E enjte, 28.03.2024, 06:23 PM (GMT)

Kulturë

Daniel Gazulli: Vjeshtë

E marte, 01.06.2021, 06:05 PM


DANIEL GÀZULLI

VJESHTË

BARET BUZË DETI

Baret buzë deti,

ku s’degjohet ma

muzika e takave të lehta,

tek rrotullohen

në marramendje,

          të shkreta kanë ngelë.

Violinë e erës

se ç’luen një melodi

malinkonike

në gjethet e zverdhuna.

Melodite  e gëzueshme

braktisë baret kanë.

Ata do të luhen

gjithë pasion

në të tjera mbramje

dehëse.

DO TË DOJA …

Do të doja

që vargjet e mia

t’i përngjanin

horizontit mbi det

kur mbi te harkon ylberi,

e të shtrij krahët diellorë

lehtë e ngrohtë:

mes krahëve të mi,

mbështetun në gjoks,

të përgjumeshe në ekstazë

ti, e shtrejta ime.

Do të doja

që në mbramje

të të nanurisë

një melodi e re,

e të puthish tingujt

fluturakë

ndërsa tretën në gjithësi

e kthehen të pushojnë

në gjinin tand

përsëri.

Do të doja

pranë të të kisha ty ……

SHTERPËSI

Shtëpia asht kaq e bukur.

Dyer e dritare përsosmënisht mbyllë,

     - deri në ndryshkje -.

Oborri,

me një mur grih e të ftohtë

rrethue,

     - pa hymje -.

Si kjo shtëpi, kurrë e banueme,

si ky oborr, ku s’luejtën kurrë fëmijë,

ti,

mizorisht e ftohtë,

drejt fishkjes shkon

e mbas petaleve kurrë s’do të kesh frute.

NATË YJESH

Nga qielli i andërrave

u shkëput një yll dhe pushoi

në shpirtin tim:

ndriçimi se ç’më pushtoi

të gjithin

e nisa të luaja me yllin

der n’ agim.

Në qiell ishim a në tokë,

unë në zemrën tande a ti në timen,

as e dinim ku, as përse,

po vazhdonim t’luanim,

të përthitheshim,

der sa yjet n’qiell një nga një

se ç’u shuan, u tretën në gjithësi,

ndërsa ne të dehun, t’përqafuem,

dot nuk shuanim zjarrin

asesi.

PUTHMË DHE NJË HERË

Ç’je tretë në mendime, e dashuna ime?

Gazin në cep të buzëve

çfarë ta miklon?

Merr një tulipan

dhe hidhe në ujëvarë,

të kthehen valët n’ ylber

e t’i japin dritë vështrimit tand.

Sonte i kuq perëndimi ish.

E zjarrtë nata do të jetë.

Kokën struk në gjoksin tim,

prehje të ambël do të gjesh.

Ç’je tretë në mendime, e mira ime?

Puthmë dhe një herë

në do të flesh.

NËSE NJË DITË…

Nëse një ditë

të tjera erna do të fryejnë

e do të trazojnë

ngjyrat e piezazhit gjithë dritë,

që lulëzon në zemrat tona,

dhe dallgët do t’çajnë muret e brishtë

të një andërre që kurrë

e rrethueme nuk desht të ishte,

do të marr përsëri shtegëtimin

në kërkim të ngjyrave të përndame

në brigje të thepisuna

e me to të thur

një kangë dashunie.

Nëse një ditë

nga kjo histori dashunie

do të ketë ngelë vetëm kanga,

përsëri

njerëzit do të ndalen

e të stepun do të thonë:

E madhërishme ishte!



(Vota: 18 . Mesatare: 4/5)

Komentoni
Komenti:


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora