Shtesë » Lajme
Dren Shahini: Hapini letrat
E merkure, 22.05.2013, 06:55 PM
Letër e
hapur Valdete Dakës
HAPINI
LETRAT
Këto ditë
jo rrallë na bie të dëgjojmë lajme që lidhen me Komisionin Qendror të
Zgjedhjeve. Lajme që në qendër kanë
dyshimin, natyrisht. Lajme rozë, do t’i quaja unë. Rozë, sepse “martesa të
lumtura” ndodhin në këtë institucion. Martesa këto ndërmjet anëtarëve të pozitës e opozitës, ku të parët mjaftohen
me heshtjen e të dytëve, ndërsa të dytët me pak para. Natyrisht, kundërligjshëm
dhe në dëm të buxhetit të shtetit. Vlen të theksohet se “ofiqari” i kësaj
“martese”, pra, zyrtari ligjor, në momentin e votimit e ka tërhequr vërejtjen
se ky veprim është ligjërisht i padrejtë. Votimi është bërë dhe znj. Daka, si
udhëheqëse e këtij institucioni, e ka miratuar atë në dëm të buxhetit të
shtetit.
Zonja
Kryetare e KQZ-së në një intervistë këto ditë
bën thirrje për respektim ligji!
Si mund
t’ia tërheqësh vërejtjen dikujt për respektim ligji, kur vetë e shkel atë!!?
Pikërisht
këtë po e bën KQZ-ja përmes kreut të saj, znj. Valdete Daka. Ajo po u bën
thirrje liderëve të partive politike ta respektojnë ligjin mbi zgjedhjet dhe
rregullat zgjedhore, por edhe kodin e mirësjelljes. Madje tha se nëse do të
ketë thyerje të rregullave zgjedhore dhe shkelje të ligjit, normalisht se do të
ketë edhe ndëshkime.
Marr
shkas nga kjo, për t'iu drejtuar publikisht kryetares së KQZ-së, me këtë letër të hapur:
Kryetares
së Komisionit Qendror të Zgjedhjeve, Znj. Valdete Daka:
Zonja
Kryetare e Komisionit Qendror të Zgjedhjeve,
Prej
kohës së certifikimit të rezultateve nga
zgjedhjet e kaluara, subjekti politik Lëvizja për Bashkim nuk e gëzon të
drejtën për financim nga Fondi për mbështetjen e subjekteve politike, Fond ky
për financimin e subjekteve politike përmes Buxhetit të Republikës së Kosovës,
i cili funksionon në kuadër të Komisionit Qendror të Zgjedhjeve. Këtë të drejtë
na e ka mohuar institucioni që ju e udhëhiqni. Për ju dhe për opinionin po e
citoj Nenin 9, nga Ligji për Financimin e Subjekteve Politike:
Ndarja e
mjeteve financiare publike
1. Për
financimin e aktiviteteve të rregullta të subjektit politik, mjetet nga Fondi
për mbështetjen e subjekteve politike ndahen në mes të subjekteve politike të
përfaqësuara në Kuvend në bazë të numrit të ulëseve për atë mandat.
Lëvizja
për Bashkim është subjekt politik dhe është e përfaqësuar në Kuvendin e Kosovës
me dy deputetë dhe Kuvendi i njeh dhe i trajton si të tillë. Duke iu mohuar kjo
e drejtë nga KQZ-ja, subjektit politik Lëvizja për Bashkim po i ndalohet edhe
financimi i aktiviteteve të rregullta në zhvillim të subjektit dhe
demokratizimit të tij, për çka edhe ndahen këto mjete.
Mohimi i
së drejtës për subjektin politik Lëvizja për Bashkim ishte rasti i parë i
shkeljes së ligjit. Dhe rasti i dytë ka të bëjë me atë se çfarë ju si
institucion trajtoni si subjekt politik në kundërshtim me ligjin. Cili është
qëllimi i ekzistencës së Ligjit për Financimin e Subjekteve Politike?
Neni 1 i
këtij Ligji thotë:
Qëllimi
Ky Ligj
rregullon mënyrën, kushtet e financimit, administrimin, mbikëqyrjen,
transparencën dhe raportimin për shpenzimin e pasurisë dhe të ardhurave të
subjekteve politike në Republikën e Kosovës
Pra,
ligji po përcaktuaka kushte në të drejtë financimi. Nuk di në ka kusht më
esencial për të fituar të drejtën e financimit nga ky Ligj sesa të ekzistuarit
si Subjekt Politik! Znj. Daka, për ju dhe përsëri për opinionin po e citoj
Nenin 19 dhe 40 të Ligjit për Zgjedhjet e Përgjithshme në Republikën e Kosovës.
Neni 19
Nisma
qytetare
19.1
KQZ–ja e trajton nismën qytetare si subjekt politik nga dita e certifikimit të
saj deri sa nisma qytetare të dorëzojë raportin përfundimtar të Publikimit
Financiar të Fushatës.
19.2 Secili
kandidat i certifikuar i listës së nismës qytetare është personalisht
përgjegjës për ndarje të barabartë të gjobave të ngarkuara mbi nismën qytetare
nga KQZ-ja apo KZAP-i.
Neni 40
Kërkesat
për Deklarim Financiar
Raporti i
Publikimit Financiar për Fushatën dorëzohet jo më vonë se dyzetë e pesë (45)
ditë kalendarike pas ditës së zgjedhjeve.
Pra,
ligjërisht, nisma qytetare nga ju, nga KQZ-ja, do të duhej të trajtohej si
subjekt politik vetëm 45 (dyzetepesë) ditë nga dita e zgjedhjeve! Madje, neni
pasues i obligon si personalisht përgjegjës kandidatët e certifikuar mbi gjobat
e ngarkuara; natyrisht, sepse neni më sipër tregon qartazi mbi shuarjen e
nismës si subjekt politik.
Kjo është
shkelja e dytë, znj. Daka! Shkelje në dëm të subjektit politik Lëvizja për
Bashkim dhe më keq se kaq, në dëm të buxhetit të Republikës së Kosovës. Në dëm
të subjektit politik Lëvizja për Bashkim, sepse paratë e këtij subjekti
padrejtësisht dhe jo ligjërisht po i adresoni tek një nismë qytetare që
jashtëligjshëm ju e trajtoni si subjekt politik, dhe në dëm të buxhetit, sepse
nisma qytetare në fjalë, që ju jashtëligjshëm e trajtoni si subjekt politik,
përfiton 2.800.000 euro për një legjislaturë. Shkelje bëni edhe kur me vendim
për ndarje të mjeteve materiale këtë Nismë e trajtoni si parti politike, e në
regjistrin e partive politike nuk figuron kjo Nismë Qytetare që quhet “Lëvizja
Vetëvendosje!”. Shkelje bëni edhe kur këtë Nismë Qytetare ju e financoni
padrejtësisht për 14 deputetë, e në fakt edhe ata vetë e pranojnë se janë vetëm
12! Ndërsa subjekti politik Lëvizja për Bashkim që nga viti 2007 është
regjistruar në institucionin tuaj, dhe megjithëse është i përfaqësuar në
Kuvend, ju padrejtësisht ia mohoni të drejtën për financim nga Fondi. Pra, si
të besojnë qytetarët në këtë institucion? Cili është legjitimiteti juaj para
Kuvendit? Çfarë zgjedhjesh dalin të organizuara nga ky institucion i “pavarur”,
i cili nuk e respekton Ligjin? Cila është besueshmëria e atyre zgjedhjeve të
organizuara nga ju?
Mund të
duken disa pyetje, znj. Daka, mirëpo realisht është vetëm një! Duke e ditur se
politikisht jeni neutrale dhe në këtë institucion keni ardhur nga gjyqësori, a
mund të gjykoni drejt: është shkelur apo nuk
është shkelur Ligji në këtë rast?!
Dren Shahini,
Zëdhënës
i subjektit politik Lëvizja për Bashkim.
Prishtinë,
22.5.2013