Demir Krasniqi: Kategoritë e konsumatorëve të KEK-ut

Parodi humoristike – satirike :

 

KATEGORITË E KONSUMATORËVE TË KEK-ut

 

Shkruan: Demir KRASNIQI

 

Ministritë në këmbë janë qua –

Drejtoritë i kanë formua !

Shumë ekspertë kanë porositë –

Për  me i nda  kategoritë !

 

Se si rrymën me e pagua –

N’ humbje KEK-u mos me shkua !

Me i nda n’ grupe konsumatorët –

Për me i shitë gjeneratorët !...

 

Me i marrë n’ qafë popullin e gjorë –

Për shpenzime me i shpallë fajtorë !

Me ua marrë paratë në dorë –

O me hatër , o me zor !

 

N’ kategorinë “A” – janë arsimtarët ,

Ata rrymën paguajnë ma t’ parët .

N’ kategorinë “B” – i kanë lanë bujqit ,

Inkasantët iu shkojnë si ujqit !

 

N’ kategorinë “C” – janë cimerët ,

S’ kanë para t’ paguajnë të mjerët !

N’ kategorinë “Ç” – janë çobanët ,

Kush s’ paguan – ua mbyllin stanet !

 

N’ kategorinë “D” – janë deputetët ,

S’ paguajnë rrymën si profetët !

N’ kategorinë “DH” – janë dhiarët ,

T’ paguajnë rrymë – shesin tinarët !

 

N’ kategorinë “E” – janë esnafët ,

Paguajnë rrymën – i pinë kafet .

N’ kategorinë “Ë” – janë ëmbëltoret ,

Paguajnë rrymë nga akulloret ...

 

N’ kategorinë “F” – janë fukaraja ,

Kush s’ paguan – e zen belaja !

N’ kategorinë “G” – janë gardianët ,

Nuk paguajnë se i ruajnë zandanët !

 

N’ kategorinë “GJ” – janë gjyqtarët ,

S’ guxon kush t’ua kërkojë paret !

N’ kategorinë “ H” – janë hajdutët ,

Atyre rryma s’ guxon t’ iu këputet !

 

N’ kategorinë “I” – janë intelektualët ,

Paguajnë rrymë për idealet ...

N’ kategorinë “J” – janë jetimët ,

Paguajnë rrymë – s’ duan ndëshkimet ...

 

N’ kategorinë “K” – janë komandantët ,

S’ paguajnë rrymë, se ua thyejnë dhëmbët !

N’ kategorinë “ L” – janë liderët ,

S’ paguajnë rrymë, se i bëjnë beteret !

 

N’ kategorinë “LL” – llamba t’ vajgurit ,

Për fshatarët n’ shtëpi prej gurit !

N’ kategorinë “ M” – janë ministrat ,

S’ paguajnë rrymë , as s’ japin vitrat !

 

N’ kategorinë “N” – është nëntoka ,

S’ paguajnë rrymë , se ju shkon koka !

N’ kategorinë “ NJ” – njerëzit n’ sokaçe ,

Që s’ kanë bukë, as s’ kanë ilaçe !...

 

N’ kategorinë “O” -  opozitarët ,

S’ paguajnë rrymë , se nuk janë t’ parët !

N’ kategorinë “P” – janë policia ,

S’ guxon kush me u shkua te shpija !

 

N’ kategorinë “Q” – qeveritarët ,

S’ guxon kush t’ ua kërkojë paret !

N’ kategorinë “R” – janë rahmetlinjtë ,

S’ kanë qirinj mbi varr për dritë !

 

N’ kategorinë “RR” – janë rrebelat ,

S’ guxon kush me ua këputë telat !

N’ kategorinë “S” – janë surlaxhinjtë ,

Paguajnë rrymën nga synetitë !

 

N’ kategorinë “SH” – janë sharrëxhinjtë ,

Kush s’ paguan – ia thyejnë brinjët !

N’ kategorinë “T” – janë tupanxhinjtë ,

Paguajnë rrymën si  dasmaxhinjtë !

 

 

N’ kategorinë “TH” – janë thatanikët ,

Paguajnë rrymën deri t’ fiket !

N’ kategorinë “U” – uzurpatorët ,

S’ paguajnë rrymë , se i kanë mentorët !

 

N’ kategorinë “V” –janë varrexhinjtë ,

Hapin varret hiq pa dritë !

N’ kategorinë “X” – janë xehetarët ,

Paguajnë rrymën ndër të parët .

 

N’ kategorinë “ XH” – janë xharrahët ,

S’ paguajnë rrymë , se t’ presin krahët !

N’ kategorinë “ Y” – yjet e estradës ,

S’ paguajnë rrymë , si n’ bahçe t’ babës !

 

N’ kategorinë “Z” – janë zengjinët ,

S’ paguajnë rrymë , se i ruajnë kursimet !

N’ kategorinë “ZH” – janë zhavelat ,

Hipin vet e i lidhin telat !

 

Gjilan, më 22.10.2011.