Zemra Shqiptare

  https://www.zemrashqiptare.net/


Demir Krasniqi: Shteti i Kosovës

| E marte, 16.02.2010, 10:00 PM |


Në 2 - Vjetorin e  Pavarësisë :

 

            SHTETI I KOSOVËS

                        /Rapsodi satirike/

 

Na u kthye moti për së mbari –

Me dy shtete u bë shqiptari !

Njëri është Shqipëri etnike ,

Tjetri – Kosovë   multietnike !

 

Kem dy shtete me dy flamuj –

Për me i varë s’ po dalin hunj !

Kah përshkon fryma  arbërore  

Valon shqipja dykrenore .

 

Flamurin e dytë , kush na e shpiku ?

Askush tjetër , pos UNMIKU !

Kem flamurin kosovarë 

Me gjashtë yje  e  gjashtë kryetarë !

 

I pari , është një rroçkodell –

E ka emrin Kristofer Dell .

Nuk le vend kund hundët pa i shti –

Nuk le çorbë pa e përzi !

 

I dyti , këqyrë  kush po bënë faj –

E ka emrin Piter Fajt .

I treti , mjekrën e ka për seri –

Quhet Lamberto Zanieri .

 

I katërti , këqyrë kush po gabo –

Quhet Iv de Kermabo .

I pesti , premtime na kënaqi –

E ka emrin Hashim Thaçi .

 

I gjashti , pushtetin e shkriu –

E ka emrin Fatmir Sejdiu .

Kërcen Fatmiri , s’ ia prish qefin –

Qysh t’ ia rrahë Hashimi , defin !

 

Himn – Kosovës kush i kompozoi ,

Që me dhunë na e imponoi ?

Autorë t’ Himnit memec –

Janë UNMIKU me EULEX !

 

 

 

Himn memec pa fije kripe –

Që t’ mos k’ndohet n’ gjuhën shqipe !

Me k’ndua shqip – bëhet kiameti ,

Do të qajnë minoriteti !

 

Identitetin tonë kombëtarë –

Na e shndërruan në kosovarë !

Kështu ka thënë Baba UNMIK –

Me bë shtet demokratik !

 

Me i mposhtë forcat fanatike –

Me shoqëri multietnike !

Me ndërtua sovranitet –

T’ kërcejnë shkijet  qysh t’ duan vet !

 

Me u dhënë pare , me u dhënë punë –

Çdo katund me ua bë komunë !

Dhe shqiptarët me mbajt  fjalë –

Përtej Ibrit mos me dalë !

 

Mos me hapë n’ veri – dogana,

Këtë punë shkijeve  s’ ua ka ana !

Ruajnë kufirin disa banda –

Ku lulëzon kjo kontrabanda !

 

Mos me ua përmend kurrë Republikën ,

Se janë t’ ndjeshëm e mund të ligën !

Mos me ua përmend kurrë Kushtetutën ,

Se mund t’ tremben e marrin tutën !

 

Mos me ua përmend kurrë as krimet ,

Se shumë shpejt marrin hidhërimet !

Mos me ua përmend Kosovën – shtet ,

Se  nga ethet  – marrin hilet !

 

Moj Kosovë, moj heroinë –

Qysh ta shitën gjithë pasurinë ?!

Moj Kosovë , moj  zemra e lokes  

Qysh ta shiten arin nëntokës ?!

 

Shiten xehe , shiten fabrika ,

Shiten ujë e shitën drita !

Dhjetë vjet  n’ terr  jetojmë me KEK ,

Dhjetë vjet  tmerr e   hendikep !

 

Do ta shesin një ditë dhe ajrin –

Mos ia pafshin për jetë hajrin !

N’ ABC  e  bëjnë si  rrymën –

Kush s’ paguan ia ndalin frymën !

 

Popullin e shkretë e lanë n’ sokak –

Nuk ka bukë me qitë n’ stomak !

Anë e mbanë Kosovës mbarë –

Janë mbushë sheshet me  lypsarë !

 

Nga ndo ‘i  sëmundje me lëngua –

Nuk kanë pare me u shërua !

Vdes njeriu – shtrirë mbi dhe ,

Nuk kanë pare, qefin me i ble !

 

Rrofsh Kosovë – kopsht i lulëzuar ,

S’ mbet zyrtarë pa u korruptuar !

Rrofsh Kosovë , ku rritet trimi ,

Ditë për ditë po t’ lulëzon krimi !

 

Gjilan, më 17 .02.2010.     Demir KRASNIQI