| E diele, 05.08.2012, 05:01 PM |
DRITA LUSHI
MË LËR TË TË DUA
Lermë të të dua siç di!
Lermë!
Më lër të pushoj
në zërin tënd, të flas me tingujt e tij,
të ëmbëlsojmë zërat tanë
me nota dashurie,
që këngën gjejnë edhe në pentagrame të ngrira.
Lërmë të të dua siç di!
Lërmë!
Me lër të çel ditën
e penelata kaltërsie t’i hedh
dhe reve në qiell.
Lërmë të të dua siç di!
Lërmë!
Më lër hënën e paktë,
të të jap diellin e madh,
diellin e natës,
që shkëlqimi mos të fshihet
nga frika mos verbon njeri,
por i lumtur të ndjehet
në lumturinë tënde
dhe ai.
Lërmë të të dua siç di!
Lërmë!
Lërmë të endem e lirë,
më hap portat e tua,
shqyej,
shembi kufinjtë,
ti frikë mos kij:
nuk vij si pushtuese ,
vij si dashuri.
RILINDJE
Sot dua të zhvesh
lëkurën e trishtimit,
ta flak dritares së hapur
si gojë e stërmadhe.
Hermetikisht
dua t’ia mbyll kanatet
dëshperimit,
që zvarritet të pushtojë
hojet e trupit tim.
Dua një veshje të re,
dua!
Trishtimin
do ta fal,
do ta flak,
do ta hedh …
Merreni po të doni!
Unë po dal nga lëkura e tij.
Jeta, më qepi një lëkure gëzimi ,
ngjitur në trup,
me mijëra pejëza
drite,
dashurie,
dielli,
e më s’më shqitet, jo.
Veshje të përhershme – gëzimin
MENDIMET
Sot mendimet
drejt teje vijnë.
Shpirti, natyrshëm,
çeli lule te reja,
edhe pse vjeshta
ka ardhë.
Rrëke ndjenjash
më pushtojnë,
vërshojnë dejeve,
e unë ndjehem
e mbytur dashurie
për Ty.