| E shtune, 11.05.2013, 12:00 PM |
Tadiç në Shkodër, Erdogani në Kukës dhe grekët pas varrezave në jug!
Nga Elvi Sidheri
S’jam unë
i pari të nderuar miq lexues, ai që po shkruan lidhur me vizitën famëmadhe të
ish-presidentit serb në qytetin më të njohur, kulturuar e të lashtë të veriut
tonë.
Kjo gjë
dihet!
Por
gjithësesi jam akoma i habitur sesi dhe përse nuk u gjend ndonjë shkodran që
turispecit serb në fjalë, nuk ia plasi me ndonjë vezë ose domate të prishur në
fytyrë atij vetë dhe për më tepër atyre që këtë njeri e kishin ftuar si
“kumbarin” e martesës së tyre të rradhës politike.
Se me
çfarë merren mes vedit dhe çfarë po ashtu bëjnë brenda suazave të marrëveshjeve
të tyre politike
Pra nuk
është problemi im që ata të kalojnë përmbi kufoma post-revolucion janari etj, politika
nuk ka ndërgjegje e aq më pak skrupuj dhe herët a vonë edhe Shqipëria jonë këtë
gjë do të duhej t’a kuptonte e tashmë besoj se jo vetëm për këtë shkak primar, shqiptarët
nga gjumi i idealizmit duhet të jenë zgjuar përfundimisht.
Nuk e kam
këtu punën unë jo!
As listat
partiake në KQZ, as deputetët e hedhur sa nga njëri krah tek tjetri...nuk më
“hyjnë në qese” fare dhe lojërave të ndryshme sido që të jetë normale politike
me kollotumba dhe pirueta të momentit të fundit para afateve të regjistrimit
parazgjedhor, nuk “ua var teneqen” ndërkohë.
Unë nuk
hyj në shtresën e ngushtë, por tejet të rëndësishme të të pavendosurve të cilët
duhen bindur lidhur me drejtimin vendimtar që do të marri vota e tyre ende pa
krah të përcaktuar...në ditën e zgjedhjeve, prandaj edhe këto manovra si dhe
gjithëçfarë metodash politike në kërkim balancash votimi e votuesish, s’kanë
lidhje me mua.
Por
z.Tadiç që vjen të “bekojë” një çfarëdo lidhje politike shqiptare, m’i ngre
nervat në një mënyrë të atillë... sa po e patët parasysh ndonjë karton animat
nga ato me Tom & Jerry-n për shembull, edhe mua në këtë rast ashtu më bëhet,
pra më kërcen kapaku i kokës lart nga avujt e acarimit dhe irritimit!
S’ka
rëndësi në parim se cila parti atë e ka ftuar, por vetë fakti që ky njeri vjen
qetësisht, pa ia bërë syri tërrt...në rolin e babait të mirë që po i pajton dy
politikanë shqiptarë në mëri të thella midis tyre.
Dhe mbi
të gjitha ku e gjejnë t’a sjellin personazhin në fjalë???
Në
Shkodër e ku tjetër!!?
Ku më
mirë se aty do të bëhej kuptimplotë një vepër bastarde e këtij niveli të denjë
për gjirizet më të ndotura të kanaleve të ujërave të zeza nëpër të cilët rrjedh
limfa jetësore e së ashtëquajturës politikë bashkëkohore shqiptare apo siç kanë
dëshirë t’a quajnë tani politikëbërësit tanë duke e livandosur pak me
europianzëm nëpërmjet fjalës italiane (pra perëndimore)...pra “kontemporane”!
Partisë
së 1941-shit nuk i del inati dhe shumë më tepër se aq me Shkodrën, për fat të
keq po aq sa edhe serbëve të cilët atë parti e patën krijuar 72 vjet më parë
(të mos harrojmë dhe të gjejmë sërish rastin tashmë për të “falenderuar”
marshallin Tito për këtë nder të madh që na ka bërë falë emisarëve të tij
largpamës Dushan Mugosha, Miladin Popoviç dhe Svetozar Vukmanovoç Tempo)...nuk
i del nepsi dhe uria e pashuar po ashtu gjithmonë po për Shkodrën tonë.
Pra që
shqiptarë dhe serbë të bashkohen për diçka, në një dëshirë ose mllef të
përbashkët, nuk është pak sidoqoftë, lëre më pastaj kur këtë e bëjnë publikisht,
ditën për diell ashtu siç edhe ndodhi pak kohë më parë në Shkodër, kur dy
peshat e rënda të së majtës sonë, firmosën paqen (e armatosur) mes tyre nën
shikimin hetues dhe aprovues, përveç të ca majtistëve të tjerë pa rëndësi të
veçantë nga Europa...edhe të zotit Boris Tadiç, pra ish-presidentit të shtetit
serb.
Do pyesja
unë veten retorikisht në këtë moment, ore po si do i bëhej po të ndodhte
saktësisht e njëjta gjë në një rast të ngjashëm në Serbi?
Ja të
themi se do realizohej një takim publik i dy “X” dhe “Y” partish serbe dhe atje si kumbar i rastit të
qe ftuar askush tjetër përveç zotit Meta, Rama apo të themi Gjinushi nga ne!
Të themi
edhe se evenimenti në fjalë do të ishte t’a zëmë pajtimi midis Daçiçit dhe ku e
di unë...Nikoliçit të cilët do të qenë zënë për ndonjë shkak dhe për këtë arsye,
si zgjidhje të divergjencave të pasheshueshme mes tyre, atyre nuk do t’u kishte
mbetur mënyrë tjetër, veçse të thërrisnin “kaskat blu” të së majtës shqiptare, zjarrëfikësit
e përleshjeve dhe kacafytjeve ndërserbe, pra politikanët tanë më të spikatur
nga krahu i majtë.
Do ia
behnin në ndonjë sallë pritjeje të njohur beogradase, kryetarët e së majtës
tonë dhe aty do të uleshin për shtatë palë qejfe tek poltronat më të mira të
llozhës si të parët e vendit dhe do të ndiqnin me vështrime “prindërore” skenën
pajtuese mes kolegëve të tyre politikanë serbë, të cilët do të kishin vendosur
që të ulnin sëpatën e luftës, për të bërë paqe midis tyre nën këshillimin e
mençur lidhur me diçka të tillë, nga të majtët shqiptarë!
Që kjo
gjë eventualisht realisht të ketë mundësi të ndodhi me të vërtetë...ka po aq
shanse sa edhe që sot brenda ditës...fiks si tek filmi “Planeti i majmunëve”, shimpanzetë
dhe babuinët, bashkë me gorillat, pas një evolucioni mendor 24 orësh, të
zbresin nga pemët, të dalin nga xhunglat e lagështa dhe të shqyejnë varganët e
robërisë nëpër kopshte zoologjike e të mësyjnë qytetet e njerëzve për të marrë
pushtetin në botën e civilizuar.
Të dyja
këto gjëra pra janë thjesht absolutisht të pamundura!
Sepse po
qe se politikanët tanë, të majtë apo të djathtë do të ftoheshin ose do të venin
me iniciativën e tyre me qëllim që të pajtonin publikisht kolegët e tyre serbë,
por edhe grekë ose sllavë maqedonie, atëherë aty do të ndodhte asgjë tjetër
përveç një apokalipsi të mirëfilltë.
Pra kjo
do të thotë se do ngriheshin “me kuç e me maç” nga janë e nga s’janë, të tërë
nacionalistët e mundshëm serbë, grekë ose sllavë maqedonie dhe do t’a digjnin
sallën ku do të ishte duke ndodhur ky pajtim nën “diktatin” shqiptar...megjithë
politikanët vendas dhe të huaj (edhe këta të tanët pra) brenda.
Pajtimi
nuk do të bëhej kurrë dhe po të kishin qenë Daçiçi me Nikoliçin në vend të
kryesocialistit dhe kryesocialistit në lëvizje të integruar shqiptar, atëherë
nacionalistët e thekur të vendit të tyre, ata do t’i kishin djegur, pjekur e
kaluar në hekur porsi shishqebapin mbi prush...pra të skuqur të gjallë si
pasojë e një loje të tillë.
Kurse tek
ne, si dhe çdo çudi tjetër, edhe kjo vajti e firoi pa bërë shumë zhurmë për pak
ditë dhe aq!
E ç’bëri
një Tadiç më shumë apo më pak, në Shkodër apo jo fundja?!
Sikur
çfarë të ketë ndodhur vallë, pse nuk erdhi edhe Mërkiçi, që duke bërë
“mërr-mërr” me fytyrë të murrëtyer i këpuste dokrrat njërën pas tjetrës edhe
përgjatë konferencës për shtyp me kolegun e tij pritës shqiptar brenda në
Tiranë, kur thoshte se genocidi na qenkërka fjalë e padrejtë për atë që
historikisht serbët kanë bërë kundër, mbi dhe ndaj shqiptarëve, sepse ja edhe
ata të ngratët genocid na paskërkan provuar mbi lëkurën e tyre!
Kur e
hoqën këtë genocid mbi kurriz serbët se sadoqë të përpiqem nuk po e gjej dot?
Kur vranë,
përzunë, prenë në fyt, çanë barqet e nënave për të çpuar fëmijët me bajoneta e
dogjën të gjallë në pragje shtëpish, furra apo fusha shqiptarët?
Kur i
plehëruan tokat shqiptare me gjakun e njerëzve tanë dhe kockat e tyre të
pafajshme, apo kur i mbushën liqenet e tyre me mbeturina trupash të masakruar
shqiptarësh?
Kur
shfarosën brenda një dite të gjithë burrat e Srebrenicës...(se çfarë bënin dhe
abuzonin në të njëjtën kohë me gratë dihet, si aty, aq edhe në Kosovë ose
Kroaci)?
Kur po
vrisnin një nga një edhe të plagosurit apo të sëmurët që s’kishin ikur dot
akoma nga spitali i Vukovarit, apo kur se jam paksa i paqartë lidhur me këtë
aspekt?!
Ah po, po
qe se Mërkiçi e quan genocid mbi serbët, vrasjen në luftë të mijëra serbëve
gjatë rrethimit të dështuar të Shkodrës, luftës heroike të Lumës, tërheqjes
katastrofale të ushtrisë së tyre nëpër shqipëri në Luftën e Parë Botërore
(prandaj varre serbësh ka edhe në katundet e Tiranës rrjedhimisht), apo gjer në
luftën e Kosovës ose natën e madhe kur tanket e ushtrisë shqiptare i treguan të
pasmen e ujkut specialëve serbë që kishin hyrë në territorin tonë, atëherë po, ky
ministri serb ka të drejtë, në u konsideroftë ky një lloj specifik genocidi mbi
pushtuesin, ai mirë e ka.
Por për
skandal, Mërkiçin qeveria jonë e la të liva...dhiste dhe të kulloste i qetë
nëpër lëndinat tona përgjatë një dite të plotë, gjersa tjetri ia doli që të
gjente bar për gojën dhe shijen e tij e të krijonte një minoritet të ri
bukëshkalësh serbomanë në fushat e Myzeqesë, të cilët në vitet 20-të shekullit
të shkuar në Shqipëri patën ardhur ose si shqiptarë ose gjithësesi si të
përzënë nga dhuna serbe prej Sanxhakut...e ndërkaq tani venë e kërkojnë njohje
si minoritet i veçantë serb!
Mendoni
po të nisej jo ministri ynë i jashtëm, por edhe ambasadori jonë në Beograd, për
të kërkuar rrënjët shqiptare mes shumë serbëve të sotëm në Sanxhak, Nish e
shumë më larg se aq, apo që të merrte udhën për Serbi ndonjë arkeolog shqiptar
për të kqyrur dhe hulumtuar gjurmët e së kaluarës ilire të ndonjë treve tashmë
nën pushtetin serb, e dini se çfarë do të ndodhte?
Po
padyshim që e dini vetë dhe mundeni fare lehtë që këtë t’a imagjinoni.
Pra në
Serbi do të plastë kryengritja dhe pikë së pari ambasadën tonë aty do e
sulmonin përnjëherë, më pas qeverinë serbe dhe të dërguarit përkatës shqiptarë!
Vetëm
neve hapim rrugë në këtë mënyrë të pakuptueshme si rracë për fat të keq, akoma
e papjekur emocionalisht dhe mendërisht si popull që jemi (gjenetikisht jo, se
ashtu në rregull jemi prej shumë mijëvjeçarësh)!
Që e
majta shqiptare të bashkohet ose që e djathta jonë të hyjë në zgjedhje me
kandidatë të përbashkët, është diçka fare dhe tejet normale pra.
Që
politikanët, jo vetëm këta tanët shqiptarë, të gënjejnë, të akuzohen, shahen, sulmohen
e çfarë mos më dhe paskëtaj të bëhen prapë miq për kokë sikur asgjë të mos
kishte ndodhur, edhe kjo është normale fare për teorinë dhe prirjen
makiaveliste të politikës moderne.
Por
ndërkohë që për të pastruar gabimet e tyre, ata të thërrasin si paqebërës një
serb, për më tepër presidentin e Serbisë i cili qe betuar botërisht se Kosovën
nuk do t’a njihte kurrën e kurrës, pra Tadiçin dhe këtë t’a bëjnë në qytetin
simbol të antisllavizmit në Shqipëri, në Shkodrën që serbëve dhe malazezëve (e
rusëve caristë prapa shpatullave të tyre) nuk iu dorëzua dhe mbeti shqiptare, në
qytetin e Fishtës, pishtarit të pashuar që zjarrmon përjetë kundër kërcënimit
barbar sllav, ky është një provokim që ishte mëkat të lihej pa përgjigje ashtu
siç si rëndom në Shqipëri ndodhi edhe kësaj rradhe.
Në
ndërkohë besoj se kushdo e mban mend mirë se kur u hap tuneli i Kalimashit, arteria
dhe nyja kryesore dhe më e rëndësishme e Rrugës së Kombit, aty na pati ardhur
si burrë i mirë edhe bashbakan Erdogani!
Dora vetë
na e pati mbajtur edhe një palo fjalim të rastit të thuash ti se tërë atë rrugë
madhështore e investim kardinal miliardeurosh të shtetit dhe taksapaguesve jo
aq të kamur shqiptarë, të na e kishte ndërtuar të gjithën si dhuratë shteti
turk dhe personalisht bashbakani Erdogan!
Bechtel-Enka
thuhet të jetë një bashkëpunim turko-amerikan, unë kujtoj ndërkohë se kohë më
parë, kam pas shikuar tek një kanal sllav, një intervistë të pronarit të firmës
turke në fjalë, i cili në mos gabohem ishte me origjinë nga Shkupi, pra
shqiptar do ketë qenë.
Por firma
turke e lartpërmendur, ashtu si dhe kolegët e tyre të nderuar amerikanë, për
atë punë janë paguar “majmërisht” dhe për realizmin e asaj vepre madhore për
Shqipërinë, veriun e vendit tonë dhe po aq Kosovën e lidhjet e saj me detin, ata
nuk është se janë impenjuar gratis!
Qeveria
turke e për më shumë zoti Erdogan bashbakani, nuk ka asnjëlloj kontributi për
atë vepër.
Firma
ndërtimi rrugësh e tunelesh bota dhe Europa, por pse jo dhe rajoni ynë
ballkanik, kanë sa të duash, s’e bënte turku, dilte dikush tjetër në rradhë për
të thithur me shumë ëndje ato një miliard e ca euro të dedikuara për ndërtimin
e asaj autostrade.
Nëse
dikush diponon qoftë edhe një dokument të vlefshëm i cili të demonstrojë
ligjërisht se turqit apo qeveria e tyre “vëllazërore” me shqiptarët, të kenë
punuar falas në ndërtimin dhe shtrimin e sikur edhe 50 centimetrave të Rrugës
së Kombit, unë e heq kapelen në shenjë respekti dhe e korrigjoj mendimin tim
lidhur me këtë gjë.
Pa lëre
pastaj po qe se dikush të ishte në pronësi të ndonjë imazhi ose fotoje e cila
të na e shfaqte Erdoganin, këtë vëlla të madh mirëdashës ndaj shqiptarëve, i
cili të paraqitej me kazëm e tokmak në dorë duke punuar në asfaltimin e rrugës
sonë nacionale më të rëndësishme, imagjinoni se çfarë vlere të paçmueshme do të
kishte diçka e tillë!
Po “ia
fus shpatit” unë tani se një gjë e tillë normalisht as në ëndërrat më të
lumtura dhe të dehura të turkomanëve shqiptarë, nuk mund të ndodhë e jo më
kurrësesi në një realitet të esëlluar nga pallavrat e zakonshme filo-turke.
Ah po, Erdoganët
e afërm me kryeministrin turk, janë në krye të telefonisë fikse dhe celulare në
Shqipëri, të njërës prej bankave tona më me peshë në treg etj, por aty lekët
shqiptare ata i shtrydhin prej nesh e ndonjë bamirësi në këtë mes nuk është se
ekziston ndërkohë.
Tani që
mbaron edhe tuneli i Elbasanit, jam kurioz të shoh nëse nën shembullin e
ndritur të Erdoganit, çfarë do bëhet, do të vijë gjë edhe kryeministri grek
Samaras meqë veprën në fjalë e ka ndërtuar një firmë helene?
Firmë që
lekët e kësaj ndërmarrje të madhe për lidhjet tregtaro-njerëzore midis qyteteve
të Shqipërisë së Mesme, pra Elbasanit, Tiranës dhe Durrësit, i ka marrë një më
një me siguri!
Mos do të
themi tani se ka ndonjë meritë të veçantë sikur jo Samarasi, të paktën
Papandreu, sepse ai ishte kryeministër siç mbaj mend unë, kur kjo vepër iu
kontraktua firmës greke?
Thagmë e
madhe dhe fyerje për inteligjencën dhe taksat e çdo shqiptari, ishte ardhja
pompoze e Erdoganit kur mbaroi rruga Durrës-Kukës, po e tillë do ishte edhe
diçka e ngjashme me qeveritarët grekë po të ndodhte gjatë hapjes së tunelit të
Kërrabës.
Dhe për
t’a mbyllur sa më denjësisht treshen e temave dhe fenomeneve që kisha vënë në
titull, kemi përse jo edhe vizitat, të cilat si me magji tani para zgjedhjeve
sikur janë zvogëluar (vota nacionaliste duan të gjithë), të zyrtarëve grekë
megjithë shpurat e tyre, tek të ashtëquajturat varreza ushtarësh helenë të
luftës italo-greke.
Mënjanë
që lufta italo-greke është një çështje pikërisht midis italianëve dhe
grekëve...(pra ç’punë ka vendi ynë me këtë gjë?), gjithësesi a nuk iu binte dot
mendja qeveritarëve tanë të secilit krah politik të kenë qenë, që grekët e
vrarë në luftë me fashistët italianë, t’i rrasnin e plasnin në një varrezë siç
është bërë edhe me francezët e Luftës së Parë botërore, me gjermanët nazistë, me
emisarët anglezë etj?
Përse
doli nevoja që të bëjmë varreza grekësh cep më cep?
Këtu
hapësirë për dyshim të krijohet natyralisht dhe kushdo është i lirë që një
prapaqëllim filo-helen në këtë mes sido që të jetë t’a shquajë!
Pse
përpara se të merrnin të drejtat për varreza rreth e përqark jugut tonë...(kur
në Tiranë për shembull, vend për t’u prehur të qetë në varr nuk kanë as
shqiptarët ndërkohë)...nuk u kërkua nga pala jonë shfuqizimi përfundimtar pa
ekuivoke të mëtejshme nga ana e grekëve i ligjit të luftës me ne, i cili është
në fuqi pikërisht qysh nga koha e pushtimit në fjalë italian të Greqisë që pati
nisur nga toka e pushtuar shqiptare?
Pa u
zgjatur shumë me këtë temë që “t’a bën muuuuu” aq e qartë dhe e shpjegueshme sa
është, unë këtë punën e varrezave greke po e shpjegoj me anë të një barcalete
të vjetër ilegale shkodrane të kohës së partisë (kur njeriu binte në burg për
shumë vite po t’ia spiunonin atë tek autoritetet sigurimse).
Në atë
kohë, dy ushtarë po rrinin bashkë në faqen e një mali kufitar.
Njëri
prej tyre ishte keq nga stomaku dhe kishte diarre i gjori, ndaj dhe vajti të
mbaronte punë prapa një shkurreje.
Por për
habinë e ushtarit tjetër, ai bënte një copë në një pikë dhe sërish ngrihej në
këmbë për t’u zbrazur diku tjetër pak më andej...dhe kështu vazhdoi gjersa pati
“plehëruar” tërë faqen e malit.
Kur
kolegu e pyeti se përse nuk e kishte bërë tërë nevojën e madhe në një vend, ushtari
në fjalë iu përgjigj se në të vërtetë ai po shkruante “Parti-Enver” (si ato
parrullat që me rrasa guri shkruheshin maleve tona atëherë)...për këtë arsye
edhe po lëvizte në atë mënyrë dhe nuk po e lëshonte të gjithën në të njëjtin
vend!
...Tani
edhe puna e këtyre varrezave greke e tillë më ngjason mua, pra që ato si një
jashtëqitje e vërtetë helenomadhe, po përhapen qëllimisht përgjatë jugut tonë, për
të shkruar barkqitshëm dhe gjithë erë WC-je...pikërisht “Vorio Epir”!