E premte, 29.03.2024, 03:39 PM (GMT)

Kulturë

Ramiz Gjini: Gruaja e huaj

E diele, 06.12.2009, 06:50 PM


Gruaja e huaj

Tregim nga Ramiz GJINI

Nuk ka erë më të rëndë se era që përhap madërgona. Saherë i shkul nga kopshti im, përpiqem më kot ta heq krejt nga duart ngjyrën e asaj llubate të verdhë e helmatisëse. Ajo do të mbetet, derisa ta zhbijë vetë koha.
Kur ra zilja e telefonit, fshiva nxitimthi duart me një peshqir dhe vajta e ngrita receptorin. Ç’prej matanë,dëgjova të fliste një zë gruaje.
     - Jam Belina, - tha ajo, - Belina Kelti.
Ndjeva të më zgjohej në lukth një dhimbje e vjetër, një dhimbje që e kam patur para njëzet vjetësh, e që e kisha pandehur të fshirë e të harruar. Sepse vërtet kishte njëzet vjet që nuk e kisha parë Belina Keltin, që kur ajo mbaroi studimet e shkollës së lartë dhe iku në një qytet provincial, ku u martua me një mësues shkolle fshati, e nisi të vinte në zbatim ato synimet e saj pasionante për t’u marrë me koleksionimin dhe studimin e bimëve mjeksore.
Qemë dashur bashkë me një dashuri të rrëmbyer, por fatshkurtër. Dashuria jonë pat qenë mu si ajo stuhia e pranverës, që vjen kalimthi me shtrëngatë, e ikën duke lënë pas petale të rrëzuara përtokë nën një qiell të kthjellët si loti...
     - S’besoj të më keshë harruar, - tha ajo pas stepjes sime.
     - Aspak, Belina! - nxitova e thashë unë. - Vetëm se jam pak i tronditur... Pas gjithë kësaj kohe që ka kaluar...!
- E di, - tha ajo, - por le të takohemi njëherë si dikur... Të kujtohet? Asokohe ti ishe një djalosh I apasionuar pas poezisë, kish filluar të të pëlqente era e flokëve të mi dhe këpusje budallallëqe që mua më pëlqenin...  
     E lamë të takoheshim në orën katër pasdite tek Stacioni i Autobuzëve të Veriut. Aty ndodhej edhe një park plot lule, brenda të cilit, binte në sy një shatrivan i vjetër. Prej kohësh, ky shatrivan, qe kthyer në një hurdhë uji. Verës, për çdo ditë, llapashiteshin aty fëmijët e vegjël.  
Unë nuk e di çfarë ndjejnë të tjerët në çastet e një takimi pas njëzet vjetësh me një ish të dashur, porse mua, - të them të drejtën, - m’u bë si të më kishin shtyrë me pahir për të vënë një dorë madërgona mbi varrin e gruas së xhaxhait tim, e cila, ka vdekur para shumë vitesh. Ndoshta e pata atë ndjesi për shkak të ngjyrës së asaj llubate të verdhë e helmatisëse madërgonash që nuk munda ta shqisja dot nga duart e mija, si dhe për shkak të kujtimeve, që, ndërsa përpiqesha t’i zhvarrosja vagëllimthi nga kujtesa, dëgjoja ngicngacet e krimbit përthellë ndërgjegjes time, i cili, brente pareshtur për të dalë nga pezhishka bashkë me një tymtë faj të pashlyeshëm: përse nuk i kisha shkruar asnjëherë Belinës? Përse nuk i kisha telefonuar? Përse nuk kisha pyetur kurrëndonjëherë për të, për fatin dhe jetën e saj, të paktën sa për ta ditur? Si i kishte ajo tashmë flokët, ecjen, vështrimin, buzëqeshjen...?
     Mora autobuzin e orës tre pa njëzetë dhe u gjenda në vendin e takimit andej nga ora katër pa dhjetë. Doja që të isha unë, ai që do të prisja, natyrisht, për t’i dhënë një lloj vlerësimi Belinës si dhe rëndësi takimit tonë pas një kohe vërtet shumë të gjatë.
     Si kalova rrugën kryesore, hyra në park dhe hodha sytë andej nga stolat e gurtë të vendosur nën hijen e shelgjeve lotues, por nuk e pashë asgjëkundi Belina Keltin. Pashë vetëm një grua të rënë nga vahti, që rrinte dhe heshtonte në vetmi në cepin e një stoli. Vështronte me indiferencë fëmijët e vegjël si llapashiteshin në ujin e shatrivanit, ndërsa brohorisnin e bënin poterë me zërat e tyre gazmorë.
      Kjo grua, kish një fytyrë të hequr e të lodhur. Dukej se qe një nga ato gratë e vetmuara, të cilat, për shkak të ndonjë sëmundje të rëndë, pensionohen nga shteti. I kam parë shpesh të dalin ndonjë orë parqeve sa për të vrarë vetminë dhe mërzinë e thellë.   
Belina nuk kish ardhur ende, dhe mua, më kaploi një ndjesi si të mos kisha qenë unë ai që kisha folur me të gjatë asaj telefonate të papritur. Athua se isha ngritur nga shtrati krejt në jermi, dhe ia kisha behur aty për të takuar një grua, që e kisha parë në ëndërr.
     Fëmijët vazhdonin ato llapashitjet e tyre brenda shatrivanit, i hidhnin njëri-tjetrit grushte me ujë syve, loznin dhe qeshnin.
     Njëri qe flokverdhë, me sy të kaltër, energjik, gjithnjë i qeshur dhe më pëlqeu ngase ngjante me Indritin, nipin tim gjashtëvjeçar; kurse dy të tjerët dukej se qenë binjakë: imcakë, kokëqethur e me sy të zinj si kokërra kulumbrie të pjekur. Që të dy kishin veshur mbathje të shkurtëra në ngjyrë të kaltër dhe mbanin në kokë nga një strehëz kapeleje të lidhur me llastik prapa kokës.
     Unë i dhashë një përshëndetje të lehtë me kokë gruas së huaj, zura vend në cepin tjetër të stolit dhe u ngula me vështrimin gjithnjë andej nga rruga, ku  luzma e njerëzve shkonte e vinte.
      Prisja nga çasti në çast të shfaqej Belina Kelti, me atë ecjen e saj karakteristike, që edhe pas njëzet vjetësh ndarje, nuk më qe shqitur nga kujtesa: një ecje prej konteshe, me kokën paksa të ngritur e vështrimin të hedhur larg. Përpiqesha të imagjinoja çastet e para të atij takimi me të, që ende s’kish ndodhur, dhe qeshë i sigurtë, që do të dukesha para saj mu si një humbameno i budallepsur. Kurse Belina, me atë natyrën e saj të qetë, sapo të më shikonte, do të nënqeshte me një lloj përmbajtje fisnike për të më dhënë të kuptoj se kështu na qenka jeta, ku koha, që ikën e s’kthehet kurrë më, i marrka nëpër këmbë vitet, ngjarjet, dashuritë e bashkë me ta edhe njerëzit.
      Dy binjakët deshën ta rrëzonin në ujë flokëverdhin me sy të kaltër, por ai u rrëshqiti nga duart si ngjalë dhe ata u rrëzuan vetë me një pllaquritje zhurmëmadhe. Stërkalat mbërritën gjer tek ne, dhe gruaja e ulur në cepin tjetër të stolit lëshoi një si klithje të lehtë gazmore. Pastaj qeshi, u kthye nga unë e me një zë që i rezonoi thellë në kraharor tha:
     - Janë kaq të mirë...!
     - Po, - thashë unë.  
Akrepat e orës, tashmë e kishin kapërcyer katrën kurse Belina Kelti ende s’po vinte. U ngrita në këmbë dhe nisa të bëja ecejake përballë shatrivanit, gjithnjë me vështrimin andej nga duhej të shfaqej Belina.
      Nuk vonoi shumë dhe unë pashë të kalonte rrugën atje tej e të vinte drejt nesh një grua me flokët e gjatë të hedhur supeve. Por ecja nuk qe e Belinës. Të kish ndryshuar pas kaq vitesh ecja e saj? Të ishte, vallë, kjo grua Belina Kelti?
      Duke u afruar çdo çast e më tepër, unë munda të dalloja miset e fytyrës së saj: bardhavele, vetulla të vizuara me kalem si dhe një manushaqe e thelle në vallet e syve të saj lavrashë e të shqetësuar. Mbante një palë vath si kalavesha rrushi me xixime zjarri. Bluza e saj e hollë në ngjyrë rozë, i rrinte ngushtë dhe qe lagur nga qumështi, që i kish rrjedhur pak nga thimthat e gjijve.
      Me të mbërritur, ajo më hodhi kalimthi një vështrim indiferent, pastaj ndaloi buzë shatrivanit e gjithë përkëdheli i tha flokëverdhit:
      - Mjaft loze „Luqe-puqe.“ Vishu tani. Është koha të shkojmë tek çerdhja, të marrim motërzën e vogël.
Ktheu shpinën dhe mori të ecte andej nga erdhi.
       Vogëlushi u bind, doli nga uji, rrëmbeu sandalet bashkë me bluzën dhe e ndoqi të jëmën nga pas turravrap.
       Edhe dy binjakët sykolumbri e lanë lojën, qëndruan një copë herë të mbërthyer në vend me vështrimin andej nga po largohej shoku i tyre.    
      Kushedi për të satën herë, pashë orën, e cila, më duket se qe andej rreth pesës.
      Belina nuk erdhi, dhe unë, qeshë i sigurtë se nuk ia vlente kurrësesi të prisja më. U ktheva për një çast dhe hodha sytë andej nga stoli ku isha ulur pak më parë: pashë, që stoli qe i shkretë...
      Gruaja e huaj nuk ndodhej aty.
      Atëherë ma zunë sytë atje përmatanë, se si po largohej me një ecje karakteristike prej konteshe, me kokën paksa të ngritur e vështrimin të hedhur larg; se si u zhduk pastaj mes një dyndalle njerëzish që shkonin e vinin secili në hesap të vet.


(Vota: 3 . Mesatare: 5/5)

Komentoni
Komenti:

Video

Qazim Menxhiqi: Niset trimi për kurbet


Gallery

Pëllumb Gorica: Magjia e bukurive të nëntokës sulovare
Fotaq Andrea: Një vështrim, një lot, një trishtim – o Zot sa pikëllim!
Pëllumb Gorica: Grimca kënaqësie në Liqenin e Komanit
Shkolla Shqipe “Alba Life” festoi 7 Marsin në Bronx
Kozeta Zylo: Manhattani ndizet flakë për Çamërinë Martire nga Rrënjët Shqiptare dhe Diaspora