Kulturë
Sabit Rrustemi: Në fytyrën e një gjethi (4)
E enjte, 11.04.2013, 07:33 PM
Sabit Rrustemi
11 MARS, 1981
Në redaksinë e gazetës "Bota e re"
atë mbrëmje
ktheva prej mensës
Ishte revista poetike në TVSH
në nëntëmbëdhjetë e tridhjetë
Vinte vetëm zëri
po jo dhe pamja e Piro Malavecit
tek recitonte mendueshëm mbi male
Valët e asaj drite
sa shqyenin Bjeshkët e Nemuna
në qindra prita repetitorësh binin
E burgjeve të errëta të mosparjes
përfundonin
Një guralec
fërfëlloi në dritare
e një dridhje e këndshme zemrës sime
Mos erdhi ajo
në këmbë brofa
Kur dola jashtë
një vrull i paparë rinie
marshonte drejt qendrës
Një pjatë si bisht dallëndysheje
stinën e pritur paralajmëroi
(11 mars, 2012)
NË KUMNOVË PËR NJË BUKË
FURRE
Udha e Mretit është lidhur nyje
te Ujët e Kuq
Nuk kalohet matanë
për pa ia mbuluar nuses sytë
gjaku na ka nxënë
Kush i bëri dhe kodrat me vajë
prej lotsh as sot nuk praj
S’është punë legjende
sa inati
kush i pari ta hapë atë udhë
E mbetëm
ti në atë anë
e unë në këtë anë
Ti në atë shteg
e unë në këtë shteg
Malet sa i presim e i djegim
kodrat na rrinë në mes
E buka digjet në furrë
e uji derdhet në Bardharë
e dy vëllezër
me dy atllarë
ngelën pa mullarë
ujë pa pi e bukë pa ngrënë
Hajde tash
leje atin në shtëpi
se me hingëllimë po na trand
nisu në këmbë
Për një bukë furrë në Kumnovë
e një kile duhan në Alizarë
Çarshisë mos e lësho shokën
as fjalët
se bëhen belatë
në dash për ditë për të më parë
se natës
nuk ia dua fytyrën më
(11 mars, 2012)
FLIJIM PRANVERE
Prej diellit ishin verbuar sysh
e nata pa e parë u erdhi sipër
me një perde të zezë i mbuloi
Fjetur në shteg dy gjarpërinj
kanë mundur të ëndërrojnë
pranverën cili i pari
ka për ta kafshuar
Çepurit mbi shtëpi
papritur m’u rrëqeth trupi
Një dru mali aleat m’u bë
s’di se si mbi kokë iu ra
për midisi i ka ndarë
Gjarpri i madh pullali
me kokë poshtë
varur në një shkozë mbeti
Ai më i vogli se ku treti
mbështjellë plagësh
humbi krejt
Tokës etur për një pikë shi
pranvera hyn me një flijim të ri
(21 mars, 2012)
NATËS PLLE
Të lodhur endjesh hallesh
dëshirash të paarrira
biem symbyllas mbi ty
si mbi syprinë detërash
thellësisë sate të errët
me vela të ëndërrta lundrojmë
atë qetësi të humbur
për ta gjetur diku
Ngadalësojnë hapat
numërime yjesh
emra të rrallë planetësh
të pashqiptuar mbesin
Se ti dhe pulset e zemrës
pahetueshëm na i rrallon
e gjakut nëpër dej
i thua pa zë
mos nxito
Nuk trazohesh aq
nga jona peshë
mishëra eshtra e shikime
shtratit tënd të errët i urton
Në pikën më të thellë
të prehjes sonë
t’i zgjohesh qëllon
Si të çmendurat valë
godet përpin
Ankthesh na pushton
zemrash na ngrin
derisa gdhin
Atëherë
vetëm atëherë ti fytyrën zdrit
të nesërmen lind
Në tonin planet
askush si ti
s'lind përditë
(25 mars, 2012)
NË ATË KULLË
(Për kullën e Avdyl Hoxhës në Junik që u
kthye në bibliotekë)
Urtakët e fjalëve
u kthyen në Fjalë të Urta
Thyen korniza gurësh
muresh
nëpër faqebardhat e lëmuara
si faqe nusesh të reja mbinë
e fruta lëshuan
Mbështjellë kopertinash
siç mbështjell lëkura njeriun
ashtu radhë radhë pa fjalë
u palosën e vend zunë
në krye oxhaku
Kryevepra kohësh në atë kullë
flasin pa zë
Muret shpërthehen me të urtë
një botë burrërisht
mes supesh mbajnë
Dhe kullën që rilind
për çdo shekull
Se Fjalët e Urta
u kthyen te të vetët
(25 mars, 2012)
MALLI I SHPIRTIT
Libraritë janë stërmbushur
dhe skutash me pluhur
Vargjeve s'u ka mbetur vend
as pasdyerve nëpër gozhda
Në toplistën e shitjeve
prijnë aferat
vjelljet
jashtëqitjet
Nëse ke të tilla
shitësi nuk thotë jo
vetëm fërkon duart
Dhe i zdrit
eh si i zdrit sytë
Për libra poezish
s'ka fjalë
as treg
Ka të drejtë shitësi
po unë s'e kuptoj
Malli i shpirtit në pluhur s'hidhet
(26 mars, 2012)
SKAJ PYLLTHIT ME PISHA
(Homazh
për malësorin, Ilmi Pidiqi, i cili një ditë më parë shkoi në amshim)
Një malësor i Grykës, mbrëmë
mori ngjyrën e dheut që aq shumë e deshi
Skaj pyllthit me pisha
duke thithur aromë jete
lëshoi trupin
Aty ku kish larë me djersë
çdo grimcë dheu
çdo fije bari
Aty ku kish hedhur dhe hapin së pari
pa i bishtnuar as dhe për një çast
atij vendi prej nga nxori bukën
Pa e lëshuar as dhe një "oh"
pos atij buzagazi
që u fsheh mes syve të tij
....
Një malësor i Grykës, mbrëmë
u mbështoll me heshtjen
aty skaj rrugës
I etur për pak fjalë
Tjerat i kish me shumicë
o po mori me vapë
o po mori me ngricë
E vodhi papritur mortja
dhe unë s'e pashë
I zënë në faj
portretin e tij kërkoj
nëpër copëra fjalësh
mbetur gjithandej
Sa në odë rreth sofrës
sa nën hije pemësh
sa nën drurë të gdhendur arrash
Te udha që bëmë
te lumi që s'e zumë
...
Eh, malësori im
i etur shkove për një fjalë
si shenjti yt
Të etur na le
për atë që të vloi në gji
e s'na e the
E bëjmë malësorçe, tash
të kthehemi edhe njëherë prej fillimit
ta zëmë atë që lamë mangët
Se gjithçka po duket si ëndërr
(27 mars, 2012)
KTHEHEN TEK UNË
Kthehen tek unë
ato që më kishin braktisur
Strukur disqeve rrisqeve
rrathëve eterikë që s'shihen
net të ankthta kaluan
çmos bluan
Një rikonfigurim shkrimesh
pastrim virusesh
e memoriesh
rastësisht i hodhi
shportash
I kisha të dashura
copëra shpirti i kisha
pa to i zbrazur i tëri isha
Ju afrohem
ju përulem
falje pa pra ju kërkoj
Ato ende me vajin në buzë
nuk më qasen lehtë
Ç'tagër i radhës më pret
ai mëkat rasti shpirtin ma vret
edhe tash që s'jam vetë
Para sysh do t'i mbaj
thellë në timin gji
se jam e tyrja shtëpi
(29 mars, 2012)
NATA E PARA TREMBËDHJETË
VITEVE NË LLOFCË
Llofca mbeti nën hijen e diellit
me dyzet e sa shtëpi
e një saç plumbash
përmbi krye
E hapur zemrash
për tetëqind e sa të dëbuar
me kobra rrethuar
E sheh si i bie nata sipër
si e çel mëngjesi
nuk e di
Bacë Mehmeti
(i lumi ai për veti)
fjalëqetë e buzagaz
(se ku e gjente)
një sy gjumë na e dëshiron
vetëm një sy
Tjetrin zgjuar mban
Sikur na thotë
shtiremi se flemë
Nëpër kllapi
një zog i zi
këndon mbi çati
Me fat zbardhtë dita e re
ata zogj nëpër kaltërsi
Na sjellshin liri
Luten pazëshëm buzët tona
me sy e shpresë qielli
REKUIEM PËR TË VËRTETËN
Kot të nxjerr sheshit
Tregjeve të botës
të rrudhet hapësira
Dhe milimetrin e fundit
ta zë rrena
Ti ëndërron ditë më të mira
Kur as si ujë
s’të pinë për shëndet
Qysh me t’u bë zot
Për shpatullat tona
rënd rëndon dhe tash
Sa nuk e di as vetë
Pika që s’i ra kësaj toke
nuk të gëlltit as më i thelli det
Përveç heshtjes
(1 prill, 2012)
TRE PRILL,
NJËMIJENËNTËQINDENËNTËDHJETENËNTË
Askush s'pyet në fjetët hiç
ç'ëndrra patë
a cila ditë është sot
Veç a jeni mirë
Të tjerat bluhen e ruhen
në memorien e secilit
Për ditën tjetër
Me emër të zotit do ta presim
lëkundet vendit
Mehmet Llofca
Mes gishtash dredh cigaren e radhës
të parën e sos deri në shpuzë
Po ju kah i keni sytë
pa një pa dy na pyet
tek lidhim këpucët
Do të dalim pak
për të parë çka ka nëpër Karadak
Balli zë i rrudhet nga pak
...
E di unë ç'i bluan rradakja, tash
thotë Shabi Shoqi
tek kalojmë përpjetëzën
kurrizit të maleve
Te Guri i Magjerës
dy fjalë i ndërrojmë me Xhelë Katërqindtin
e te Guri e lëmë
Pa fjalë Ilincën kalojmë
kur marrim në të djathtë
Te shkolla e re
një kolonë të dëbuarish
na lë pa frymë
Flokë e vetulla ende me brymë
e këmbët kah sytë
lutjet tona as i dëgjojnë
Ngricat e natës shkrihen mbi ne
si lot pikojnë
e na shpojnë
m'u në zemër
Po ç'ditë është sot
që ta shënojmë
Harrojmë
......
(3 prill, 2012)