Kulturë
Dy poezi nga Agim Doçi
E diele, 01.05.2011, 05:29 PM
Agim Doçi
KU ASHT UKSHIN HOTI?!…
Zot i madh gjithmonë t'jam lutë
Se i jemi po m'a futë!
Unë që t'lutem jam shqiptarë.
A ke kohë pak, me ma varë.
Tek ky Glob që rrotullohet
Asht dhe toka e shqiptarëve.
Zot, pash nderin a t'kujtohet?!
Ku i kam trojet e t'parëve?
Se jam komb nën 5 flamurë.
Komb që han mishin e vet.
Komb që vdes për diktaturë!
Trim, hajdut, dinsëz milet.
Për inatë të mullixhiut
Shkoj e flejë me vjehrrën tande.
Jam me tru të sherraxhiut
Që ngacmoj grenzat me krande.
Fol pra Zot! Ma zgjat pak dorën!
Më thotë bota:- qen bir qeni!
'Ej shqiptar, shko pyete Vlorën!
Brenda vetes dreqin keni!
Ke kulturë, por shkolla dogje!
Ke flori, por je zhelan!
Veç kur flenë s'merresh me llogje.
Vetë me vete del n'mejdan!
Ti që mbrojte Krishtërimin.
Ti që Fé ndërrove tre herë.
Ti që Babë bëre Stalinin.
A ke besë? Atdhe e Nderë?
Zëri i Zotit bubulloi.
Tundi kodër, fushë e male.
Pyes veten dhe mendoj
A kanë fund o Zot k'to halle?
Kam n' Flamur zog me dy krena
Një zog-monstër, shenj Sllavije.
Prej aty merr cakun rrena
Bash aty vjen erë tradhtije!
Fluturo shqiptar drejt qiellit.
Çaj hapsirat anë e mbanë!
Galaktikat mbrapa diellit,
Me dy krena shqipe s'kanë!
Ku e gjete atë farë simboli?
Që Flamuri jonë e mban?
Me dy krena kush e polli?
Katolik e mysliman!
Nji Kosovë. Tjetra Shqypni
Njëra plagë e tjetra kockë.
Me dy krena kuq e zi.
Njëra Gegë e tjetra Toskë
Eh mallkue qoftë kush e shpiku
Me coptue veten me dy.
500 vjet Turkia të fiku
500 vjet brinjët t'ka thy!
Gjer' në Jemen shkove ushtarë
Tokën tande e le në zor.
Shkodra s'kishte bukë me hangër
Ti në Bejrut, guvernator!
Si do e bëje Nënë Shqiprinë?
Ti që s'njeh as Ligj as Shtet!
Kur të vdiqën jashtë Atdheut
Burrat me cironka n' xhep!
Je i vetmi komb me huqe.
Që s'e don kulmin e shpisë.
Popull - Dem, që bojën e kuqe
Shkon ia merr uha komshisë.
Sot që rrugët e Evropës
Me gjak tandin i ke hapë.
Prapë drejtohesh prej eskortës
Që vjedh Ditë e që vjedh Natë!
Mos për gjakun e martirëve!
Mos për hatrin e lirisë!
Mos ia prish të ardhmen fëmijve!
Mos ia hap vorrin Shqypnisë!
Je mallkue nga Historia.
Je shqiponjë, s'je korb, as sorrë!
Nji formulë e ka Shqypnija:
Je bashkvuajtës e bashkfajtorë!
(vijon)
KU KEMI LERË?!...
Elegji
Në ç`vend kemi lerë?
Krenarë dhe të dhjerë?
Në Shqipëri!
Ku të hedhin më shumë baltë?
Dhe fajdet t’i grijnë paratë?
Në Shqipëri!
Ku jetojmë aq të gëzuar?
Xhepat bosh, derën e blinduar?!
Në Shqipëri!
Ku ka bakër, krom dhe ar
Po s`ke ujë as për t’u larë
Në Shqipëri!
Ku spiuni bën transparentin?
Ku vampirët bëjnë Parlamentin!?
Në Shqipëri!
Ku ta vrasin Deputetin?
Ku s`e pjerdhin Presidentin?
Në Shqipëri!
Ku Qeveria punon me banda?
Ku na mbanë gjallë veç kontrabanda?
Në Shqipëri!
Ku ka vlerë më shumë Gomari
Se shkencëtari apo shkrimtari!?
Në Shqipëri!
Ku Qeveria luan Nastradinin?
Ku sigurimsi të vjedh persekutimin?
Në Shqipëri!
Ku i veshin në kokë çorapet?
Ku kallashi i lanë hesapet!
Në Shqipëri!
Ku s’punojnë hiç Kombinatet!
Ku hajdutët ngrejnë pallatet?
Në Shqipëri!
Ku pëlcet, kërcet dyfeku?
Ku pa punë, fitohet leku?
Ku hedh valle serbi dhe greku?
Në Shqipëri!
Ku ka “paqe”, “rend dhe qetësi”?
Ku ujku për ujkun është njeri?
Në Shqipëri!
Ku jeton një popull e nuk ka të dytë?
Që bën sherr me veten dhe vetes i nxjerr sytë!?
Në Shqipëri!
Ku vishet gjithë populli më trim i botës
Me tesha të vdekunish të kurvë Europës!?
Në Shqipëri!
U privatizua vargu!
Hej milet!
Dallkaukë, letrarë, bejtexhinj dhe poet
Mblidhuni tek Sheshi i Poezisë!
Erdhi momenti i shumëpritur
Privatizohen vargjet, vjerrshat, poezitë
poemat, balladat e vlerat e Letërsisë,
merrini Antologjitë Letrare ku janë e ku nuk janë
fillojmë nga ato të shkruarat në pergamenë
nga autorë me emra të lashtë Taukrik, Taulant
Vraufrik, Hespant, Iprisht, Ibrisht
Ecni ndër shekuj tek poetët me mbiemra
justinianë dhe bizantinë
Zarisht, Bogdan, Ylenec, Jeronim,
ndaluni tek arbëreshët e Moresë
Gavril, Derad, Pal, Muzak, apo Golem
Blini Fishtën, shisni Koliqin, një Mjéd ndrrohet me dy Migjen!
Mblidhuni të gjithë me lajmërimin tem!
Do ndrrohet Naimi, Chajupi,Prenushi dhe Shantoja
Me poezi shkruar nga Mao Y dhe Go Mo Zhoja(!)
Mblidhuni pra mos humbisni rastin!
Sot hapet Tenderi i Privatizimit Epokal!
Tek Sheshi i Poezisë
Shisni Ismail Kadarenë dhe blini poetin Fekal!
Ka dalë nga gjiri i popullit!
Gjyshi i tij ka qenë Këshilltar në Hekal!
Bile dhe kryetar fronti...kryeçoban i dhisë!
Rapsod i orëve të para, që me porosi të partisë..
diskretitoj puçistat në gjirin e ushtrisë..
Nxitoni se vargjet po mbarohen!
Poemat shiten, blihen, privatizohen!
****at e Poezisë krihen, zbukurohen
gëzohen, pasurohen!
Në bordellet e vargut të thyer...
Mos humbisni rastin!
Poezinë kombëtare për ta këmbyer.
Nesër do privatizojmë Historinë!
Do këmbejmë Korçën e Gjirokastrën
të bëjmë Vorio Epirinë!
Mos humbisni rastin!
Sot privatizojmë Poezinë!
Nesër Historinë, Gjeografinë, emrat e mbiemrat!... etj., etj.
Nesër!...
Nesër ama!... pastaj?...
Pastaj na mbetet të privatizojmë Atdheun!
Dreqi le ta hajë!
Jepen falas Eposi i Kreshnikëve
Legjenda e Murimit!
Është rinovuar koncepti për Atdheun!
Tani kemi Bashkimin Europian
Atje mund të futemi pa Skënderbeun(!)
Gjin Bue Shpatën, Kont Uranin
Adem Jasharin, Zahirin, se qe besa na lodhën.
Privatizojmë fushat dhe malet e mandej
privatizojmë Kosovën!!!
(Oj medet!)
Si dikur Plavë e Guci...
Shkodrën e bëjmë Zonë të Lirë
(pa dalje në det...)
ndoshta e lëmë të shkojë me Mal të Zi.
Hej milet!
Mblidhuni tek Sheshi i Poezisë!
Privatizohet vargu atdhetar!
Shitet me shumicë!
Mblidhini kursimet tuaja shqiptarë!
Ejani dhe bleni vargjet me rimë, pa rimë.
Se Antologjia do muroset si Rozafa dhe jashtë do t’i lëmë vetëm një sisë...
Ka ardhur Koha e Mbrapshtë
Të pijmë qumësht të konservuar nga punishtet e Greqisë
Mblidhuni të gjithë
në Sheshin e Poezisë!