Arif Kutleshi: Përhënia e kuajve të kaltër

Arif KUTLESHI

PËRHËNIA E KUAJVE TË KALTËR

Po vijnë kuajt e kaltër drejt e nga Nili

Kalendari gregorian shënon muajin kallnor

Al Tufaili u lëshon zë nga shpina e një Fili

Të çpihen e t´i provojnë thundrat mbi borë

Janë ngopur me algje janë bërë tupan

U vizëllojnë thundrat u shkëlqen lëkura

U bënë goxha do vjet pa u bërë kurban

Shpejt e mësuan notin të turren me hurra

Nuk tuten nga njerëzit veç nga krokodilat

Kur ua mbyllin shtigjet kur i fusin në brí

Por sot në këtë kallnor kanë dalë dhe bilbilat

Piramida e Keopsit lahet krejt në diell të ri

Kuajt tanë të kaltër i kemi mbajtur gjallë

Tigrin dhe Eufratin e kemi shterruar për ta

Për do´ kuaj të sojit kishim gjithmonë mallë

Dhe krenaria për Nilin tonë të vdesim s´na la

Eh, fjalë e Al Tufailit nga maja e shpinës së Filit

Që thoshe se edhe kuajt e Nilit dinë të lodrojnë

Ju kemi dhënë më shumë hurme se bari t´tërfilit

E tashti nxjerrin dhëmbët të gatshëm t´na copëtojnë...

17 kallnor 2012