Zemra Shqiptare - Sabit Rrustemi: Nesër është Ditë Lindjeje

Sabit Rrustemi

NESËR ËSHTË DITË LINDJEJE

(Heroit dhe poetit Agim Ramadani në 3 Majin e Ditëlindjes së përjetshme)

Nesër është Ditë Lindjeje
Ditëlindja jote e tridhjetegjashtë

Atdheshkronjësi i lirisë
Na buzëqesh anekënd Etnisë
Çdo mëngjes
Në secilën ditë
Përditë përditë përditë

Nëpër Luleagujt e Plisores
E Luleborat e Koshares
Shtrinë trajektoren e dashurisë
Cep më cep Dardanisë
Rrugës së Re të Via Etnisë

Mosha jote vendnumron
Në magjinë e atdhedashurisë
Në shkronjën e tridhjetegjashtë të shqipes

Në çdo maj na kthjellon
Me dashurinë e Prillit
E trimërinë e Marsit

Unikat mbetesh me emër
E vepër

As plakesh
As jepesh
E kurrë kurrë nuk pjestohesh

Numri Një i Lirisë mbetesh
I ritakimit të Etnisë
Pas një shekulli

Të kemi ëndërr
E lakmi
Pa mëri

Secila epokë para teje do përkulet
Hapin do ndal
Për ta marrë mësimin e jetës
Ecjen vertikale

Nesër ditëlindja jote vjen me ag
Nëpër secilin prag
E oxhak

Do zgjohen të rilindurit
Të lindurit në ndërkohë
Do vijnë pas
Ta shuajnë etjen
Në tëndin buzëgas

Aty ku të mbetën çapkënllëqet e fëmijërisë
Aty ku vole freskun e rinisë
Aty ku u ngrite në piedestalin e lirisë

Do vijmë pas
Do vijmë pas
Të shëlbohemi me tëndin buzëgas

Luleagu i Etnisë
Nesër është ditëlindja jote
Nesër

Nesër do t’i prekim majat e Dardanisë
Nëpër Alfabetin e lirisë
Fytyrës së çiltër të Agmisë

(2 Maj 2008)