| E hene, 23.07.2012, 07:52 PM |
NJË LIBËR I SHKRUAR ME DASHURI
Mendime rreth monografisë “ISHTE! DARZEZA E RE” i studiusit Fatmir Miraka
NGA PËLLUMB GORICA
Në
leximet e librave jam i prirë të shkruaj për vlerat që mbartin. Promovimi i
vlerave, historisë, trashëgimisë kulturore, mjedisit, ngjarjeve, është një
mision fisnik e tepër domethënës për të nxjerrë në pah tiparet, të veçantat e
karakteristikat e secilës krahinë, zonë, qytet, fshat. Në këtë rrjedhë janë botuar
e vazhdojnë të botohen monografi, jetëshkrime, kujtime, studime... . Dhe, është
bukur, kur shkruhet me sinqeritet, që historia, ngjarje, traditat të mos
harrohen. Studiuesi nga Sulova e Gramshit, Fatmir Miraka, ka botuar librin “Ishte!
Darzeza e re”. Një botim interesant për këdo që do të njohë të shkuarën e
këtij vendbanimi të dikurshëm të Gramshit, shtrirë buzë lumit Devoll, dikur
pjesë përbërëse e krahinës së Sulovës. Kjo, më
shumë e lidhur për banorët e Darzezës,
të shpërngulur nga shteti në fund të viteve ‘80 në Fier, për të ndërtuar
aty një vepër të madhe energjike, Hidrocentralin e Banjës.
Në fakt, autori prej vitesh shkruan për krahinën
e Sulovës. Ka botuar librin me kujtime për fisin e tij, Miraka të Sultit në
Gramsh, me titull “Pema e jetës”.
“Ishte! Darzeza e re” i
studiusit Fatmir Miraka, me ndërtimin e thjeshtë, është shkruar me dashuri dhe
një ndjeshmëri realiste, një punë serioze e tillë që meriton të vlerësohet. Të
shkruash, së pari duhet të kesh talent, njëkohësisht edhe njohuri të gjëra kulturore. Ndaj, ajo që duhet theksuar në këtë
prurje të autorit, është fakti se është
shkruar me rrëke mendimesh e episodesh interesante, gjë që lexohet me
kënaqësi.Të bie në sy bukuria dhe thjeshtësia e thurjes së fjalës, shkathtësia
e sintaksës popullore, ku spikat pasioni, këmbëngulja për të vlerësuar
peisazhin, historinë, traditat e këtij vendbanimi, por edhe për t’i analizuar
ngjarjet me syrin kritik. Për të shkruar këtë monografi e ka ndihmuar njohja
deri në detaje e historive në bisedat me të moshuarit, por edhe duke bujtur në
konakët e Darzezave, ndërtuar, ashtu thjesht e me paraqitje mbresëlënëse. Të
Darzezave të thjeshtë, bujarë e mikpritës, të dashur për miqtë apo edhe për
këdo siç e kërkonte zakoni i pritjes e përcjelljes me fjalë shpirti. Darzezasit shquhen për
mikpritje. Kushdo që vinte për herë të parë aty, këtë e vinte re menjëherë.
Monografia “Ishte! Darzeza e re” hapet me
një parathënie, ku lexuesi përqëndrohet në strukturën komplekse të librit,
vlerave njerëzore, historike, mjedisit natyror, traditave të Darzezës. Në
vazhdim prezantohet njohja në fëmijëri dhe e rinisë së hershme e autorit për
Darzezën me episode, histori të dëgjuara e të përjetuara, duke i ndërthurur me
emra, vende, rrethana. Në kapitujt e tjerë
autori shkruan realisht për të
kaluarën e largët të Darzezës, me copëza faktesh të përzgjedhura nga historia e
saj, përpjekjet e banorëve për mbijetesë. Për më tepër hidhet dritë për shumë
nga etapat historike të këtij vendbanimi, duke sjellë në vëmëndjen e lexuesve
jo pak fakte të qëmtuara ( sigurisht të
shfletuara), por edhe mbledhura nga të moshuar të krahinës, e veçanërisht të
këtij vendbanimi me histori e kulturë të lashtë. Në morinë e këtyre fakteve të
paraqitura dhe ngjarjeve të bien në sy referimet. Librat shkruajnë gjithnjë për
libra të tjerë dhe çdo histori apo ngjarje tregon një histori të rrëfyer më
parë, dhe, që natyrisht autori i citon në librin e tij. Teksa u drejtohet
historive gojore, bën shpjegime më të besueshme për gjithçka që ka dëgjuar,
lexuar, përjetuar. Ngërthen ngjarje që kanë lënë mbresa, emra, toponime,
virtyte. Darzeza, si pjesë përbërëse e krahinës së Sulovës, është e njohur për
vlerat historike e kulturore, emrave të njohur për çështjen kombëtare, për
njerëzit e virtytshëm e me shpirt të madh. Lexon copëza tipike jete të
ndërthurura me ndjesi intensivisht e vërtetësisht. Interesant është përshkrimi
modest për njerëz punëtorë, ngjarje të rënda, fenomene, duke i sjellë në
vëmendje e analizuar ato, por edhe rrëfimet nga mënyra e të jetuarit, të
mikpritjes, mirësjelljes e komunikimit në këtë vendbanim. Me realizëm pasqyron
ndjenja të holla njerëzore, vrojtime, histori të njohura dhe të panjohura, të
cilat, të para në optikën e autorit apo studiuesit, të surprizojnë për sasinë
dhe cilësinë e tyre. Me stilin e të shkruarit pasqyron dhjetra rrëfenja të
bukura. Në të gjitha këto rrëfime është përvoja e brezave.
Një vend me rëndësi në faqet e kësaj monografie
zënë traditat. Autori i përmend si krenari. Përshkruan edhe kostumet popullore
me ngjyra të bukura, aktivitet kulturore, pjesmarrjen e amatorëve në
evenimente, po ashtu shkruan edhe për punimet e leshit, ndërtimet, ritet e
zakonet e dasmave, krushqitë, dollinë e të tjera veçori karakteristike të
krahinës së Sulovës.
Studiusi, Fatmir Miraka, përshkruan edhe përpjekjet
e banorëve të këtij vendbanimi për të jetuar me djersën e tyre, dhe, si rridhte
ajo me ngjarje. Me gjakftohtësinë analistike, jo emocionale, por me nuanca
logjike, me vështrimin realist të
problemeve e situatave të kohës dhe pasqyrimin e vështirësive ekonomike, ai ka
shkruar me argumenta për peridhat e vështira që kaloi edhe ky vendbanim në
gjysmën e dytë të shekullit që lamë pas. Përshkruan me dhimbje peripecitë e
shumta që kaluan mjaft familje në vitet e sistemit të kaluar monist por, edhe
me hollësi, detaje e angazhimet për zhvendosjen e banorëve, përgjegjësinë e një
misioni të tillë dhe akomodimin në një
vendbanim tjetër buzë detit Adriatik në rrethin e Fierit, e cila mori emrin
Darzeza e Re, si i përballuan kushtet e
reja të banimit.
Studiusi, Fatmir
Miraka, me evidentimin e vlerave njerëzore, natyrore, të trashëgimisë
kulturore, e, më së shumti historisë e ngjarjeve të këtij vendbanimi, shkroi me
dashuri një libër memorial për të mos u harruar Darzeza e dikurshme buzë
Devollit në krahinën e Sulovës.