Cikël poetik nga Sejdi Berisha

P  o  e  z  i

 

Sejdi BERISHA:

 

 

FORMULË E KËNGËS SIME

 

Pafajësia e syve

Rrëfimi i zemrës

Dhembja e shpirtit

Dashuria dhe lumturia

Janë formulë e këngës sime

Ju lutëm mos i vritni

Janë engjëj

Çuditshëm duke kënduar

 

 

DËSHMI

 

Mos e lëndoni lumturinë

Dhembjen mos e lëkundni

Se, janë

Si dy dëshmi që digjen

Gjurmë e tyre vetëm kënga

Si legjendë ëndrrash

 

 

KUR TË RRITËN VARGJET...

 

Kur të rritën vargjet e mia të vogla

Do të janë krenarë

Për dorën time të vockël

E, kur të plakën poezitë e mia

Mbi këngën e njeriut

Me pëlhurë të bardhë veshur

Dritën dhe këngën duke  mbrojtur

Këngët e njeriut

I cili edhe sot

Është udhëtar i çuditshëm

 

Kur të rritën vargjet e mia

Ndonjëherë

Kur të bëhen të mëdhenj

Burra kur të bëhen

Mbi një kodër do të gufojë bari

E, në mes të tij një lule

Rri duke shikuar

Duke qeshur e duke qarë

Për fjalën time të pagjetur

Për shkrumbin tim të pathënë

 

Kur të rritën vargjet e mia të vockla

Kënga do të plaket

Amshim do bëhet

Fuqia e diellit

 

 

KËSHILLË

 

Këngën

Kurrë mos e fillo kah mesi

Se fillimi do të lëndohet

Kurse fundi

Fundi në gënjeshtër

Mund të shndërrohet

 

Kurrë mos këndo

Pa të kënduar zemra

E pa të qarë shpirti

 

 

LUTJE KRYENEÇE

 

Kënga ime

Kah do që të shkosh

Më merr me vete

Përralla t’i rrëfejmë njëri-tjetrit

Ndërsa ëndrrat do t’i murosim

Në shi

Në lotin e shiut

Aty do të gufojë gjelbërimi

Për tu prehur e për t’pushuar

Edhe kënga

Edhe pritja

Edhe unë

 

Kënga ime

Mos më le vetëm

Se më mallkon shiu

Që e dua shumë

Se do t’më mallkojë

Për këngët që ia kam kushtuar

Pranoje këtë lutje kryeneçe

Kënga ime e pambaruar