E diele, 24.01.2021, 09:24 PM (GMT)

Kulturë » Lushaj

Zeqir Lushaj: Vjeshtë në Tropojë

E diele, 06.11.2011, 07:56 PM


VJESHTË, NË TROPOJË

 

-Reportazh në vargje –

 

Nga Zeqir Lushaj

 

Komshia e dimrit, bardhokan,

Vjeshta beriqetlie, në Tropojë,

M’i çon mallet, ma tremb gjumin,

Një cokamë sakice, akshamit-vonë !     *

…!

Stina e vjeshtës, shkund supet,

Mundimqarëve, ju len bereqetin,

Të mirat, vijnë rrotull shtëpisë,

Secili përpiqet, të ndali të vetën.

 

Të gjithë, sot, bajnë e mbledhin,

Si grabuja sanën, për në mullar,

Me krozhën, me kosh a me thes,

Gjithkush, qet diçka në hambar.

 

Ah, sa e mirë vjeshta në Tropojë,

Arra, molla, gështenja, pasul, drithë…,

Një vijë (e vogel) uji, “ban hafije”,

…Sterpiket, te kazani i rakisë !

 

Koshat e drithit, e lama plot,

Tharqet mbushur, plot me fruta,

Posterma e majme, pret Shënkollin,

Nëpër oda, fillon, loja me kapuça !        **

 

Kur bora reshë, në Shkëlzen,

Lajmëron: -Gafil, mos me ju gjetë !

Ju pata thanë, vjet, kur u largova:

Do takohemi, përsëri, në vjeshtë !

…!

Komshia e dimnit, bardhokan,

Vjeshta beriqetlie , në Tropojë,

M’i  çon mallet, ma tremb gjumin,

Një cokamë sakice, akshamit-vonë !

./.

*nëpër muzg, kur shkurtohen zakonisht, drutë e zjarrit.

**lojë popullore, tradicionale e veriut, sidomos, në dimër.

-------------------------------

 

MIRAZI PER SË GJALLI !

 

- Autokritikë…, demokratike -

(Fletë ditari, usa, vjeshtë, 2011)

 

 

Po, po, sot,

Sot, e përditë kësaj vjeshte,

Sikur i shoh bereqetet,

Arrat, rrushin, gështenjat,

Në pronat e mia në Gri,

Ka i hanë, gerat e grënxat,

 

Mundimi i Babës,

Gjysh e Katragjyshit,

(Ashtu, si vet ata)

…Bjen e kalbet përtokë…!!

 

Unë, ”pronar-zeza” , i tyre,

Me një strajcë mbas krahut,

(Si 30 vjeçari…, i Migjenit),

Kërkoj punë…, nëpër Botë !!

…!

E meritoj, e meritoj,

E kam hallall edhe Unë,

”Një Punë !”.

Aaah, s’po ka kush ma jep,

Fisklen e thanës, hithren e regjun,

…Shqelmin…, Dajakun…, Drun…!

…!

Le të shkelen, le të shkelen,

Të drejtat e Njeriut ,

(Bile, kjo është shumë-pak),

Veç, mirazi për së gjalli,

Të mos na ulej mbi konak !

./.

-------------------------------

SHTIGJET…

 

-Kujtime bjeshkëtare-

 

…!

Në Shtek të Dashit,

Nëpër zhare e imshta,

Mblidhja drethëza e boronica.

 

Në Shtek të Çetave,

Sa herë mbi rrasë u ula,

I thirra Prend Isufit në Mulaj.    *

 

Në Shtek të Tellës,

Mbeshtetur, m’njantë anë,

Kur i avytsha, numëroja gjanë !

 

Në Shtek të Oborrit,

Kur mshelja stanin,

Lidhsha Samurrin, lëshojsha Curranin !       *

 

Kur këndonin çikat,

Shtigjeve të bjeshkës,

I rrudhsha, pushkallës-samakreshtës !        *

…!

Shtigje-shtigje-shtigje…,

Të gjitha hapur në shpirtin tim,

I qiti mbas shpindës, shteku mërgim !

./.

*Prend Isufi, ose, Qorri i Mulajve, një burrë i njohur në Nikaj-Mërtur. Mbi Mulaj, është bjeshka ime.

*Samurri  e Currani, emra të qenëve .

*Pushkalla e samakreshta, armë që i prodhonim vet, në rini për të shprazur kapsolla çiftje.

----------------------------------------

 

MOTIV VJESHTE NË FSHAT

- Vargje vjeshtore

 

Elektricisti Hysni, ka bërë instalimet,  *

Nga linja kryesore deri në arë,

Ulur në rreth, si në bankete të mëdhaja,

Zhveshin misrin, shokët e mi fshatarë.

 

Bisedat rrokullisen për punën e madhe

Tek hedhin kallinjtë nga prehëri bukëplot,

Udhës së lodhshme 7-8 mujore,

Fshatarët e dashur, i gëzohen sot!

 

Kallinj–kallinj, grumbulli rritet,

Shoku, nuk shihet, në anën tjetër,

-Prite galanin, –thërret, një djal i ri,  **

Një qyfyre bujqish, një shaka e vjetër!

 

Fusha çlirohet nga barra e rëndë,

Tani është vonë: ora njëmbëdhjetë,

Misri në kosha e kashta mullarë,

“Natën e mirë”! -Na thonë për të fjetë. ***

./.

* Hysni Idrizi, elektriçisti i parë i fshatit tim, Gri.

** galan - misër me ngjyrë të zezë!

*** kjo vjershë është nxjerrë nga libri “Hija e vendlindjes”, faqe 56.

./.

(E shkruar në Gri,Tropojë në vitin  1976)

----------------------------------

AJO DITË…

…!

Ajo Ditë, që,

Në mes të Korrikut,

Alpet e mia,

Do të jen’ (gati si sot!)

…Krejt –shkret,

 

Ka ardhë Ajo,

Ajo, që kan thanë të parët,

Ajo Dita, me emrin: (kob-zi),

-…KIAMET !!

./.

Qafë-Luzhë, Tropojë, 21 gusht 2011



(Vota: 19 . Mesatare: 5/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora