Sinan Kamberaj: Antihymni i Flamurit me Gjashtë Yje

Sinan Kamberaj, u lind në Syriganë të Burimit (Istog) më 1949. Ka mbaruar studimet për Gjuhë e Letërsinë Fakultetin Filozofik të Prishtinës. Ka qenë gazetar i Gazetës së Studentëve “Bota e Re”, gazetar i kulturës në Televizionin e Prishtinës dhe redaktor i Gazetës Shqiptare-Amerikane “Illyria” në New York. Ka botuar poezi e skica satirike në shtypin e Kosovës. Jeton me familje në New York.

 

 

(Nga poema satirike "Këngë ç'heroike kosovare - Epopeja e Qeverise", Prishtinë 2010)

 

Sinan Kamberaj

 

Antihymni i Flamurit me Gjashtë Yje

 

(Kënga e Parë)

 

Ky është Antihymni i Flamurit me Gjashtë Yje, të cilin e këndoi Rapsodi i Pavarur Popullor, Sabri Kaçamaku, në një dasmë të madhe, në një fshat të decentralizuar përtej Urës së Ibrit, në Veri të Mitrovicës.

Me akuzën se e kishte kaluar Urën pa leje, EULEX-i e kishte denuar Z. Kaçamaku me një muaj burg shtëpiak.

Por, ku ta vuante burgun i shkreti Sadri? Tash njëmbëdhjetë vjet, qëkur serbët ia kishin djegë shtëpinë, ai jeton fikall vetëm nëpyllin e fshatit, pa kulm mbi krye!

Qeveria është në dijeni për hallin e Sadriut, por edhe për këngët që po i këndon ai nëpër ziafete.

 

Ne e nisem, ne e kallem!

Ne e bëmë e ne shpallem!

Ne e morem, ne e mbrojmë!

Dhe, s’e lëshojmë!

 

Prej Postit veç ay largohet

Që është i lindur - budallë!

Atdheu veç njëherë çlirohet -

Dy herë s’i dilet në ballë!

 

Gënjeshtra kanë qenë të gjitha

Ç’janë thënë deri sot mbi dhe!

T’vërtetën e thotë Historia -

Dhe, Ajo fillon me - NE!

 

Prej Postit, pra, veç ay largohet

Që është hut, kokrra e hajvanit!

Kush është trim e nuk frigohet

Lëkurën ia rrjep - Vatanit!

 

Vatanit me thonj lëkurën ia rrjep -

Për daulle, xhybe, rryp, a uçkur!

Dhe, që të mbahet mend ndër breza -

Si bëhet lëkurë e Vatanit - Flamur!

 

Oi, oi, oi!

------------------

 

Ç’i tha Presidentit Zana e   Muçibabës!

 

(Kanga e shtatë)

 

I stërkënaqun me koalicionin qeveritar, por edhe i lodhun shumë nga ritmi i shpejtë i zhvillimeve mbrenda vendit dhe përreth, Presidenti ynë, kohëve të fundit jo rrallë po flinte ma shumë se ç‘duhej. Ora e Maleve të Gollakut, ajo e Muçibabës, e qorton paksa Presidentin dhe e fton të jetë ma syçelë për procesin e shtetndërtimit, nëpër të cilin po rru-gë-ton Kosova jonë e Pavarur, Sovrane, Multietnike, Demokratike…

 

N’Prishtinë ka ra nata, pa rrymë e pa hanë!

Presidentin tonë - gjumi na e kish nxanë!

Ora e Muçibabës e preku leht’ n’krah:

- Zgjohu, o President, po bahet sabah!

 

Çou, o President, shiko Vilajetin -

Se me Karar-Name Ti e shpreh Unitetin!

Për kolltuqe t’buta, saraje e ofiqe -

Ka rrezik Vatani me t’u nda n’çifliqe!

 

Cep e m’cep Kosova t’asht nxjerrë n’Ankand

T’janë shitë fusha e male - si n’Zululand!

Gjithë irati i shtetit, n’Spin-off e n’Tendere!

Fabrika e miniera - krejt me dallavere!

 

Qytetarët e fshatrave kanë ra n’Kryeqytet

Arat - krejt batall, livadhet - mbetë shkret!

Kanë braktis’ kopshtije, kullosa e zabele

Kravatat në dorë - hygjym e n’fotele!

 

Orës seç na i rridhnin fjalë e lot - lumë

Presidenti ynë - ia kish’ futë prap’ gjumë!

- Zgjohu, President, sa nuk asht ba vonë!

Se kur flen i Pari - s’e njeh qeni t’zonë!

 

Në mes t’Vilajetit, që e keni shpallë shtet

T’i ka mbledhë UNMIK-u, tebdil - qe dhetë vjet:

(N’biçim t’Bordeve të veta dhe të Agjencive)

Shumë Grupe t’Hajdutëve dhe të Dilinxhive!

 

Nga Liga e Sarhoshëve dhe e Dallkaukëve,

Rrencat e Pavarur nga Këshilli i Kopukëve

Nga Klubi i Llaskucëve - Lobi i Hilexhive

Grupi i Edepsuzëve dhe i Dallaverexhive!

 

Ky lloj mahlukati, po bani e u ba bashkë -

Gjithë paret e pista, do t’i “shpërlajnë” jashtë!

Po s’u dolët përballë dhe po i latë rahat -

Pa u ba motmoti - do t’fleni n’nji shtrat!

 

Më vjen keq për Ju, që hoq’t t’zitë e ullinit

N’procesin e randë - Oh! të ‘shtet-ndër-ti-mit‘!

Se mileti i shkretë asht mësu’ kështu ngusht

Jeton, me nder Jush, veç me k… n’grusht!

 

Qëkur e batë shtetin - shpallë me Di-nji-tet:

Mjekët janë ba xharrahë, kasap’t - deputetë!

Profesor’t - taksistë, kovaçët - inxhinierë

Telallët - gazetarë, fajdexhijtë - bankierë!

 

Ministrat - tregtarë, hajdut’t - “biznesmenë”

Nallbanët - “artistë“, çatipat - sejmenë.

Mihësit e varrezave janë ba “ndërtimtarë”

Nipa e djem t’tezeve, kalavesh - “këshilltarë“!

 

Mirë ka thanë nji natë - Sabri Kaçamaku

N’nji syneti t’madhe, n’ish-katundin Dubë:

“Kam drojë, - tha i shkreti, - mos më ngjesin bisht

Se këtij Hyqymeti - i kisha thanë: Kubë!

 

Mos me kanë inati - i Shtrigës Serbi -

Rrafsh 100 vjet - ka dashtë me na zhbi!

Sa për këtë Pari, dalë në ballë t’Vatanit -

Do t’kish’ ikë mileti përtej Oqeanit!

 

Ç’na paska nemë Zoti, prej senes s’Hyrrjetit -

Mos m’na u nda gazepi der’ n’Ditë t’Kiametit!

Por, n’zgjedhjet e reja që do t’mbahen n’mot -

Ka ba be mileti, nji be n’t’Madhin Zot:

 

- Po vazhduet kështu - me kopalla e dokrra

N’vend se nga nji votë - do t’ua jepë Dy k..okrra!

-------------------

 

Konferencë me habertarë:  “Gëzuar 2010, ‘11...’20!”

 

(Kënga e Tetë)

 

Në këtë këngë bëhet fjalë për Konferencën e shtypit të fundvitit 2009 të Lidershipit tonë, Presidentit dhe Kryeministrit.

Imagjinojini dy trupa, të bashkuar si një, pra - një trup me dy koka, si ato të shqiponjës së Flamurit të Shtetit Tonë Fqinj, - me katër sy, që vështrojnë të ardhmen e ndritur; katër vesh që presin njohje të reja të shtetit tonë; katër duar që presin me dy palë gërshërë shirita inaugurimi  urash, rrugësh, sheshesh…

Ata shkojnë bashkë në Amerikë e në Evropë, nënshkruajnë bashkë, me katër duar, marrëveshje e protokolle...

Ata mbajnë bashkë konferenca shtypi, flasin me një gojë…Ata kanë një interes madhor të përbashkët!…

Ishalla!

 

Lidershipi se ç’na i mblodhi

N’Kryesaraj - habertarët!

N’Konferencën e Fundvitit -

T’u shpërndajë - “margaritarët“!

 

Ekspertë, lumë si ata, vetë

Komentojnë për Sigurinë -

Për Klimën e Korrupsionin

Për Lirinë - Demokracinë!

 

Herë duet, herë veç e veç -

Zbërthejnë çështje aktuale:

Si përçiten dhitë n’Marec -

E deri te Ngrohja Globale!

 

Presidenti dhe Kryeministri:

 

- Gëzuar, o djem të kalemit,

T’ekranit e të mikrofonit!

 

Habertarët:

 

- Për shum’ mot, Ju burra t’Shtetit

T’Jaranisë, pra - t’Koalicionit!

 

Habertarët:

 

- Falë mendjes që ua dha Zoti

Po e ruani Stabilitetin!

Veç n’Kosovë e në Ballkan -

Apo dhe - në tërë Planetin?

 

Presidenti dhe Kryeministri:

 

- Kosovën na e ruan Zoti -

Ajo e ka Orën e vet!

Sot jem’ ne - mbas 20 vjetësh

Të tjerët mund t’vijnë n’pushtet!

 

Apo, jo?

 

Habertarët:

 

- Po, mor, po! Ne jem’ rahat!

Ishalla - e mbani ma gjat‘!

 

Presidenti:

 

- Kë votuat, kë s’votuat -

Nuk çon fare në kandar!

Ne bëjmë shpejt koalicione

Për “interesin kombëtar“!

 

 

Të dy krahët i bëjmë bashkë -

T’djathtë e t’majtë, si një vëlla!

Kur është “Procesi” n’rrezik -

Bedena bëhemi - n’Kala!

 

Apo, jo?

 

Habertarët:

 

Po, mor, po! Po si jo?

Se ashtu e do Zakoni!

Ndaj, na rrofshit sa malet! -

Dhe, Ju rroftë Koalicioni!

 

Kryeministri:

 

- Ju do të thoni:…Opozita?!

Ç’t’i bëjmë ne asaj të ngrate?

Edhe kur marrin tendere -

Na e çajnë trapin me debate!

 

Thonë: Kush vodhi n‘Polici?

N’Zyra t’saj - ditën me diell!

Katër thasë me Dosje t’Rënda

Dhe tre, bardh si bora - “miell”!

 

- Kush vodhi? - pyesim dhe ne!

Por, s’ndërhyjmë në Drejtësi!

Njëqind vjet le t’zgjasë hetimi

Krimi mbetet prapë - i ri!

 

Thonë: Po vlon korrupsioni!

Thonë: Të gjithë hajdutë jeni!

Thonë: Jo pak, po -  miliona!

Vidhni, se Ju shpirt nuk keni!

 

Dhe, ia fusin …kot së koti -

Për t’bërë opinion tek bota:

Se - qenkemi pronarë Pallatesh!

Dhe, mbi t’gjitha - vjedhim vota!…

 

Ne u themi: Ju çfarë bënit -

Kur ishit hyqymet - dikur?

Nga dhjami desh pëlcisnit -

Ne “Në Hije” - asht e lëkurë!

 

A po jo?

 

Habertarët:

 

Po, mor, po! Asht e lëkurë!

Vërtet ishit Ju - dikur!

 

Kryeministri:

 

- Nuk është kështu gjith’ Opozita

Një pjesë ka fjalor t’përdalë!

Kur ua kujtojmë ish-ministrat -

E fusin bishtin nën shalë!

 

Presidenti:

 

Ne at’herë vërtet bashkë ishim

Me Ata… si tash me Këta…

As at’herë  - e as tash s’jemi

Veç me Këta… o me Ata!

Habertarët:

 

Po, mor, mirë - s‘po i jepni lak!

Me Këta… e me Ata - nga pak!

 

Kryeministri:

 

- Ju do të thoni: “Zanzi-Bari“!

N’Koalicion - ç’bëri vaki?

Me vetëdije e bëtë Puçin -

Apo ishit bërë tapë - raki?!

 

- Do t‘jua them, sinqerisht!

Midis nesh kish’ hyrë një dreq!

Por, në saje t’Zyrës s’Madhe -

Sot prap’ hamë bashk’ - përpeq!

 

Habertarët:

 

O, bo-bo, çfarë nuk bën Dreqi!

Na rroftë Zyra dhe - përpeqi!

 

Presidenti:

 

- Ju do t’thoni: Vetëvendosja?!

(Me OJQ s‘bëjmë muhabet!)

Po Ju jap një vlerësim t’tyre -

Dhe, pastaj gjykoni vet‘:

 

“Si të majtët, si të djathtët -

Janë njësoj - s’dallojnë aspak

Ditën shahen, grinden, zihen -

N’mbrëmje hanë në një çanak!

 

Dhe, çanaku është i madh -

I thellë po, por grykëngusht

Llaskucët marrin me gishta,

Kodoshët marrin me grusht“!

 

- Ja çfarë thonë, ja kush janë!

T’Vetëvendosjes - djemat tanë!

 

Habertarët:

 

O bo-bo, ç’çuna shejtanë!

 

Presidenti dhe Kryeministri:

 

- Ju do të thoni: Po, Veriu?

A do t’zgjidhet, si është puna?

Si ta shtrijmë sovranitetin -

N’Mitrovicë dhe n’tri Komuna?

 

Ne Ju themi: Fleni dathë!

Po e hartojmë nji Strategji:

I rikthyem, a s’i rikthyem -

Vatani do t’ketë prapë Veri!

 

Habertarët:

 

- Po mor, po, Veri do t‘kemi! -

Sakat, por ç‘t’bëjmë, o burra!

S’bëhet nami, pse nën Ibër -

Veriu të na mbesë - tek Ura!

 

Kryeministri:

 

- Ju do të thoni: Papunësia!?

Mund t’Ju them - fleni rahat!

Jo Arsimi… jo Shëndetësia -

S’ndreqen t’gjitha n’nji mandat!

 

Apo jo?!

 

Habertarët:

 

Jo, mor, s‘mërzitet mileti -

Për shëndetësi as për arsim!

Kryeni Ju doktoraturat -

Keni vuejtë shum’ në mërgim!

 

Presidenti:

 

- Po na shajnë për nepotizëm!

Por nuk kanë të drejtë aspak!

Ne e fusim n’punë ndo’j dhëndërr

Dhe, tek-tuk ndo’i baxhanak!

 

…E po, dhe ndo’i djalë, a vëlla

E fusim nëpër Borde(le)

Pse s‘kanë shkollë - s’mund t’i lëmë

çobanë dhensh - nëpër zabele!

 

A po, jo?

 

Habertarët:

 

- Jo, jo s’lihen ata burra!

Me dhen as me dhi ndër shkurra!

Dhe po t’kenë veç pak haber -

E kryejnë dhe ndonji “Master“!

 

Presidenti dhe Kryeministri:

 

- Por, një gjë s’e kemi t’qartë!

Mileti… pse ka kaq siklet ?:

“Jo, s’durohet Qeveria!

Jo, këta s‘dijnë me ba shtet“!

 

- E duruat dreqin e t’birin

Qe nji shekull, mbi kurriz:

Kriminelë, xhelatë, hajvanë

Shkje t’çartun, edepsyzë!

 

Duroni, xhanëm, dhe pak!

Sokolat, djemtë tanë azganë -

Vërtet, s’dinë si bëhet shteti

Po, ama - Tanët janë!

 

Apo, jo?!

 

Habertarët:

 

- Po, mor, po! Tanët janë!

Na rrofshin djemat luanë!

 

Kryeminstri:

 

- Ju do t’thoni: ç‘presim n‘mot?

- Do i heqim yrrnek sefasë!

Ngritje rrogash - qindpërçyl!

Nga - “Tepsi e Bakllavasë“!

 

A po jo?!

 

Habertarët:

 

Po, mor po, e keni hak -

Çylpërqind - mbase është pak!

 

 

Presidenti:

 

- Sa u përket njohjeve t’reja

Me meritë, jo për sevap! -

Do t’na njohin aq shum’ shtete -

Zor e kem’ m’u dhanë xhevap!

 

 

…Ujëdhesat e Buggu - Rahdit,

N’Mammu Pigg e Khaka-Dadhë…

Ato, dhe nja njëqind t’tjera -

Varg e varg - po presin n’radhë!

 

Apo, jo!

 

Habertarët:

 

Oh, ho-ho!

 

Kryeministri:

 

- NATO na i mbron kufijtë

Me ushtarë e me Traktate!

Qeveria e ruan miletin -

Të mos mbushet taksirate!

 

Të mos çmendet nga lezeti

I Shtetit me te ri n’Ballkan!

Të mos ikë pa pasaporta -

Të kërkojë - tjetër Vatan!

 

Apo, jo?!

 

Habertarët:

 

- Po, mor, po! Rroftë Qeveria!

Budallenjtë s’dinë ç’është liria!

 

Kryeministri:

 

- Kjo është Qeveri e popullit!

Ndaj, mos bëni shumë yrysh -

Rrjedh nga Ju dhe është e Juaja!

Tranzicioni nuk shkon ndrysh!

 

- Qëkur është kurdisë dynjaja

Mbani mend, o habertarë:

Me ujë, zjarr e hyqymet -

Luan veç ai që është i marrë!

 

Shumë selam redaktorëve -

Për çfarë ndodh’, jepni habere!

Shtypi i lirë…e  i “pavarur”

Meriton dhe ca … Tendere!

 

 

U shkreh n’vajë nga emocionet

Lidershipi - për Atdhe:

- Gëzuar 2010, ’11... ‘20-tën!

Ne me Ju e Ju me Ne!

 

Habertarët:

 

Gëzuar! Aq gjatë - me Ju?

O, ku-ku!

 

(Nga poema satirike "Këngë çheroike kosovare - Epopeja e Qeverisë", Prishtinë 2010)