E enjte, 22.04.2021, 12:58 PM (GMT+1)

Kulturë » Berisha

Sejdi Berisha: Sa shumë gjëra kishin ndërruar...!

E enjte, 13.06.2013, 07:22 PM


P o e z i

 

Sejdi BERISHA

 

SA SHUMË GJËRA KISHIN NDËRRUAR…!

 

1.

Para se të shkoj në odën e burrave

U përshëndeta me nënën

Natën e mirë më tha

E putha në të dy faqet

Në sytë e saj m’u shtang shikimi

 

2.

Atë natë

Luajtëm kapuçash deri vonë

Me vëllezër e me mysafirë të dashur

Plisin e babait e vura në kokë

Për t’i treguar atij rrugën që ndjek

Motrës ia kërkova një tas ujë

Nga burrelja prej pishe

Pas pites që e kishte gatuar gjyshja

Me duart e motmoteve

Në prehër e ula nipin dhe i thashë

Dëgjo si këndohet malësorçe

Ai vetëm më shikonte

Duke m’i puthur faqet

 

3.

Ishte bërë vonë

Gjelat kishin filluar të këndonin

Për t’u zgjuar në ditën e re

Në odë tani mbretëronte qetësia

Nesër dielli do ta ngrohë tokën

 

4.

Zgjohemi herët

A i keni bërë gati shytnit

A i keni cokatur kosat

Babai i pyeti meshkujt e shtëpisë

I cili përpara kishte kutinë e bakfonit

Edhe kamishin prej qelibarit

Atëherë shkojmë ta lusim gjumin

Për pak pushim

 

5.

Në odë kishte ngelur tymi i duhanit

Nga loja kapuçash

Kishte bërë mjegull pluhuri i cergave

Era e gazit të llambave

Kishte mbetur vërdallë duke u sjellë

Në odë shëtiste

Edhe një grimë erë e pites me mazë

Dhe urata për gjumin e ëmbël

 

6.

Në mëngjes

Një ëndërr e llahtarshme më zgjoi

Sa shumë kohë kishte kaluar

Sa shumë gjëra kishin ndërruar...

Sa shumë gjëra kishin ikur

 

7.

Në dhomë pushka e varur buzë oxhakut

Përskaj një grimë rrjete merimangash

Në varësen tjetër plisi i bardhë

Në gozhdën plotë ndryshk

Çiftelia me tela pa akordim

Edhe mestet me të cilat kapuçash luanim

 

8.

U solla rreth e rreth e vetes

E preka mjekrën edhe këto pak flokë

Thinjat më kishin kapluar

 

9.

Ç’bëra kështu

Asgjë

Ngela në kërkim të pyetjes

Por hapat

Tunxh m’i kishin bërë këmbët

Ëndërr e keqe, apo jo...

O, vargu im i lodhur nga unë



(Vota: 35 . Mesatare: 5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora