| E diele, 13.05.2012, 01:25 PM |
KAM NJË MALL E KAM NJË BINDJE
Kam një mall e kam një bindje ,
Se do t’ vdes , unë , me sy çelë –
Për t’u kthye në vendlindje ,
Babë e nënë, ku m’ kanë përkëdhelë !
Malli n’ zemër po më shkrinë ,
Për t’ u kthye mbi atë shkrep –
N’ truallin tim t’ ndërtoj shtëpinë ,
Ku m’ ka qitë nëna në djep !
Ku kam ardhur në këtë jetë ,
S’ pari herë ku i kam çelë sytë ,
Si bylbyli n’ çerdhe t’ vetë ,
N’ lojë e n’ gëzime ku jam rritë !
Ku e kam pa dritën e diellit ,
Ku i kam pa rrezet nën hënë ,
Ku i kam pa yjet e qiellit ,
S’ pari herë ku kam thirr Nënë !
Ku kam luajt n’ kasolle t’ fierit ,
Tu i ruajt delet shpat me shpat ;
Ku i kam ndie jonet e fyellit ,
Bashkë me këngë , ku kam lëshua shtat !
Më thërret vatra e gurë themelet –
Fëmijërinë ku e kam lanë !
M’ thërrasin krojet dhe zabelet –
Këngës sime me ia thanë !
Përmbi pllaja mbushë me bari –
T’ shkoj te shkolla tatëpjetë ;
Ku i mësova shkronjat s’ pari ,
Ku rrugëtova për në jetë !...
M’ thërret vendlindja në Tugjec –
Me gëzim atje të rri ;
Pleqërinë , atje ta pres
Me qëndresë e burrëri !
Këtë dëshirë e kam ves – ves ,
Që ta qes në terezi ?!...
Kur t’ vijnë dita që të vdes –
T’ vdes si burrat , pa mërzi !
Mbi kodrinë , atje te qarri ,
Po ua la , unë , amanet –
Të ma ruani një copë varri ,
T’ më varrosni si asht adet !
Gjilan, më 10.05.2012. Demir KRASNIQI