Adem Zaplluzha: Patën thënë

ADEM ZAPLLUZHA

PATËN THËNË

(Mikut tim dhe rapsodit Agim Gashi)

Ai i donte kuajt e egër

I donte edhe stërkalat e shiut

Kur kishte takim me kujtesën

Nuk shtinte gjumë në sy

Herë këndonte ninulla

E herë

Këngët majëkrahut

Që dëgjoheshin tej shtatë fshatrave

Kishte lindur me këmishë

Thanë se nuk e merrte plumbi

Kafshonte erën

Kur ua prishte flokët nuseve

Me xhelozi ruante baladat

Dhe këndonte një këngë të vjetër

Për mëmëdheun e robëruar luftoi

Por nuk preu asnjëherë kurban

Ai vet kurrë nuk kishte fluturuar

Por i mësonte fëmijët se si fluturohet

Nëpër hapësirat e ndaluara të atdheut

Për çdo mëngjes i shënonte stinorët

Patën thënë se nuk e merrte plumbi

Sa herë që e burgosnin

Po aq herë kthehej ngadhënjimtar

Për t’i kënduar këngë atdheut