Sejdi Berisha: Ku qëndron kjo heshtja ime...

P o e z i

Sejdi BERISHA:

KU QËNDRON KJO HESHTJA IME...

Çdo ditë

E pëlcas këtë heshtjen time

Duke kërkuar atdheun

Nëpër damarët e gjakut tim

Dhe gjithnjë kjo ndrydhje malli

Kudo më ngatërrohet me këngën

Kur lodhem nga rrugëtimi

I tëri zhgrehëm në vaje

Pastaj

Ç’të bëj gjë tjetër

Përveç

Sërish e lë shtegun

Hapur për rrugëtim

E kafshoj Mollën e Kuqe

E puthi përcëllimin e nënës

Dhe digjem

Mbështetur në shikimin e babait

Duke thurë ëndrra fëmijërie

Pastaj

Zgjohem në gjirin e tokës

Dhe vazhdoj rrugëtimin

Besoni

Krejt është kështu

Nëse hamendeni

Atëherë

Vetëm bebëzën e syrit ma shikoni

Aty pinë ujë nusërie

Vashat e veshura me këmishë virgjërie

Ky rrugëtim kaq i ngatërruar

Formulë e ka tharmin nektarit

Qumështin e mjaltit

Me të cilin bëj një hartë të re

Sa madhështore

Toka ime plotë helm

Tejpërtej pezëm

Atëherë

Ku qëndron

Kjo heshtja ime PROTESTË!

(Pejë, e premte 24 qershor 2011)