk e di se çfarë bisedoi, por di faktin, që procesi gjyqësor i Haxhiajt dhe Haklajt, ishte caktuar nga gjyqtarja e çështjes Brundilda Çarçiu në datën 20 tetor 1998. Pas ardhjes dhe ikjes së Thimjo Kondit në gjykatën e Gramshit, data e gjyqit ndaj tyre u afrua dhe u caktua në datën 4 shtator 1998, seancë në të cilën, si Isamedin Haxhiaj dhe Halil Haklaj, befasisht dhe në mënyrë të papritur u liruan.

Sipas jush, cili ishte motivi i lirimit të tyre?

Nuk u dha asnjë shpjegim në seancë, por lirimi i tyre u motivua me faktin, që armët ishin në qarkullim të lirë për gjithë shqiptarët [as hapjes së depove në vitin 1997 dhe kështu, sipas vendimit të gjykatës, ata u dënuan vetëm me kohën e paraburgimit. Madje pati edhe kujtesa, që "të mos merret më askush me këtë çështje".

Ju keni patur ndërhyrje për lirimin e tyre?

Këtë pyetje ma ka bërë komisioni Hetimor Parlamentar dhe unë dëshmova, që kisha një ndërhyrje, por jo nga SHISH, veçse nga Izet Haxhia, vëllai i Isamedin Haxhiajt, ish-buodigardi i Sali Berishës, i cili dihet, që në ato kohë fliste në emër të "doktorit", por që nuk ndikova fare në lirimin e tyre, madje ai as këmbënguli më tej pas refuzimit tim. Ata janë liruar, siç e thashë më sipër, pas ardhjes në gjykatë të ish-ministrit të Drejtësisë Thimjo Kondi. Unë di, që ata u liruan, por se cilët e kishin bindur, apo urdhëruar Thimjo Kondin që t'i lironte, këtë e di vetëm ai, ndoshta nga njerëz të fuqishëm të pushtetit, të parlamanetit dhe shërbimeve speciale shtetërore. Unë kam bërë vetëm hetimin e tyre, ndërsa arrestimin e ka bërë prokurori i rrethit Gramsh.

A e ka patur dosjen e tyre, Komisioni Hetimor Parlamentar?

Ajo dosje është përgatitur nga mua dhe më pas, më kanë thënë, se nuk egziston më, mbasi sipas informacioneve, këtë dosje e kishte marrë SHISH.

Ç' lidhje ka lirimi i tyre, me vrasjen e Azem Hajdarit?

Besoj se lirimi i tyre ka lidhje me vrasjen e Azem Hajdarit, mbasi ata që i liruan, pra jo zbatuesi i urdhërit të lirimit të tyre, ish-ministri Thimjo Kondi, por të tjerë më të fuqishëm se ai, janë akuzuar nga Sali Berisha, si vrasësit real të Azem Hajdarit, të cilët do të vijë dita, që patjetër do të publikohen. Ata u liruan në datën 4 shtator 1998 dhe u liruan me porosi nga "lartë". Sipas dokumentit të SHISH, që m'u paraqit në komisionin Hetimor Parlamentar, thuhej që "këta i kishte arrestuar një porosi e Azem Hajdarit, e cila sipas atij dokumenti, më ishte dhënë mua prej Azemit". Ky dokument, u ishte bërë i ditur dhe dy të arrestuarve Haxhiaj dhe Haklaj të cilët e kishin, madje siç më kanë deklauar gjatë hetimeve, janë nxitur për të krijuar konflikt me Azem Hajdarin e për t'u hakmarrë ndaj tij. Pas këtij lirimi të tyre, ndodhi vrasja në 12 shtator 1998, vrasje për të cilën u arrestua Isamedin Haxhiaj dhe miku i tij Fatmir Meta, si dhe u akuzua Halil Haklaj, i cili u vra në 4 gusht 1999, përpara se të bëheshin arrestimet për vrasjen e Azemit.

Cilët kanë dijeni përveç komisionit Hetimor Parlamentar, rreth informacioneve që keni ju në lidhje me vrasjen e Azem Hajdarit?

Për dëshminë që dhashë në komisionin hetimor Parlamentar, kam vënë në dijeni zotin Sali Berisha, i cili e ka dëshminë time shumë kohë më parë, se të vija në komision, ose më saktë, që në muajin gusht 1999. Ai i ka të gjitha letrat dhe dëshminë time. Sali Berisha i di të gjitha faktet dhe është e drejta e tij, nëse do t'i bëjë publike dhe nëse do të kërkojë, ose jo rihapjen e çështjes së vrasjes së Azem Hajdarit.
Ju konfirmojë, se përpara se të shkoja në komision, pra 1 javë më parë, kam shkuar përsëri tek Sali Berisha, i thirrur prej tij, kur isha prokuror në Pukë, duke më njoftuar nëpërmjet sekretarit të PD Pukë, i cili më erdhi në mes të natës në shtëpi dhe më tha, se "e kishte njoftuar Edi Paloka, që të paraqitesha urgjent tek "doktori" në Tiranë". Kur shkova tek Berisha, ai më tha: Këto ditë do të jesh në komisionin Hetimor Parlamentar. Thuaj ato që më ke thënë mua dhe deklaro të vërtetën, që Fatos Klosi dhe Thimjo Kondi kanë qënë në Gramsh dhe më pas, janë liruar Isamedin Haxhiaj dhe Halil Haklaj.

Si vijoji biseda më tej me Sali Berishën?

Është një bisedë që do ta bëjë publike në vazhdim në gazetën tuaj. Por mund të them, se unë kam bërë shumë takime me Berishën për çështjen e Azem Hajdarit dhe Berisha e dinte, që unë isha mik personal i Azem Hajdarit, por që asnjëherë nuk më ka kërkuar veprime ndëshkuese për asnjë e jo më arrestim të Haxhiajt dhe Hakljat. Unë i kërkova Berishës, të hapet dosja e Azem Hajdarit dhe ai më tha: "Kur të vijmë në pushtet do ta hapim, por këto që ke biseduar me mua, mos i bisedo me askënd dhe mos i jep askujt asnjë letër". Këtë hapje dosjesh po e kërkoj prej tre vjetësh pas ardhjes në pushtet, por Berisha nuk reagon. Tani, mendoj se duhet të veproj Prokurorja e Përgjithëshme e republikës, zonja Ina Rama.

Ja kush është ish-prokurori i dosjes "Azem Hajdari", Violent Çoniku

Jam me profesion jurist. Kam patur funksionin zyrtar të prokurorit të rrethit Gramsh, në vitet 1995-1998. Jam larguar nga kjo detyrë në 16. 06.1998, pas një transferimi që më propozoi prokuroria e Përgjithëshshme. Pas urdhrit të transferimit, nuk më liruan nga detyrua si prokuror,. Por më lanë me detyrë prokuror sektori, po në rrethin e Gramshit. Më pas, më i kërkohet nga shefi i personelit të Prokurorisë së Përgjithëshme, Kasëm Berberi, që të jap dorëheqjen, duke më lënë në tavolinë një letër të bardhë, të cilën duhet ta shkruante me dorën e vetë, ku të deklaroja "dorëheqjen e vullnetshme". Mbasi kjo nuk u pranua nga ana ime, sipas skëmës së tyre, në vitin 2001 transferohem, prokuror në Pukë, emërim të cilin e zbatova, ku qëndrova deri në 16 qershor të vitit 2003, datë kur më shkarkojnë nga kjo detyrë. Në vazhdim, ushtrojë profesionin e avokatit në Tiranë.

Numrin ardhshëm do të lexoni:

Dosja hetimore nr.106 e arrestim-lirimit të Isamedin Haxhiaj dhe Halil Haklaj
Bisedat e pa protokolluara, të bëra nga prokurori me ta, në burgun e Elbasanit
Ardhja e Thimjo Kondit dhe e Fatos Klosit në Gramsh dhe takimet e bëra atje
Transferimi në gjykatën e Lartë, i gjyqtares që shpejtoi datën e gjyqit dhe lirimin e tyre, me urdhër të Thimjo Kondit, emëruar këshilltare e tij
Ngritja në detyrë si prokorur i Apelit Durrës, i prokurorit që arrestoi Haxhiajn dhe Haklajn.
Bisedat e zhvilluara me Berishën në Selinë e PDSH, për vrasjen e Azem Hajdarit dhe faktet që i janë dhënë atij
Si e inicoi Vili Minarolli, takimin e prokurorit, me Sali Berishën në vitin 1999?