Agim Gashi: Ta kesh folenë në shtratin tim

Agim Gashi

TA KESH FOLENË NË SHTRATIN TIM

Plot krenari rrugicës sime

çdo ditë kalon porsi princeshë,

më shton rrahjet e zemrës sime

shpirt e zemër m’i ngre peshë.

Kaçurrelat për midis ballit

bukur të rrinë e hijeshojnë, 

si drenushë që vjen prej malit

me admirim të gjithë të shikojnë.

Gjiri yt mbi gjoks gufuar

si shalqiri plot ëmbëlsi,

shpirt e zemër m’i ka pushtuar

jeta ime merr jetë nga ty.

Belit tënd prej një atleteje

s’ka njeri që s’i fal shikimin,

sytë e tu si kaltërim në dete,

hipnotizojnë gjithë njerëzimin.

Trupi yt si ngjala e Drinit,

gjithë rrugicës i jep hijeshi,

ti më ndrin si aurorë e agimit

në gjithë Arbërinë nuk ka si ti.

Përherë më mungon shikimi yt,

me ata sy shqiponje plot shkëlqim.

Mungesa jote më vret në shpirt,

dua ta kesh folenë në shtratin tim.