| E hene, 06.02.2012, 08:55 PM |
ILIR CENOLLARI
(Cikël poetik për Kosovën)
HYRJE
PERSHENDETJE PRISHTINE
Ulpiana e moçme, Ulpina me emër zane, Ulpiana e bukur, lozanjarja, shtat-hedhura, sokolesha, trimja, ballarta si ajo! Prishtina e sotme, çikë e drojtur, me një gëzim të përmbajtur, rrahur nga flladi i freskët i rrafshnaltës gjelbëroshe, dehur nga aroma e tokës dhe lavdisë së moçme, kredhur në një vrullvrapimi atletik e elegant drejt Ardhmërisë. Udhëtoj nga Ulpina e dikurshme për te Prishtina e sotme, mbi dy mijë vjet rrugëtim i mundimshëm nëpër honet e historisë, nëpër baltinën e kohrave, nëpër baticë-zbaticat e shekujve, nëpër stuhitë e ditënetëve dardane…Sa e gjatë dhe e sa e shkurtër rruga, sa i gjatë dhe sa i shkurtër rrëgëtimi.
Tash mbushem me frymë, ndalem, vështroj përreth lëndinat e lulëzuara, që çelen si një zemër bujare, horizontet e gjera, agimin përflakës e perëndimin ngjyrë bozhur dhe them: “Ku kam qënë? Sa jam vonuar! Ku është gjyshi im? Stërgjyshi? Ku janë martirët? Amaneti i atit tim? Ku është shpirti i të parëve tanë? Nga dheu mbijnë si fidanë zëra të largët, nga hiri ngjallen zëra të tretur nga dhimbja e lotët e zizë, përzierë me rënkime, me ahe zemre, me bula djerse e njolla gjaku, zëra-tinguj, jehojnë tek unë, në shpirtin tim dhe çelin lulekuqe, bozhure, karafila, më mbulojnë me një mantel të gjelbër kosove, më thonë: je Kosovë!
Unë përgjigjem: Po, jam Kosovë, por a duket Tomori prej këtu? Dhe vë dorën si strehë mbi ballë e rrekem të sodis kreshtat e maleve të Shqipërisë, ballët e ndritura të Tomorit Hyjnor, pelegrinët e panumërt që ngjiten drejt majës së tij për të kundruar Ilirinë.
Prishtinë më 23. 08. 2010
PËRSHËNDETJE
Përshëndetje Kosovë! Përshëndetje Dardani!
Përshëndetje Tokë e Premtuar, përshëndetje Shqipëri,
përshëndetje mbreti Bato, përshëndetje Harmoni!
Përshëndetje martirë dhe ju dëshmorë për liri,
përshëndetje Niketë Dardani, këndoje për mua
himnin e shenjtë “Te deum laudamos”,
përshëndetje Isa Buletini dhe ti Hasan Prishtina,
përshëndetje Ibrahim Rugova, përshëndetje trima!
Përshëndetje Adem Jashari, përshëndetje Ali Podrimja!
Jam Iliri, biri i Kadmit, vij nga viset e Atintanisë
dhe të Tomorit Hyjnor, karrua është mbrujtur me mall,
rrotat e saj kuisin nga dhimbjet e plagëve shekullore;
sprapsuni horizonte gri, re të zeza, sprapsu prapësi.
Ani, jam i mpirë nga lumturia, mbi krye, në ballë,
vëmë një kurorë ari, mbretëreshë, nga floriri
i minierave të nëntokës kosovare të mbushur me thesare.
Përshëndetje Kosovë, përshëndetje Dardani,
përshëndetje rini! Përshëndetje Iliri!
17. 08. 2010
II. SHQIPËRI-KOSOVË
KOSOVA
(Në ditën e pavarësisë)
Sot s’mendoj dot,
s’mundem, s’dua,
sot vetëm ndjej,
ndjej thellë në deje
gjakun të ndizet
në zjarrin e lirisë,
gjakun të dallgëzojë
në flamurin e lirisë;
Sot s’mendoj, s’mundem,
mendimet janë fshehur
detit të ndjenjave,
buçimës së shpirtit,
sot mendimet shpërthejnë
qiellit të lirisë,
Kosovë,
qiellit të Shqipërisë.
17. 02. 2008
LIRIA
(Në kullën e Adem Jasharit në Prekaz-Drenicë)
Liria ka ngjyrë të kuqe,
ngjyrën e gjakut, e flamurit,
Liria ka zemrën e Adem Jasharit,
e Arbërisë,
Liria – mëkim e bekim
Mëmëdheu.
23. 07. 2011
BASHKIMI
Muri u shemb,
kufiri u shkel me këmbë;
Kosova Shqipërisë iu fut në gji,
u shkri,
me mall të valë
me mall të rrallë
si fëmijë…
Kosovë, Shqipëri
një vend,
shpirti ende dhemb.
***
Shqipëri-Kosovë
zemër e çarë më dysh,
shegë e pjekur tetori, thelpinjtë e kuq
zbulojnë gjinjtë e përndezur....
Mall i mbledhur nëpër vite,
shekuj, përpjekje, stuhi e rrebeshe
tash shpërthen fuqishëm,
magmë vullkanike,
shkrepëtimë diellore...
Shqipëri-Kosovë,
dy mushkri në trupin e atdheut,
dy qiej të kaltër.
01. 10. 2010
***
Avuj e ngrohtë të tokës kosovare
ngrihen lart e valëviten si flamuj të kuq,
aromat e trupit pjellor
qiellit endin pëlhura të mëndafshta.
Puhiza mbrëmësore shpështjell
afshe dashurie, fllade lirie…
Avuj, aroma, ngjyra,
një erë e lehtë i merr përpara,
i vërvit maleve të Shqipërisë,
kreshtave të Alpeve
ku formon re të trandafilta.
29. 09. 2010
III. KOSOVE
Kosova
djep lirie
kurorë lavdie…
Janar 2011
***
Kosovë,
brengë brengosëse,
brenga ime,
Kosovë,
brengë shekullore,
ha brinjët e kohës,
Kosovë,
brengë brengosëse,
plagë lëndonjëse,
plagë, plagë,
plagë.
26. 08. 2010
***
E rëndë jeta nën zgjedhë,
e rëndë jeta në robëri:
ajri i ngjethur e i rrallë
pemët të kërrusura,
dielli i zbehtë e i vrarë,
kokat mbuluar me shami të zeza,
e rëndë jeta nën zgjedhë,
varr, varr.
02. 09. 2010
KOSOVE
Kosovë,
gjithçka e jotja flet shqip,
vështrimi shqip,
gjuha shqip,
historia shqip,
dheu shqip,
drurët shqip,
bari shqip,
guri shqip.
Kosovë,
gjithçka e jotja flet shqip,
Kosovë.
29. 08. 2010
***
Mëngjes, mjegullirë,
Fushë – Kosovë, rrafshirë,
lart dielli ndrin,
llampadan flakërues….
13. 11. 2010
***
Hyjni dardane
me sy të erandshëm,
me sy të butë,
avujt e tokës ,
mbledh në bebëza,
flladet e bjeshkëve,
aromat e fushave,
ngjyrat e qiellit…
Hyjni dardane
me sy të butë,
ledhatonjës.
30. 06. 2011
***
Krijuesi kur pa
të përfunduar veprën e vet,
kur pa krijesën e ëndërruar,
për një çast iu drodh dora,
dalta i ra përtokë,
i çmeritur belbëzoi:
“U ngjallën hyjnitë dardane,
u ringjallë Dardania”!
10. 07. 2011
IV. NE PRISHTINE
Ulpianë e bukur
livadheve të blertë vallëzon si flutur,
s’guxon kush të të prek,
as nata, as shpata,
djalli tmerrohet nga mëkati,
dridhet nga fati.
Ulpianë e bukur,
qiellit të Kosovës rend si flutur.
27. 08. 2010
***
E qeshura rinore
derdhet rrugicave prishtinase,
rrëkezë e kristaltë bjeshke,
fërfëllizë e shndritshme diellore.
E qeshura rinore fshin
blozën e mureve të nxirë,
terrin e natës së gjatë…
25. 08. 2010
***
Pëllumba mbi çati:
gurë stralli, zaje gri,
pika loti.
***
Qyteti gdhihet kruspull nga acari,
i tulatur, i përfjetur, i përngjethur,
si iriq me gjemba të mprehtë,
me gjemba të ngrehur përpjetë…
Prishtinë më 21. 11. 2010
NDIZE ZJARRIN-POEZI
(Poetit Ali Podrimja)
Vëlla Ali,
ndize zjarrin në odën e miqve,
zjarrin-poezi,
flaka brambullitëse – flamur
kuq e zi.
Në Prishtinë bën ftohtë,
në Tiranë zagushi,
Xhevua flet me perënditë,
Fatosi në Kullën e Fjalës së Lirë
ngujuar rri...
Vëlla Ali,
atje ku është atdheu më je dhe ti,
ku është Trimi, Drini,
Guri, Burri,
Atje ku është Jeronimi
dhe hyjnori Naimi.
Lëre zjarrin të digjet
vëlla Ali,
zjarrin-poezi,
rrëmbeje flakën
e betejave pri,
flamur kuq e zi.
15. 01. 2012
***
(V. H.)
Përmes syve tuaj
shoh natën e bërë shoshë nga plumbat;
Përmes syve tuaj
shoh qelitë e ferrit në Had,
Përmes syve tuaj
shoh vështrimin e të rënëve në varr,
Përmes syve tuaj
shoh liqejtë e dhimbjes ngrirë në shpirt,
Përmes syve tuaj
shoh rrënjët e shtrira të lirisë,
mallin e ndezur lulebozhur.
Përmes syve tuaj
shoh pëllumbat e bardhë të shpresës
tek ngjiten lart në qiell.
Përmes syve tuaj
futem thellë në nëntokën e Kosovës.
27. 08. 2010
SHQIPTARI
D.F.
“Ai është shqiptar,
dhe kjo është e madhërishme”!
Se si m’u kujtua ky varg i një poeti të dëgjuar,
ndoshta si reagim ndaj lumit të kritikave
të derdhura në adresë të një djaloshi shqiptar,
ndoshta si mosaprovim i qortimeve të tilla.
Ndërsa dëgjoja kritikuesin fjalëshumë
mendoja se këtij djaloshi i falet gjithçka,
çdo e metë, çdo mangësi, çdo gabim,
ai është shqiptar, shqiptar i vërtetë,
dhe kjo është e madhërishme.
14. 12. 2010
KOHA IKEN SHPEJT
(Barletit, mikut tim nga Kosova)
Koha ikën shpejt
e s’ke kohë ta shohësh;
koha ikën shpejt,
ditët bien nga qielli si flokë bore,
të mëdha, të vogla, të lumtura,
të trishtuara, të frikura, guximtare,
e sa prekin tokën
shkrijnë, treten pa gjurmë,
ngre kokën lart,
mizëri ditësh duke zbritur,
mizëri flokësh të bardha bore,
kthen kokën mbrapa,
ditë të tretura, breza të shuar,
vazhda jete, tuma me varre,
male, fusha, lumenj, qytete, fshatra,
shtëpi, rrugë, godina, stadiume,
vepra të ngritura nga dora e njeriut,
gërmadha, qytetërime të humbura...
Koha e pa kohë s’lëviz,
e njëjta etje njerëzore për jetë,
e njëjta dëshirë për liri,
për dashuri.
Mars 2011
LAMTUMIRAT
Lamtumirat e mia kosovare,
përqafime ylberore,
përflakje diellore….
Kosovë, më je dukur
çdo herë e ndryshme,
çdo herë më e bukur!