| E hene, 16.01.2012, 09:00 PM |
Tufë këngësh popullore kushtuar trimit legjendar dhe heroit kombëtar shqiptar :
Frynë murrlani me stuhi –
Qielli ç’ bubullinte ;
Nën flamurin kuqezi ,
Çetës po i printe .
Refreni:
Hej, trim, o Skënderbe ,
O, krenari shqiptari ,
Për t’ çlirua Atdhe’n –
Luftë ke nisë ma i pari !
Dyzet trima si shqiponja ,
Kaluan shpatit shkonin ,
Bashkë me trimin Skënderbe –
Turkun ta luftonin !
Refreni:
Hej, trim , o Skënderbe ...etj.
Si rrufe u hap kushtrimi ,
Kudo ndër shqiptarë –
S’ durojmë prangat e robërimit ,
Për pa vdekë ma parë !
Refreni:
Hej, trim, o Skënderbe ...etj.
Recitativi - Një vashë:
-Po , ku jeni nisë , o trima ?
Luftëtarët:
-Vendin ta çlirojmë !
Vasha:
-Qe besa , edhe unë do t’ vijë ,
Se ma kështu s’ mund të durojmë !
Grupi:
T’ japim fjalën t’ gjithë sa jemi ,
Trim, o Skënderbe –
Për liri dhe për Atdhe ,
Vdesim si me le !
*****
Kënduar nga Demir Krasniqi .
2. TRIM I DASHUR DHE I PARË
Trim i dashur dhe i parë –
Trimi Skënderbe ;
Natë e ditë luftoi pa pra ,
Tigër ndër bete’ !
Prinë përpara me fuqi ,
Trimi legjendar ,
Nën flamurin kuqezi –
Bini bajraktarë !
Me këngë t’ buk’ra do t’ kujtojmë,
Trim , o Skënderbe ,
Emrin tënd s’ do ta harrojmë ,
Që kujtim na e le !
*****
Kënduar nga Mazllom Mejzini .
3. TRIM I MADH O SKËNDERBE
Trim i madh, o Skënderbe ,
Porsa linde e i çele sytë –
N’ vatrën tënde shkrepi dritë ,
Sikur rrezja e parë e diellit ,
Që i bien bjeshkës e i bien qiellit .
T’ ndanë prej nënës – t’ vajtoj motra ,
Bashkë me vëllezër t’ ndanë nga votra !
Me nj’ atë urdhër t’ Otomanit –
Shumë shërbeve n’ tokë t’ Sulltanit ,
Duke u djegë për tokë t’ vatanit .
Trim i madh , ti kur u bane –
Bota ndjeu për fuqinë tënde !
Male e fusha , ti kalove ,
Marshin tënd kush s’ mund e ndali –
Erdhe n’ Krujë si shqiponjë mali .
T’ priten sulme ma t’ vështira ,
Mbrapa ktheve shumë ushtri ,
Nam po bëjnë do shqipe t’ lira ,
Si rrufe n’ zemër t’ Ballkanit ,
Që s’ duan t’ lënë Atdheun n’ robëri !
Tash kremtojmë Pesëqindvjetorin ,
Qysh se vdiqe , o drangua ,
N’ zemrat tona t’ kem ngujua ,
Nuk t’ plakë koha , nuk t’ plakë moti ,
Kurrë nuk vdes Gjergj Kastrioti !
*****
Kënduar nga Hashim Shala .
4. HEJ KY SKËNDERBEU
Hej, ky Skënderbeu ,
Luftoi si lua ;
Veshun duel Sulltani –
Krujën , o, rrafsh me e ba !
Hiq Sulltan , taborret ,
S’ t’ falet Kruja kurrë !
Skënderbe krutani
Lufton në shkamb, në gurë !
Hej, hej,
Skënderbeu vërsulet ,
Rrufe shpata e tij ;
Padishah Murat – o,
Ne do t’ bajmë liri !
Atje nga Malësia ,
Bota banë çudi –
Kur të vret Skënderi
Me bashkë malësorët e tij !
Kur tani Stambolli
Në agim të vet ,
Atje ku kënduan –o,
Padishah mos tret !
Hej, hej,
Skënderbeu vërsulet ,
Rrufe shpata e tij ;
Padishah Murat – o,
Ne do t’ bajmë liri !
*****
Kënduar nga Ismet Peja .
5. SKËNDERBEU – GJERGJ KASTRIOTI
Kush qe ai trim ma i zoti ?
Skënderbeu – Gjergj Kastrioti !
Skënderbeu – Gjergj Kastrioti ,
Of, aman, aman, aman-e,
O, për dorën –e ,
Për shpatën tënde ,
Aman, aman-e !
Çka ka bjeshka që po dridhet ?
Skënderbeu në te po ngjitet !
Skënderbeu në te po ngjitet ,
Of, aman, aman, aman-e ,
O, për turqit –e ,
Për kokën e tyre,
Aman, aman-e !
Çka ka bjeshka që ushton-e ?
Skënderbeu , o, po lufton –e !
Skënderbeu , o, po lufton –e ,
Of, aman, aman, aman –e ,
O, për turqit – e ,
Për kokën e tyre ,
Aman, aman-e !
Çka ka Pasha , që po qan-e ?
Skënderbeu , o, fjalë po i çon-e !
Skënderbeu , o, fjalë po i çon-e ,
Of, aman, aman, aman-e ,
O , për turqit –e ,
Për kokën e Pashës ,
Aman, aman-e !
Jepi ujë , o, me dorën tënde ,
Ti, moj vasha , o, përmetare !
Ti, moj vasha , o, përmetare ,
Of, aman, aman, aman-e ,
O, për belin –e ,
Për kokën tënde ,
Aman, aman-e !
*****
Kënduar nga këngëtarë të ndryshëm të trojeve shqiptare .
6. O KRYETRIMI I SHQIPTARISË
O, Kryetrimi i shqiptarisë ,
Ja le namin krejt Turqisë ,
E kjo ke mretni e madhe ,
Skënderbeu i duel për ballë !
Qysh të vogël e kanë robnue ,
Me vëlla t’ madh , larg e kanë que ,
Vëllaun e madh ja kanë helmue ,
Thanë – kta t’ voglin domë me e mësue ,
Ky Shqypninë , ka me e harrue –
Tash për turqë ka me luftue !
Del i mirë se asht i rodit ,
Asht i biri i Gjon Kastriotit !
Nana e vet m’i ka thanë –
Dert mos ki për babë e nanë ,
Mos harro kurrë venin tanë !
Për t’ mirë zanin ta kemi ni –
Në çdo luftë ke korrë trimni !
N’ dyluftime je kanë bujarë –
Kha po gëzohen këta shqiptarë !
Sod për sod kemi marue –
Gjithkah turqit na kanë kaplue ,
Shqiptar – emën rrallë me nije ,
Ata turqi – osmanlie ,
Emnin Gjergj , bir, ta kanë hjekë –
Ta dhanë emnin Skënderbeg !
Me luejt shpatën , ty, t’ kanë mësue ,
Veç për turqë , ti, me luftue !
Nana n’ letër t’ ka pas shkrue –
Kurrë Shqypninë , mos me e harrue !
Shumë luftimet ky i bani ,
E deshti turku dhe Sulltani –
Skënderbeut po i ndihet zani !
Larg po i ndihet zani i tij –
Ka dalë trim për mrekulli !
Kur ja mrrini kulmin trimnisë –
Deshti me i nda prej Turqisë !
-Nuk jam turk Anadolli –
Jam shqiptar i lemë n’ Shqypni !
Shpejt fermanin me ma dhanë ,
Qysh se moti m’ ke pas thanë !
N’ dyluftime ta kam ruejt vatanin ,
M’ ke pas thanë – ta jap fermanin !
Hiq s’i lake me u mendue –
S’ patën qare pa ia lëshue !
Ndjeu Sulltani e ish idhnue –
Shumë ushtri n’ Shqypni ka que !
Kush po i pret gjithë këtë ushtri ?
Skënderbeu me shokët e tij !
U nis beteja , o, haj medet –
Po flakërojnë shpatat përpjetë !
Zdritke nata si t’ ish dielli ,
Bash si t’ bijshin gacat prej qielli !
Dhamtë e Gjergjit po qitshin gaca –
Për dy anët po i prejke shpata !
Skënderbeg , he trim i parë –
Sulm po banë me pak shqiptarë !
Shkojke gjaku bash si lumi –
Ja dha naltë deri te guni !
Lumi i gjakut tuj ushtue –
Nisen turqit me u frigue !
Nisen turqit të tanë me ikë –
Shumë janë pre , në gjak janë mytë !
Vetojnë shpatat si vetima –
Nja mi nja na rajshin trimat !
Skënderbeg , he mrekulli –
S’ e harrove nanën Shqypni !
Ruejte kombin e shqiptarisë –
N’ luftë të parë të historisë !
*****
Kënduar nga Augustin Prendi – UKA .
7. SKËNDERBEU KE GURI I VASHËS
Çoi selam , aj Sulltan Murati –
Tanë ordinë të ma bani gati ,
Nën komandën e Dervish Pashës ,
Me luftu’ , o, ke Guri i Vashës !
Nisen t’ rij, o tha, pleq nizam-e ,
S’ lanë xhamia pa falë aksham –e !
Nuk lanë lutje , o, pa i ba Zotit –
Me zhdukë racën e Kastriotit !
Mu n’ Varosh , o ke Guri i Vashës –
Buçet turma fashiste turke ,
Shtyhen forcat , o , prej ushtris- e ,
Thyhen trupat , o, të Turqis-e !
Skënderbeu , me shpatë në dor –e ,
Paska dalë , o, ke Guri i Vashës ,
Çka po i thjoka , bre, Dervish Pashës –
Po m’ ja ngrihka dyzgjijtë e atit ,
Shumë selam t’ mi bajsh Sulltan Muratit !
Thuej sado , o, me shumë taborre ,
Krejt n’ Varosh kam me t’i mbjell n’ vorre !
Se me gjak , o, t’ Anadollakut –
Ka me u skuqë dhe Lugina e Matit !
Kush asht ai, o, që do t’ guxoj-e ,
Vendin tonë, që do ta sulmoj-e ,
Ka me ikë, o, si këlysh zagari ,
Se me gjak , o, e mbjell shqiptari !
*****
Kënduar nga Demir Krasniqi .
8. QANË SULLTANI
O, po qanë Sulltani, prej trishtimi ,
O, se lajm i zi n’ Stamboll na i mbrrini ,
O, more , se n’ Kosovë u dha kushtrimi ,
O, po thirrje banë Hasan Prishtina –
O, more , çohi vëllazën, çohi trima ,
O, po rrokni armët , ju, të tanë ,
O, more Zot – Vatanit , sot mej dalë !
O, more , n’ katër anët ushtoj deti –
O, more, mos u ngjallë ai Skënderbegi ?
O, kadal Sulltan, o more i shkret-e ,
O, more, Kastrioti nuk ka vdek-e !
O, more , nuk vdes shpirti i këtij luftari ,
O, jeton i gjallë n’ zemër shqiptari !
O, more, kurrë shqiptari s’ ka harrue ,
O, more , për liri , o, me luftue !
O, moj , kush ta rriti Kosovë – nderin ?
O, po Bajram Curri , Idriz Seferi ,
O, moj , Boletini , Ali Kelmendi ,
O, po dhe shumë tjerë që s’po i përmendi !
O, po ushtoj Gryka e Rugovës –
Oho, more t’ fortë qëndruen , o, bijtë e Kosovës !
*****
Kënduar nga këngëtarë të ndryshëm .
9. ME SHPATË N’ DORË KUSH PRIU I PARI
O, me shpatë n’ dorë , kush priu i pari ?
Skënderbeu , ai burrë shqiptari ,
Asht i lemë n’ atë trimen Krujë ,
E nuk duroj , o, ta shkel , o, i huj!
O, qysh se t’ vogël , o, tetëvjeçarë ,
Turqt me veti , o, e kanë marrë ,
Me e lujtë shpatën , o, e kanë mësu’,
O, veç për turq, more , me luftu’ !
O, kur u rrit e çuen ushtarë ,
E graduen , e banë të parë .
I duel zani , o, në Ballkan ,
O, tuj luftu’ , more, si luan .
O, nanë e babë, more , edhe motër ,
Po i çojnë letër , o, Gjergjit t’ vogël ,
T’fala me sh’ndet , selam po i bajnë ,
E mos harro biro, vendin tand !
O, kur e muer atë letër t’ mallit ,
Po i kujtohen , o , fjalët e plakut ,
Kur ia thojke , o , rreth oxhakut ,
Kur ia thojke , o, baba i tij :
“O, ma mirë dekë, se gjallë n’ robni!”
Atë’herë lott po i shkojnë si gurra ,
Fjalë Sulltanit po i çon me turra ,
Dy vëllazni, more, pre mi ki ,
E tash po kthehem , o, për Shqipni !
O, kur ja thanë, more , fjalët Sulltanit ,
Fort i briti , ai, Ballabanit –
Shumë ushtri në Krujë me i çu’,
E t’ gjallë , a t’ dekt Gjergjin ta du ‘!...
O, na u kthy Gjergji , o, si vetima ,
Na i bashkoi në Lezhë do trima ,
Po ua thot’ dy a tri fjalë :
“Pashë atë besën , o, qi e kem’ t’ parë !...
Na t’i lidhim , o, duer e gishta ,
E t’i lamë xhamia e kisha !
Do t’ luftojmë me pleq e t’ ri ,
E t’ ruejm’ atdhen’ , more , t’ ruejm ‘ lirinë !”
O, na u nis lufta , na u nis beteja ,
Sulm po bajnë trimat si rr’feja .
Dhambët e Gjergjit po i qitshin flakë ,
E n’ dy anët trimi po pret me shpatë .
O, shka po bante , o, motra Mrika ,
Nuk e dinte se qysh asht hika ,
Krah për krah me shok’t e vet ,
Po lufton , po u jep gajret !
Ballë për ballë me pashallarë ,
Nji ushtri me pak shqiptarë ,
I duel hakut , o, osmanlisë ,
E i zbardhi f’tyrën e shqiptarisë .
O, Skënderbeu , more , i hypi atit ,
I çoi fjalë Sulltan Muratit :
“T’ koftë dhanë fjala e besa e Zotit ,
Nuk do t’ lamë n’ tokë t’ Kastriotit !
Mos t’ lakmon kush në këtë votër ,
Se na vdesim i madh e i vogël !
Se na vdesim , o, gra e fëmijë ,
O, për flamur , more , kuqezi !”
*****
Kënduar nga Qamili i Vogël – Muhaxhiri , autor i tekstit .
10. VDEKJA E SKËNDERBEUT
Kah tregu nji brimë u ndie
Që shkoj tue shtue mënerën
Nër zemra e nër pallate
Ishte Lekë Dukagjini
Ballin përpiçte me i dorë
Ndukte leshin me i tjetër
Trandu Arbëri – jeta na u err për ne
Skënderbeu s’ asht ma
Eni zoja e bujarë
Eni të vapshta e ushtarë
Eni kjani me idhnim
Sot të vorrfën metët
Pa tatë që ju këshillonte
Ju këshillonte – i zbatoshi
Ndien shpijat e u trandën
Ndien malet e u ndanë
Shkrepat mbi kroje ranë
Kumbonaret e kishave
Xunë me tingllue së vedi !
Autor i panjohur
*****
Mblodhi , shënoi dhe i përgatiti për shtyp: Demir Krasniqi , arsimtar i kulturës muzikore , i lindur më 10.02.1950 , në fshatin Tugjec të Malësisë së Gollakut, komuna e Kamenicës . Jeton në Gjilan .
Gjilan, më 08.01.2012. Demir KRASNIQI