E shtune, 28.01.2023, 06:55 PM (GMT)

Kulturë » Berisha

Sejdi Berisha: Dudi plak në Patrikanë

E enjte, 27.12.2012, 10:50 AM


P O E Z I

Sejdi BERISHA:

DUDI PLAK NË PATRIKANË
(Kushtuar Dudit Plak në Patrikanë të Pejës në 100-vjetorin e Pavarësisë së Shqipërisë)

Sa puthje si kurorë dielli në qafë i ke varur 
Gjinjtë e drenushave pa mëshirë i ke përvëluar
Sa thyerje zemrash ke përjetuar
E shkrumb tek kroi i akullt
Nën Ty lindjet i kanë vendosur dashnorët e kësaj toke
Edhe tradhtitë janë prehur nën flladin tënd
Asgjë e re
Kështu me ditë javë e vite ishte
Kështu me decenie
E, Ty as sot s’të ha palla
S’lëviz fare
Vetëm murosë histori

...Të kam lakmi
Që nga barrët kërrusur je 
Që sipër mendjes ngarkuar t’i kanë 

Pse heshtë tash e tre shekuj e as shpirt nuk japë
Vetëm degëzohesh e trungun nuk e dorëzon
Ndoshta je duke pritur diellin e diellit
Kot pret ashtu
Edhe në pritje të kanë tradhtuar

Të kam lakmi... edhe zili
Sa njeriu është dashuruar nën kurorën tënde
Sa rrenat janë thyer për historinë përbri trungut thatak
E Ti, edhe tash heshtë e nuk flet
Në trupin tënd e nën kurorën e hapur
Ka rrëke lotësh, ethe e trishtim
Për jetën, o Dudi Plak

Çfarë të bëj...
Ma jap barrën e peshën tënde
E të kërrusëm fortë e fortë
M’i jap sytë e tu e të flasë pa gjuhë
M’i jap veshtë e të flasë pa zë
Atëherë...
Nën kurorën time le të vërshojnë lulet
Le të ndizen zemrat e etjeve të Kosovës
Lindjet le të presin damarin e pritjeve

Falma kurorën tënde
O, Dudi Plak
Te ta dhuroj jetën time
E të kërrusemi bashkë
Ti ruaje historinë
E unë të rrëfej vetëm për dashurinë

Këtu e shoh jetën e vdekjen
Këtu bekoj edhe lindjen e njeriut
Falma kurorën, o Dudi Plak
Se lirinë e shpirtit e kemi hak

Por ...
Mos ta hap këtë kujtim
Se harta ime do harliset
Do të dalë  
Jashtë kornizave të kapërthurta
Atëherë, unë dhe Ti
Në të njëjtën kohë
Do qeshim dhe do qajmë
Kurse loti do ngelet udhërrëfyes i çuditshëm
O, Dudi Plak
Ti, histori e tokës sime...



(Vota: 9 . Mesatare: 5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora