Darka e Vitit të Ri sa na kushton?

Një pjesë e qytetarëve do të festojnë në shtëpi, të tjerët prenotime në restorante ose udhëtime jashtë vendit 

Çmimet e shtrenjta "ngrijnë" xhepat e shumë shqiptarëve

Shpenzime të mëdha për natën e Vitit të Ri. Kjo për të gjithë qytetarët, si për ata që kanë mjaftueshëm të ardhura, ashtu edhe për të tjerët, të cilët me sakrificë shumë të madhe arrijnë të mbushin më shumë se zakonisht tryezën, gjatë natës së ndërrimit të viteve. Nga një vëzhgim që i është bërë tregut, shumica e qytetarëve shqiptarë, ashtu si çdo vit tjetër mendojnë për ushqimin. Në listën e shpenzimeve kryesore, duke përfshirë këtu mënyrën tradicionale të përgatitjes së tavolinës, janë gjeli apo pula e detit, bakllavaja ose kadaifi, llojet e supave të zakonshme për tryezat shqiptare, byrekët, përzierja e gatimeve shqiptare me ato të huaja, si dhe pijet, asortiment pa të cilën nuk mund të konceptohet darka e ndërrimit të viteve. Pijet më të parapëlqyera janë birra, vera, rakia, si dhe vitet e fundit është bërë pjesë e listës edhe shampanja. Kjo pije, sipas zakoneve të importuara nga vendet e tjera sjell fat, nëse hapet në orën 00:00. Megjithëse e gjithë kjo meny nëse renditet duket pak, shpenzimet për t‘i përgatitur të gjitha këto janë shumë. Vetëm për blerjen e gjelit të Vitit të Ri në kryeqytet secili duhet të llogarisë të nxjerrë nga kuleta jo më pak se 7 mijë lekë të reja. Tendenca është në rritje, sa më vonë aq më shtrenjtë. Edhe ëmbëlsira tradicionale e bakllavasë, duke përfshirë të gjitha "harxhet", kushton të paktën 2 mijë lekë të reja. Sipas një llogaritjeje të thjeshtë matematikore, pijet, zarzavatet, frutat, llojet e mishrave, peshku, apo përgatitja e pjatave speciale për darkën e ndërrimit të viteve, kushton nga 15 mijë lekë të reja deri në shifra marramendëse. Kjo, nëse llogarisim edhe ato familje, të cilat preferojnë që 2008-ën ta presin jashtë vendit, ndërsa shijojnë pushimet e këtyre ditëve.

Sipas disa agjencive turistike, kërkesat më të mëdha për këtë fundvit kanë qenë për në: Maqedoni, Mal të Zi, Turqi, Egjipt, Francë, Çeki, Austri. Madje, edhe vetë agjencitë këtë herë kanë qenë më të organizuara se vitet e tjera, duke ofruar paketa turistike vetëm për pushimet e Vitit të Ri. Paketa këto, të cilat nisin nga 150 euro e deri në 2 mijë euro. Por, jo vetëm jashtë. Edhe restorantet në veri apo në jug të Shqipërisë kanë nxjerrë në treg oferta për të gjithë ata që duan të kalojnë ndryshe Vitin e Ri. Më të kërkuarat mbeten gjithmonë lokalet, restorantet dhe pubet në qendër të Tiranës. Për të kaluar natën e Vitit të Ri në restorantin e një hoteli me 4 apo 5 yje të kushton nga 8 mijë lekë deri në 15 mijë lekë të reja për person. Sigurisht, oferta mund të ketë të përfshira edhe shërbime ekstra, për të cilat duhet të paguash më shumë. Po ashtu, që të rezervosh pas orës 00:00 në një lokal apo pub të duhet të paguash për person nga 5 mijë deri në 10 mijë lekë të reja. Këtu, duke përfshirë vetëm pijet. Dhe veç darkës së Vitit të Ri, duhet t‘i shtosh listës së shpenzimeve edhe pagesat për rezervimet pas mesnate. Por jo vetëm kaq, me rastin e festave secili dëshiron të marrë dhe të japë dhurata. Kjo ka qenë një nga arsyet që vitet e fundit në vendin tonë festat si Krishtlindjet apo Viti i Ri janë pagëzuar si festa komerciale. Amvisat veç darkës dhe gatimeve kërkojnë të blejnë gjëra të reja për shtëpinë, për orendi kuzhine apo edhe për të blerë veshje të reja. Meshkujt kërkojnë të blejnë më shumë aksesorë të teknologjisë së fundit, si telefona, aparate fotografike apo pajisje të tjera. Më shumë se të gjithë të tjerët, janë vajzat që veç të brendshmeve të kuqe kërkojnë veshje këpucë, aksesorë e natyrisht pa munguar bizhuteritë. Nëse do të bëheshin të gjitha këto llogaritje për Vitin e Ri secili shpenzon jo vetëm rrogën apo fitimet e muajit, por edhe shpërblimet edhe kursimet e shumë kohëve.

E pavarësisht shpenzimeve dhe parave që dalin herë me dhimbje e herë me qejf, të gjithë nxitojnë t‘i thonë njëri-tjetrit "gëzuar, një vit të mbarë", edhe pse më 1 janar ka rrezik të numërohen vetëm monedhat e mbetura metalike.

Meny

Darka e Vitit të Ri
Gjeli i detit
Bakllavaja
Byreku
Supat
Sallatat
Mishi
Peshku
Pijet
Shpenzime personale
Prenotime për Vitin e Ri
Dhurata për të afërmit
Shpenzime vetjake
Udhëtime jashtë vendit